ពិព័រណ៍សៀវភៅ Big Bad Wolf Books លើកទី៤ ប្រមូលផ្ដុំសៀវភៅចម្រុះជាង ១លានក្បាល

ពិព័រណ៍សៀវភៅ Big Bad Wolf Books លើកទី៤ ប្រមូលផ្ដុំសៀវភៅចម្រុះជាង ១លានក្បាល

ចេញផ្សាយនៅថ្ងៃទី២៦ ខែមិថុនា ឆ្នាំ២០២៥

(ភ្នំពេញ)៖​ ពិព័រណ៍សៀវភៅ Big Bad Wolf Books លើកទី៤ ជាការប្រមូលផ្ដុំអំណោយចំណេះដឹងដ៏ធំនៅកម្ពុជា ដែលមានដាក់លក់សៀវភៅភាសាខ្មែរ និងអង់គ្លេស ១លានក្បាល និង២០មុឺនចំណងជើង នៅផ្សាររុងរឿង ក្នុងខណ្ឌជ្រោយចង្វារ រាជធានីភ្នំពេញ។ ការរៀបចំពិព័រណ៍នេះ ដើម្បីជំរុញឱ្យពលរដ្ឋស្រលាញ់ការអានសៀវភៅ និងអភិវឌ្ឍន៍ចំណេះដឹង ជាពិសេសប្រែក្លាយផ្សាររុងរឿងឱ្យទៅជាទីលានអក្សរសិល្ប៍ធំបំផុតដែលពុំធ្លាប់បានឃើញនៅកម្ពុជា។

លោក នេត្រ ភក្រ្តា រដ្ឋមន្រ្តីក្រសួងព័ត៌មាន ក្នុងសន្និសីទសារព័ត៌មានផ្សព្វផ្សាយពិព័រណ៍សៀវភៅដ៏ធំនេះ លើកឡើងថា ពិព័រណ៍លក់សៀវភៅលើកទី៤ The Big Bad Wolf Books នឹងបណ្តុះគំនិតពលរដ្ឋស្វែងយល់ពីសៀវភៅកាន់តែច្រើន ជាពិសេសជំរុញឱ្យប្រជាជនខ្មែរទម្លាប់ក្នុងការអានសៀវភៅ ស្គាល់ពីគុណតម្លៃនៃការអាន ដើម្បីអភិវឌ្ឍន៍ចំណេះដឹង និងបង្កើនគំនិតសម្រាប់ការសិក្សា រួមទាំងការងារ។

លោក នេត្រ ភក្រ្តា បន្តថា ៖« ក្រសួងព័ត៌មាន គាំទ្រការតាំងពិព័រណ៍នេះ ដើម្បីជំរុញវប្បធម៌នៃអាន និងឈ្វេងយល់ចំណេះដឹងដែលអាចឱ្យយើងឃើញពិភពលោកទាំងមូលតាមរយៈសៀវភៅ ជាពិសេសនឹងជួយបំផុសគំនិតពលរដ្ឋរីកចម្រើនក្នុងវប្បធម៌អាន ស្វែងយល់ពីសៀវភៅកាន់តែច្រើន ស្គាល់ពីតម្លៃនៃការអាន ដើម្បីអភិវឌ្ឍខ្លួនឯង ការសិក្សា និងអាជីព។ ខ្ញុំសូមលើកទឹកចិត្តដល់ពលរដ្ឋ ជាពិសេសអាណាព្យាបាល ដែលមានកូនៗអាចនាំគាត់ទៅទស្សនាពិព័រណ៍សៀវភៅ ដើម្បីបង្កើតទំនាក់ទំនងជាមួយសៀវភៅ និងស្គាល់ពីគុណតម្លៃនៃការអាន»។ 

ជាមួយគ្នានេះ ពិព័រណ៍សៀវភៅនេះ នឹងបើកជារៀងរាល់ថ្ងៃ ពីម៉ោង ១០ ព្រឹក ដល់ ១០ យប់ សម្រាប់ថ្ងៃចន្ទ ដល់ថ្ងៃព្រហស្បតិ៍។ ចំណែកថ្ងៃសុក្រ ដល់ថ្ងៃអាទិត្យ នឹងបើកពីម៉ោង ១០ ព្រឹក ដល់ ១២ យប់។ ដោយឡែក សៀវភៅដែលដាក់លក់មានតម្លៃចាប់ពី ទាបជាង ១ ដុល្លារឡើងទៅ ជាឱកាសសម្រាប់អ្នកចូលចិត្ត និងស្រលាញ់សៀវភៅគ្រប់វ័យ។ សៀវភៅជាច្រើនប្រភេទត្រូវយកមកដាក់តាំង មានដូចជា សៀវភៅសម្រាប់កុមារ, រឿងប្រឌិត, រឿងពិត, ដែលអនុញ្ញាតឱ្យមនុស្សស្ថិតនៅ ក្នុងជំនាន់ផ្សេងៗគ្នា អាចស្វែងរកនូវសៀវភៅ ដែលលក់ដាច់បំផុត, សៀវភៅល្បីៗ, ប្រលោមលោក, រឿងប្រឌិតបែបវិទ្យាសាស្ត្រ, មនោសញ្ចេតនា, សៀវភៅអភិវឌ្ឍខ្លួន, អក្សរសាស្ត្រ, ប្រលោមលោកក្រាហ្វិក, អាជីវកម្ម, ស្ថាបត្យកម្ម និង រចនា, សៀវភៅធ្វើម្ហូប និងសៀវភៅជាច្រើនប្រភេទទៀត នៅក្នុងកម្មវិធីពិព័រណ៍សៀវភៅដ៏ធំនេះ។ 

បន្ថែមពីនេះ លោកស្រី Jacqueline Ng សហស្ថាបនិករបស់ Big Bad Wolf Books បានបញ្ជាក់ថា ការរៀបចំពីព័រណ៍សៀវភៅលើកទី៤នេះ ក្នុងគោលបំណងបណ្តុះទម្លាប់នៃការអាន បង្កើនអក្ខរកម្មភាសាអង់គ្លេសទូទាំងពិភពលោក និងកសាងអ្នកអានជំនាន់ថ្មី។ អ្នកស្រី Jacqueline Ng លើកទឹកចិត្តពលរដ្ឋអានសៀវភៅ ដើម្បីបំផុសគំនិត បង្កើនភាពអង់អាច ដើម្បីរកឃើញខ្លួនឯង តាមរយៈចំណេះដឹង។  

ម្យ៉ាងវិញទៀត ពិព័រណ៍សៀវភៅ Big Bad Wolf Books បានវត្តមានជាង៥០ទីក្រុង ក្នុង១៧ប្រទេស ក្នុងចំណោមនោះ មានទីក្រុងផ្សេងគ្នាជាច្រើននៅអាស៊ីដូចជាប្រទេសម៉ាឡេស៊ី កម្ពុជា ក្រុងម៉ានីល សិង្ហបុរី ថៃ ក្រុងហុងកុង និងឥណ្ឌូនេស៊ី ប្រទេសតង់ហ្សានី កេនយ៉ា អេមីរ៉ាត់អារ៉ាប់រួម អារ៉ាប៊ីសាអ៊ូឌីត និងអេស្ស៊ីបជាដើម។ 

Nº.0806