អ្នកកាសែតអន្តរជាតិ ជាង១០០ស្ថាប័ន ស្នើលោក ត្រាំ កុំឲ្យរឹតត្បិតទិដ្ឋាការ
ចេញផ្សាយនៅថ្ងៃទី១២ ខែកញ្ញា ឆ្នាំ២០២៥៖
អ្នកសារព័ត៌មានអន្តរជាតិ មកពីប្រទេសជាច្រើន រួមទាំងអង្គការអ្នកកាសែតគ្មានព្រំដែន បានស្នើសុំឲ្យរដ្ឋាភិអ្នកកាសែតអន្តរជាតិ ជាង១០០ស្ថាប័ន ស្នើលោក ត្រាំ កុំឲ្យរឹតត្បិតទិដ្ឋាការបាលអាមេរិករបស់លោក ដូណាល់ ត្រាំ យោគយល់ និងបន្ធូរបន្ថយលក្ខខណ្ឌរឹតត្បិតទិដ្ឋាការសម្រាប់អ្នកសារព័ត៌មានបរទេស។ ក្រុមអ្នកកាសែតអន្តរជាតិ ពន្យល់ថា ការរឹតត្បិត ទិដ្ឋាការនេះ នាំឲ្យប៉ះពាល់ដល់គុណភាពព័ត៌មាន និងបរិមាណសេចក្តីរាយការណ៍ព័ត៌មានប្រចាំថ្ងៃ ពីសហរដ្ឋអាមេរិក។
ការរឹតត្បិតលក្ខខណ្ឌផ្តល់ទិដ្ឋាការដល់អ្នកសារព័ត៌មានបរទេស ពីសំណាក់រដ្ឋាភិបាលបាលទីក្រុងវ៉ាស៊ីនតោន នាំឲ្យប៉ះពាល់ដល់គុណភាពព័ត៌មាន និងបរិមាណសេចក្តីរាយការណ៍ព័ត៌មានប្រចាំថ្ងៃ ពីសហរដ្ឋអាមេរិក។ នេះបើតាមការពន្យល់របស់ ក្រុមហ៊ុនសារព័ត៌មាន និងក្លិបអ្នកកាសែតអន្តរជាតិ ជាង១០០ស្ថាប័ន ដោយបញ្ជាក់ទៀតថា ជំនួសឲ្យការចង់ពង្រឹងកិត្តិយសនិងការពារផលប្រយោជន៍អាមេរិក វិធានការបន្តឹងទិដ្ឋាការបែរជាប៉ះពាល់ទៅដល់ជំហរ និងមុខមាត់សហរដ្ឋអាមេរិក នៅលើឆាកអន្តរជាតិ ទៅវិញទេ។
ទាំងនេះ ជាខ្លឹមសារនៃលិខិតចំហរបស់អ្នកកាសែតអន្តរជាតិ ផ្ញើទៅរដ្ឋាភិបាលក្រុងវ៉ាស៊ីតោន ចុះថ្ងៃទី១១កញ្ញា។ លិខិតនេះធ្វើឡើងក្រោយពីសហរដ្ឋអាមេរិកបានរឹតបន្តឹងការស្នាក់នៅលើទឹកដីអាមេរិក ចំពោះនិស្សិតនិងអ្នកសារព័ត៌មានបរទេស។ ការរឹតត្បិតទិដ្ឋាការ អនុលោមទៅតាមនយោបាយអន្តោប្រវេសន៍របស់លោក ដូណាល់ ត្រាំ ដែលបានបន្ថយចំនួនស្នាក់នៅសម្រាប់អ្នកកាសែតអន្តរជាតិ និងអ្នកឆ្លើយឆ្លងព័ត៌មានបរទេស ពី ៥ ឆ្នាំ មកត្រឹមតែ ២៤០ ថ្ងៃ។ ចំពោះអ្នកកាសែតជនជាតិចិន ទិដ្ឋាការរបស់ពួកគេ មានកំណត់ឲ្យតិចជាង ៩០ ថ្ងៃ។
ការបន្ថយចំនួនពេលវេលាស្នាក់នៅស្របច្បាប់សម្រាប់អ្នកកាសែតបរទេសនេះ ជះឥទ្ធិពលទៅដល់ស្ថិរភាពរបស់អ្នកសារព័ត៌មានបរទេស និងគ្រួសាររបស់ពួកគេ ព្រមទាំងធ្វើគុណភាពសេចក្តីរាយការណ៍ ក៏ថយចុះដែរ ហើយវានឹងបន្ថយការយល់ដឹងអំពីសហរដ្ឋអាមេរិក។ នេះបើតាមលិខិតចំហរបស់ស្ថាប័នព័ត៌មានអន្តរជាតិ រួមមាន ទីភ្នាក់ងារព័ត៌មាន Associated Press បណ្តាញផ្សព្វផ្សាយអង់គ្លេស BBC, Reuters, អាល្លឺម៉ង់ ZDF, អូស្ត្រាលី ABC រួមទាំង ប្រព័ន្ធផ្សព្វផ្សាយទូរទស្សន៍ជាតិនិងវិទ្យុជាតិ នានា។
ក្រៅពីអនឡាញ វិទ្យុនិងទូរទស្សន៍អន្តរជាតិ នៅមានកាសែត កាណាដា The Globe and Mail និងកាសែតអៀរឡង់ The Irish Times ព្រមទាំង អង្គការការពារសិទ្ធិអ្នកកាសែត ដូចជា សហព័ន្ធអ្នកសារព័ត៌មានអន្តរជាតិ FIJ អង្គការអ្នកកាសែតគ្មានព្រំដែន RSF និងសមាគមអ្នកកាសែតកូរ៉េខាងត្បូង ។ល។
ទាក់ទងនឹងសារព័ត៌មានអន្តរជាតិនេះដែរ អង្គការស្រាវជ្រាវអំពីប្រជាធិបតេយ្យនិងការបោះឆ្នោត IDEA (International Institute for Democracy and Electoral Assistance) នៅក្រុងស្តុកខុម ប្រទេសស៊ុយអែត បានចេញរបាយការណ៍ ថ្ងៃទី១១កញ្ញា ដោយបញ្ជាក់ថា សេរីភាពសារព័ត៌មាននៅលើពិភពលោក ធ្លាក់ចុះខ្លាំង មិនដែលធ្លាប់ជួបប្រទះ ក្នុងរយៈពេលកន្លះសតវត្សរ៍មកនេះ។ អ្នកស្រាវជ្រាវ Kevin Casas-Zamora អគ្គលេខាធិការនៃមណ្ឌលស្រាវជ្រាវស៊ុយអែត International IDEA បានបញ្ជាក់ថា ផ្អែកលើទិន្នន័យតាមដានសង្កេត ចន្លោះឆ្នាំ២០១៩ ដល់ឆ្នាំ២០២៤ លទ្ធិប្រជាធិបតេយ្យក្នុងបណ្តាប្រទេស ជាងពាក់កណ្តាលពិភពលោក បានស្រុតចុះ ហើយលំហសេរីភាពសារព័ត៌មានក៏រួមតូច។
Nº.1002
