វៀតណាម លុប ចោលទោស ប្រហារជីវិត ចំពោះបទ ឧក្រិដ្ឋ ៨ ករណី

វៀតណាម លុប ចោលទោស ប្រហារជីវិត ចំពោះបទ ឧក្រិដ្ឋ ៨ ករណី

ចេញផ្សាយនៅថ្ងៃទី២៦ ខែមិថុនា ឆ្នាំ២០២៥៖

រដ្ឋសភា វៀតណាម បានអនុម័តកែប្រែ ច្បាប់ ព្រហ្មទណ្ឌ ដោយ សម្រេចលុប ចោល ទោស ប្រហារ ជីវិត ចំពោះ បទល្មើសធ្ងន់ធ្ងរ ៨ ករណី ជាអាទិ៍ បទល្មើស ចេតនាចង់ផ្តួល រំលំ រដ្ឋអំណាច ឬ បទល្មើស បំផ្លាញសន្តិភាព ជាដើម។ រដ្ឋមន្ត្រី ក្រសួង យុត្តិធម៌វៀតណាម និង រដ្ឋមន្ត្រី សន្តិសុខ សាធារណៈ បាន ពន្យល់និងបកស្រាយ ព្រមគ្នា ថា  ការធ្វើ វិសោធនកម្ម នេះ ដើម្បី ឆ្លើយ តប ទៅនឹងការ វិវឌ្ឍសង្គម -សេដ្ឋកិច្ច ។ ចំណែក កាសែត រដ្ឋវៀតណាម បញ្ជាក់ថា ដើម្បី កសាង ទំនុក ចិត្ត ក្នុង វិស័យ វិនិយោគ ទុន។

រដ្ឋសភា នៃប្រទេស កុម្មុយនិស្តសង្គមនិយម វៀតណាម បានសម្រេចកែប្រែច្បាប់ព្រហ្មទណ្ឌ និង លុប ចោល ទោស ប្រហារ ជីវិត ចំពោះ បទឧក្រិដ្ឋ ចំនួន ៨ ករណី។ បទឧក្រិដ្ឋ ទាំង នោះ រួម មាន សកម្មភាព ផ្តួល រំលំ រដ្ឋអំណាច អំពើ ចារកម្ម អំពើ ពុករលួយ ការ ផលិត ថ្នាំក្លែងក្លាយ ការ ជួញដូរនិងដឹកជញ្ជូន គ្រឿងញឿន កេងបន្លំ ហិរវញ្ញវត្ថុ វិច្ឆេទកម្ម បំផ្លាញ ទ្រព្យសម្បត្តិរដ្ឋ និង បច្ចេកវិទ្យា រដ្ឋ វិច្ឆេទកម្ម បំផ្លាញ សន្តិភាព និងញុះញង់ បង្កសង្គ្រាម។

ជនល្មើស ដែល ត្រូវ កាត់ទោស ក្នុង បទ ឧក្រិដ្ឋ ទាំង នេះ នឹង មិនត្រូវ ប្រហារ ជីវិត ទៀត ឡើយ ហើយ ជំនួស មកវិញ គ្រប់ តុលាការ ទាំងអស់នឹង ប្រកាសផ្តន្ទាទោស ជាប់ពន្ធនាគារ អស់ ១ជីវិត ។ នេះបើតាម រដ្ឋមន្ត្រីក្រសួងយុត្តិធម៌វៀតណាម Nguyễn Hải Ninh ដែល បាន បញ្ជាក់ក្នុង បណ្តាញ ឃោសនារដ្ឋ ក្នុង ថ្ងៃ ពុធ ទី ២៥មិថុនា ។ ទន្ទឹម នឹងគ្នា នេះដែរ រដ្ឋមន្ត្រីសន្តិសុខសាធារណៈ Lương Tam Quang បកស្រាយ ថា ប្រព័ន្ធ យន្តការ ផ្តន្ទាទោស សព្វថ្ងៃចោទ ជា បញ្ហាប្រឈម ហើយ ក្នុង ករណីខ្លះ ការ ដាក់ ទោស ប្រហារជីវិតមិនឆ្លើយតបទៅនឹងលក្ខណៈវិវឌ្ឍន៍ សង្គម-សេដ្ឋកិច្ច។

វិសោធនកម្ម ច្បាប់ថ្មី នឹងចូល ជាធរមាន ចាប់ ពីថ្ងៃទី ១កក្កដា តទៅ។ ក្នុង ពេល ភ្លាមៗនេះ មហាសេដ្ឋីនី អចលនទ្រព្យ លោកស្រី ជឿង មី ឡាន ដែល ជាមេខ្លោងក្នុង បទល្មើស លួច កេងបន្លំ ហិរញ្ញវត្ថុធនាគារ ចំនួន ២៧ ពាន់ លាន ដុល្លារ បាន ទទួល ការ សម្រាលទោស ពី ប្រហារជីវិត មកត្រឹម ជាប់ពន្ធនាគារ មួយ ជីវិត ។ នេះបើតាម លោក Giang Hong Thanh មេធាវី ការពារ ក្តី ឲ្យ លោកស្រី ជឿង មី ឡាន ដោយ បញ្ជាក់ថា កូន ក្តី របស់ខ្លួន សប្បាយចិត្តណាស់ ។

ក្រៅពី រំលាយ ទោស ប្រហារ ជីវិត ៨ករណីខាងលើ នេះ កម្រែទម្រង់ ច្បាប់ថ្មីក៏ បាន បន្ថយទោស ព្រហ្មទណ្ឌ ចំពោះករណី បទឧក្រិដ្ឋខ្លះ ដែល តម្រូវ ឲ្យ ជាប់ទោសពន្ធនាគារ ១៨ ឆ្នាំ គឺ អាច សម្រាល មកត្រឹម ១០ឆ្នាំ។

កាសែត រដ្ឋវៀតណាម វាយតម្លៃថា ការ លុប ចោល ទោស ប្រហារជីវិត ចំពោះ បទឧក្រិដ្ឋ មួយ ចំនួននិង សម្រាលទោស ព្រហ្មទណ្ឌ ពេលនេះ បម្រើ ឲ្យ គោលនយោបាយ សហប្រតិបត្តិការ អន្តរជាតិ ដើម្បីកសាងទំនុកចិត្តក្នុងវិស័យវិនិយោគទុន ជាពិសេស ខណៈ ពេល ដែល វៀតណាម ខំប្រឹង ពង្រឹង ទំនាក់ទំនង លើឆាកអន្តរជាតិ ដោយ ឈរលើស្មារតី ទំនុក ចិត្តគ្នាទៅវិញទៅមក។

មកទល់នឹង ឆ្នាំ២០២៣ រដ្ឋ កុម្មុយនិស្ត វៀតណាម បាន បន្តអនុវត្តទោស ប្រហារ ជីវិតជា សម្ងាត់ និងចាត់ទុក ជាការ សម្ងាត់ របស់ ជាតិ ។ នេះបើតាម ឧត្តមស្នងការដ្ឋាន សិទ្ធិមនុស្ស នៃ អង្គការ សហប្រជាជាតិ ដោយ បញ្ជាក់ដែរថា គិត ត្រឹម ឆ្នាំ២០២៤ ទណ្ឌិត មិនតិច ជាង ១ ២០០ នាក់ នោះឡើយ ដែល កំពុង ជាប់ទោស ប្រហារ ជីវិត។  បើតាម អង្គការ ការពារ សិទ្ធិមនុស្ស ជាច្រើន ក្នុង ឆ្នាំ២០២៤ ជនល្មើស ៨០% ដែល តុលាការ ដាក់ ទោស ប្រហារ ជីវិត ជាប់ ពាក់ ព័ន្ធនឹងគ្រឿង ញៀន។ នៅ តំបន់ អាស៊ី ប្រទេសមួយ ចំនួន ដែល នៅបន្ត អនុវត្ត ទោស ប្រហារ ជីវិត មានដូចជា វៀតណាម ចិន កូរ៉េខាងជើង អាហ្វហ្កានីស្ថាន ឥណ្ឌូណេស៊ី និង សិង្ហបុរី៕

Nº.0807