អ៊ីស្រាអែលប្រកាស ទទួលយក បទឈប់បាញ់ជាមួយអ៊ីរ៉ង់

អ៊ីស្រាអែលប្រកាស ទទួលយក បទឈប់បាញ់ជាមួយអ៊ីរ៉ង់

ចេញផ្សាយនៅថ្ងៃទី២៥ ខែមិថុនា ឆ្នាំ២០២៥៖

តើ សង្គ្រាមរវាងអ៊ីរ៉ង់និងអ៊ីស្រាអែល នឹងត្រូវចប់ ជាស្ថាពរនៅ ថ្ងៃទី ២៤ មិថុនានេះពិតមែនឬ? កាលពី វេលាយប់ថ្ងៃចន្ទឈានចូលថ្ងៃអង្គារនេះ លោកដូណាល់ ត្រាំ បង្ហោះសារ ធ្វើ ឲ្យ គ្រប់ គ្នា ភ្ញាក់ផ្អើល ដោយ បាន អះអាងថា លោក បានស្នើបទឈប់បាញ់ជាស្ថាពរមួយ ទៅកាន់ភាគីជម្លោះទាំង ២ អ៊ីរ៉ង់-អ៊ីស្រាអែល ។ អ៊ីស្រាអែលបានប្រកាសនៅព្រឹក ថ្ងៃអង្គារនេះ ថា គេបានសុខចិត្ត ទទួលយក បទឈប់បាញ់នេះហើយ។ តែដោយឡែក អ៊ីរ៉ង់ វិញ មិន បាន បញ្ជាក់ថាយល់ព្រមទទួល ឬមិនទទួល ឲ្យច្បាស់នោះទេ ។

យប់ថ្ងៃចន្ទទី ២៣មិថុនា ម៉ោង ១០ និង ៣០នាទី ម៉ោងសកល លោក ដូណាល់ ត្រាំ បានបង្ហោះសារតាមបណ្តាញសង្គម Truth Social អះអាងថា លោកបានចាត់ចែងឲ្យ មានបទឈប់បាញ់ “ទាំងស្រុងនិងទូទៅ” រវាង អ៊ីរ៉ង់ និង អ៊ីស្រាអែលរួចរាល់អស់ហើយ។ បទឈប់បាញ់នេះ ចូលជាធរមានព្រឹកថ្ងៃអង្គារទី ២៤មិថុនា ចាប់ពី ម៉ោង ៤ទៀបភ្លឺ ម៉ោងសកល ។ ដំណាក់កាលទី ១ មានរយៈពេល ១២ម៉ោង អ៊ីរ៉ង់ត្រូវតែ ឈប់បាញ់ គ្រាប់មកលើអ៊ីស្រាអែល ហើយបន្ទាប់មកទៀតដំណាក់ កាលទី ២ ១២ម៉ោងដែរ គឺភាគីអ៊ីស្រាអែលត្រូវតែ ឈប់វាយប្រហារទៅលើអ៊ីរ៉ង់ ។ លោកដូណាល់ ត្រាំ បន្ថែមទៀតថា បើភាគីទាំង២គោរព បាន ក្នុង រយៈពេល ២៤នេះហើយ នោះបទឈប់បាញ់នឹងចូលជាធរមានជាស្ថាពរទាំងស្រុង ហើយសង្គ្រាម រយៈពេល ១២ថ្ងៃនេះ នឹងត្រូវបិទបញ្ចប់ទាំងស្រុង ។

ព្រឹកថ្ងៃអង្គារ ម៉ោង ៦និង ៣០នាទីព្រឹក រដ្ឋាភិបាលអ៊ីស្រាអែលបានប្រកាសថា គេបានយល់ព្រមទទួលយកបទឈប់បាញ់ ដែល លោក ផ្តួចផ្តើម ឡើងដោយ លោក ដូណាល់ ត្រាំ។ អ៊ីស្រាអែល បានឆ្លៀត អរគុណ លោក ដូណាល់ ត្រាំ ថែមទៀត ដែលបាន ជួយ គាំទ្រអ៊ីស្រាអែលនៅក្នុងប្រតិបត្តិការ ដែលអ៊ីស្រាអែលចាត់ទុកថាមានសារៈសំខាន់ ស្មើអាយុជីវិតរបស់ប្រទេសអ៊ីស្រាអែល ។ អ៊ីស្រាអែល បាន អះអាងទៀតថា គេបានសម្រេចបានជោគ ជ័យទាំងស្រុង ទៅតាម កម្មវត្ថុដែល បានកំណត់ទុក គឺបានកម្ទេច ទាំងស្រុងនូវ សមត្ថភាពផលិតអាវុធរបស់អ៊ីរ៉ង់ ទាំងអាវុធនុយក្លេអ៊ែរ ទាំងមីស៊ីល បាលីស្ទិក ។

គិតត្រឹមម៉ោង ៨ និង ១៥នាទីព្រឹក ម៉ោងសកល សាធារណរដ្ឋអ៊ីស្លាម អ៊ីរ៉ង់ នៅទាន់ បានប្រកាស ទទួល ឬមិនទទួលយល់ព្រម យកបទឈប់បាញ់ដែលលោកដូណាល់ ត្រាំប្រកាសនោះទេ។ តែ ក្រុមប្រឹក្សាសន្តិសុខជាតិអ៊ីរ៉ង់ បាន ចេញ លិខិតប្រកាសមួយ អះអាងថា “អ៊ីរ៉ង់បានបង្ហាញភាពអង់អាចក្លាហាន បង្ខំឲ្យអ៊ីស្រាអែលសុខចិត្តទម្លាក់អាវុធ ជាឯកត្តោភាគី។ លិខិត របស់អ៊ីរ៉ង់នេះ អះអាងទៀតថា អ៊ីរ៉ង់នៅតែ រក្សាម្រៀមដៃ ត្រៀមទុកលើកៃកាំភ្លើងជានិច្ច ដើម្បី ត្រៀម បាញ់កម្ទេចសត្រូវ ព្រោះថាអ៊ីរ៉ង់ មិនទុកចិត្តសត្រូវជាដាច់ខាត ”។ ចំណែក លោកប្រមុខការទូតអ៊ីរ៉ង់ Abbas Araghchi បានបញ្ជាក់ថា គិតត្រឹម ដំណាក់ កាល នេះ គឺ មិនមាន កិច្ចព្រមព្រៀងបទឈប់បាញ់ជាផ្លូវការអ្វីទាំងអស់។ ក៏ប៉ុន្តែលោក បាន អះអាងថា អ៊ីរ៉ង់ គ្មានចេតនា បន្ត ការវាយប្រហារ ទេ ប្រសិន បើអ៊ីស្រាអែល ឈប់វាយ ប្រហារ មកលើអ៊ីរ៉ង់។

សូមបញ្ជាក់ ថា យប់ថ្ងៃ ចន្ទ មុន លោកដូណាល់ ត្រាំ ប្រកាសបទឈប់បាញ់ អ៊ីស្រាអែល បាន បាញ់ មីស៊ីល យ៉ាងច្រើនសន្ធឹក ទៅលើទីក្រុងតេអេរ៉ង់ ដោយបានសំដៅកម្ទេច ទីបញ្ជាការដ្ឋាន កងឆ្មាំបដិវត្តអ៊ីរ៉ង់ និងមន្ទីរឃុំឃាំង Evine ដែលសំបូរទៅដោយអ្នកទោសនយោបាយនៃរបបផ្តាច់ការអ៊ីស្លាមអ៊ីរ៉ង់។ ហើយ ប៉ុន្មានម៉ោង ក្រោយ ការចូលជាធរមាន នៃ បទឈប់បាញ់ អ៊ីស្រាអែល បានអះអាងថា អ៊ីរ៉ង់ បានបាញ់ មីស៊ីល សំដៅ មកលើខ្លួន ។ លោក Israël Katz រដ្ឋមន្ត្រីការពារជាតិអ៊ីស្រាអែល បានចេញលិខិតប្រកាសភ្លាមៗ ថាអ៊ីស្រាអែលនឹងវាយ សងសឹកវិញទៅលើអ៊ីរ៉ង់ ចំពោះការបំពានបទឈប់បាញ់ ។ តែ ទូរទស្សន៍ជាតិ អ៊ីរ៉ង់ បាន ផ្សាយ ឆ្លើយតបមកវិញភ្លាមដែរថា កងទ័ពអ៊ីរ៉ង់ បានបដិសេធថា អ៊ីរ៉ង់ មិនបាន បាញ់ មីស៊ីល ទៅលើអ៊ីស្រាអែលឡើយ នាប៉ុន្មានម៉ោងចុងក្រោយ នេះ។

គួរកត់សំគាល់ថា បើទោះបី អ៊ីរ៉ង់ មិនបញ្ជាក់ថាបានយល់ព្រម ទទួលយកបទឈប់បាញ់ តែធាតុពិតគឺអ៊ីរ៉ង់ សុខចិត្ត ឈប់ប្រយុទ្ធហើយនាពេលនេះ។ គ្រាន់តែរបបសាធារណៈរដ្ឋអ៊ីស្លាម អ៊ីរ៉ង់ មិនចង់ បញ្ជាក់ដោយត្រង់ៗ ដើម្បីកុំឲ្យបាក់មុខតែប៉ុណ្ណោះ។ តាមការប៉ាន់ស្មាន អ៊ីរ៉ង់ បានសុខចិត្តចរចាដោយស្ងាត់ៗជាមួយ អាមេរិក ដើម្បី បិទបញ្ចប់សង្គ្រាមនេះ ។ ជាក់ស្តែង កាលពីយប់ ថ្ងៃចន្ទ អ៊ីរ៉ង់បានបាញ់មីស៊ីល សំដៅទៅលើ មូលដ្ឋានទ័ពអាមេរិកនៅកាតា ពិតមែន តែវាគ្រាន់តែជាការបង្ហាញ កម្លាំង ដើម្បី កុំ ឲ្យ បាក់មុខ បន្ទាប់ពី អាមេរិកបាន ទម្លាក់គ្រាប់បែកលើស្ថានីយ៍នុយក្លេអ៊ែរ ៣ទីតាំង របស់អ៊ីរ៉ង់តែប៉ុណ្ណោះ ។ ធាតុពិតទៅ មុននឹងបាញ់ មីស៊ីលទៅលើមូលដ្ឋានទ័ពអាមេរិក អ៊ីរ៉ង់បានជូនដំណឹង ប្រាប់ទៅអាមេរិក ឲ្យដឹងមុន ហើយ មីស៊ីលនោះទៀតសោតត្រូវបាន កាតា ស្ទាក់កំទេចបានយ៉ាងងាយ និង មិនមានបណ្តាល ឲ្យ ខូចខាតឬស្លាប់ទាហាន អាមេរិក អាមេរិកឡើយ ។ យ៉ាងណាមិញ លោកដូណាល់ ត្រាំ ក៏បានបង្ហោះសារអរគុណអ៊ីរ៉ង់ដែលបានជូនដំណឹង មុនយ៉ាងល្អបែបនេះ ។

Nº.0805