គ្មានការព្រមព្រៀងអ្វីទាំងអស់ក្នុងកិច្ចចរចារ រវាងអ៊ុយក្រែន និងរុស្ស៊ី នៅតួកគី
ចេញផ្សាយនៅថ្ងៃទី១៧ ខែឧសភា ឆ្នាំ២០២៥៖
កិច្ចចរចាសន្តិភាពដោយផ្ទាល់ជាលើកដំបូង រវាងរុស្ស៊ីនិងអ៊ុយក្រែន ដោយមានតួកគីជាអន្តរការី បានបិទបញ្ចប់ នៅរសៀលថ្ងៃសុក្រទី១៦ឧសភា។ គ្មានការទម្លាយឱ្យដឹងអំពីខ្លឹមសារនៃការជជែកគ្នាទេ ប៉ុន្តែអ្នកទទួលខុសត្រូវអ៊ុយក្រែនបានចោទថារុស្ស៊ីបានទាមទារនូវអ្វីដែលមិនអាចទទួលបាន ដើម្បីធ្វើយ៉ាងណាឱ្យកិច្ចចរចាបរាជ័យ។
នៅទីបំផុត ភាគីរុស្ស៊ី និងភាគីអ៊ុយក្រែនដែលដឹកនាំដោយរដ្ឋមន្ត្រីក្រសួងការពារជាតិ ព្រមចូលអង្គុយជជែកទល់មុខគ្នា នៅរសៀលថ្ងៃសុក្រទី១៦ឧសភា វេលាម៉ោង១៥និង២០នាទី នៅទីក្រុងអ៊ីស្តង់ប៊ូល ដោយមានរដ្ឋមន្ត្រីក្រសួងការបរទេសតួកគីជាអ្នកសម្របសម្រួល។ បើតាមប្រមុខការទូតតួកគី នៅពេលផ្តើមបើកកិច្ចចរចា ដែលប្រព្រឹត្តទៅអស់រយៈពេល១ម៉ោងនិង៤០នាទី តួកគីបានជំរុញឱ្យមានបទឈប់បាញ់នៅអ៊ុយក្រែន យ៉ាងឆាប់ៗតាមដែលអាចធ្វើទៅបាន និងប្រែក្លាយការចរចាថ្ងៃនេះជាមូលដ្ឋានសម្រាប់នាំឱ្យមានជំនួបដោយផ្ទាល់រវាងប្រធានាធិបតីរុស្ស៊ីនិងសមភាគីអ៊ុយក្រែន។
ប៉ុន្តែគ្មានទេការបង្ហើបបង្ហាញឱ្យដឹងអំពីខ្លឹមសារនៃកិច្ចសន្ទនានោះ។ ក្រោយកិច្ចពិភាក្សាចប់ អ្នកទទួលខុសត្រូវអ៊ុយក្រែន បានប្រកាសចោទប្រកាន់ភាគីរុស្ស៊ីថាទាមទារនូវអ្វីដែលមិនអាចទៅរួច ក្នុងបំណងធ្វើយ៉ាងណាឱ្យការចរចាបរាជ័យ។ ម៉ូស្គូបានទាមទារឱ្យកៀវបោះបង់គំនិតចង់ទារយកទឹកដីដែលយោធារុស្ស៊ីទន្ទានបាន និងដកកងទ័ពចេញពីតំបន់ ក្រោមការត្រួតត្រារបស់រុស្ស៊ី ទើបអាចចាប់ផ្តើមនិយាយអំពីបទឈប់បាញ់។ ម្យ៉ាងវិញទៀត សម្រាប់ភាគីអ៊ុយក្រែន តំណាងរុស្ស៊ីជាក្រុមគ្មានសមត្ថភាព សិទ្ធិសម្រេចអ្វីទាំងអស់។
សូមរំឭកថា កិច្ចចរចាដោយផ្ទាល់រវាងរុស្ស៊ីនិងអ៊ុយក្រែន គ្រោងចាប់ផ្តើមនៅថ្ងៃទី១៥ឧសភា តាមគំនិតផ្តួចផ្តើមរបស់លោកពូទីន ដែលដល់ថ្ងៃ ស្រាប់តែមិនមក។ អវត្តមានហើយ ប្រធានាធិបតីរុស្ស៊ីបញ្ជូនតំណាងកំរិតទាបមកចរចាទៀត។ ខកចិត្តខ្លាំង លោកហ្សេឡេនស្គីនិងរដ្ឋមន្ត្រីក្រសួងការបរទេសអាមេរិក ដែលមកដល់តួកគីទៅហើយ បានត្រឹមជួបជាមួយប្រធានាធិបតី អ៊ែរដូហ្កាន។
នៅចំពោះមុខបរាជ័យនេះ លោកប្រធានាធិបតីអ៊ុយក្រែន ហ្សេឡេនស្គី បានអំពាវនាវឱ្យសហគមន៍អន្តរជាតិបញ្ចេញប្រតិកម្មខ្លាំងៗ និងដាក់ទណ្ឌកម្មរុស្ស៊ី ព្រោះ រុស្ស៊ីបញ្ជូនតំណាងមកបង្គប់កិច្ច ទើបការចរចាមិនបានផល។ នៅល្ងាចថ្ងៃសុក្រនេះ ប្រធានាធិបតីអ៊ុយក្រែន ត្រូវជួបប្រជុំ នៅប្រទេសអាល់បានី ជាមួយប្រធានាធិបតីបារាំង នាយករដ្ឋមន្ត្រីអង់គ្លេស និងអាល្លឹម៉ង់ ព្រមទាំងប្រធានាធិបតីអាមេរិក តាមទូរស័ព្ទ ដើម្បីដាក់សម្ពាធលើរុស្ស៊ី។ សម្រាប់ប្រធានាធិបតីបារាំង រុស្ស៊ីរបស់លោកពូទីន គ្មានឆន្ទៈស្វែងរកបទឈប់បាញ់ជាមួយអ៊ុយក្រែនទេ ដូច្នេះសម្ព័ន្ធមិត្តត្រូវតែរកវិធីបង្ខំឱ្យរុស្ស៊ីព្រម។ ម្សិលមិញ លោកប្រធានាធិបតីអាមេរិក ដូណាល់ត្រាំ ប្រកាសត្រៀមទៅជួបលោកពូទីន ដោយយល់ថាជាជំនួបចាំបាច់ សម្រាប់ដោះស្រាយជម្លោះ។
ចំពោះរុស្ស៊ីវិញ តំណាងប្រតិភូប្រកាសពេញចិត្តនឹងកិច្ចចរចាដោយផ្ទាល់ជាមួយភាគីអ៊ុយក្រែនណាស់ ហើយត្រៀមជាស្រេចបន្តទំនាក់ទំនងបែបនេះទៀត៕
Nº.0685
