មន្ត្រីនគរបាលចរាចរណ៍៩រូប ដែលបានឃាត់រថយន្តជនបរទេស និងទាមទារប្រាក់៣០០ដុល្លារត្រូវបានហៅមកសួរនាំ

មន្ត្រីនគរបាលចរាចរណ៍៩រូប ដែលបានឃាត់រថយន្តជនបរទេស និងទាមទារប្រាក់៣០០ដុល្លារត្រូវបានហៅមកសួរនាំ

ចេញផ្សាយនៅថ្ងៃទី៤ ខែកក្កដា ឆ្នាំ២០២៥៖

ភ្នំពេញៈ មន្ត្រីនគរបាលចរាចរណ៍ និងមន្រ្តីជាប់កិច្ចសន្យាចំនួន៩រូបប្រចាំ នៅគោលដៅស្តុបព្រះសក្យមុនីចេតិយ ស្ថិតក្នុងសង្កាត់ស្រះចក ខណ្ឌដូនពេញ ត្រូវបានកោះហៅមកសួរនាំ នៅថ្ងៃសុក្រនេះ ក្រោមការចោទប្រកាន់ថា មន្រ្តីទាំងនេះបានឃាត់រថយន្តជនជាតិឥណ្ឌូនេស៊ី១គ្រឿង ដើម្បីសួរនាំរកឯកសាររថយន្ត និងទាមទារលុយចំនួន៣០០ដុលា្លរ។

កោះហៅសួរបំភ្លឺនេះធ្វើឡើង ក្រោយពីមានការផ្សព្វផ្សាយតាមបណ្តាញព័ត៌មានសង្គម ពីករណីឃាត់រថយន្តជនជាតិឥណ្ឌូនេស៊ី ១គ្រឿង ហើយសួរនាំរកឯកសាររថយន្ត។ នៅពេលនោះជនជាតិឥណ្ឌូនេស៊ី បានបង្ហាញ ប័ណ្ណបើកបរអាស៑ាន រួចហើយ តែប៉ូលិសនៅតែទាមទាររក ឯកសារ ផ្សេងៗ រហូតប៉ូលិសទាមទារលុយចំនួន៣០០ដុលា្លរ។ ប៉ុន្តែបុរសឥណ្ឌូនេស៊ី បានសម្រួលមកត្រឹម៥០ដុល្លារវិញ មិនតែប៉ុណ្ណោះមានប៉ូលិសមកទាមទារបន្ថែម ៤០០០រៀល កាលពីកន្លងទៅថ្មីៗនេះ។ នេះបើយោងតាមស្នងការដ្ឋាននគរបាលរាជធានីភ្នំពេញ នាព្រឹកថ្ងៃសុក្រ ទី៤ ខែកក្កដានេះ។

ឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ បានបញ្ជាទៅលោកស្នងការរងផែនការងារធនធានមនុស្ស ឲ្យការិយាល័យបុគ្គលិក នៅព្រឹកថ្ងៃទី៤ ខែកក្កដាឆ្នាំ២០២៥ កោះហៅមន្ត្រីនគរបាលចរាចរណ៍ និងមន្រ្តីជាប់កិច្ចសន្យា ចំនួន៩រូប នៅគោលដៅស្តុបព្រះសក្យមុនីចេតិយ  ដើម្បីសួរនាំបំភ្លឺ និងកំពុងធ្វើការស្រាវជ្រាវតាមជំនាញរបស់នគរបាល ប្រមូលព័ត៌មានឲ្យបានច្បាស់លាស់គ្រប់ជ្រុងជ្រោយ យកមកវិភាគវាយតម្លៃ ហើយធ្វើរបាយការណ៍។

មន្រ្តីជំនាញនឹងធ្វើសេចក្តីរាយការណ៍ជូនលោកស្នងការវិញ ដើម្បីពិនិត្យនិងសម្រេច ទៅតាមលទ្ធផលនៃការសាកសួរ និងស្រាវជ្រាវនេះ។

លោកឧត្តមសេនីយ៍ឯក ជួន ណារិន្ទ បានណែនាំដល់មន្ត្រីចុះអនុវត្តច្បាប់ចរាចរណ៍ផ្លូវគោក ពេលចុះអនុវត្តបំពេញភារកិច្ច ត្រូវមានក្រមសីលធម៌ វិជ្ជាជីវៈ សេចក្ដីថ្លៃថ្នូរ សាកសមជាកម្លាំងនគរបាលជាតិ។ ក្នុងនោះត្រូវអនុវត្តច្បាប់ប្រកាន់យកវិធានការជំនាញ និងវិធានការច្បាប់ ដោយភាពម៉ត់ចត់បំផុត។

ស្នងការដ្ឋាននគរបាលរាជធានីភ្នំពេញបញ្ជាក់ថា៖«ដោយឡែកចំពោះមន្ត្រីណាដែលរកឃើញថា អនុវត្តការងារ គ្មានវិន័យ ខ្វះក្រមសីលធម៌ វិជ្ជាជីវៈនគរបាលជាតិ ត្រូវតែទទួលវិន័យរបស់នគរបាលជាតិ ជាដាច់ខាតដោយមិនលើកលែងនោះទេ»។

Nº.0829