ខេត្តចំនួនបី កំពុងរងផល់ប៉ះពាល់ដោយសារជំនន់ទឹកភ្លៀង
ចេញផ្សាយនៅថ្ងៃទី២ ខែសីហាឆ្នាំ២០២៥
(ភ្នំពេញ)៖ ចាប់ពីថ្ងៃទី២៩ ខែសីហាដល់ថ្ងៃទី១ ខែកញ្ញា ឆ្នាំ២០២៥បន្ទាប់ពីភ្លៀងធ្លាក់ជាប់ៗគ្នាបណ្តាលឱ្យមានជំនន់ទឹកភ្លៀង បង្កផលប៉ះពាល់ដល់ខេត្តចំនួនបី និងប៉ះពាល់ប្រជាពលរដ្ឋចំនួនជិត ៧០០គ្រួសារ ព្រមទាំងប៉ះពាល់ផលដំណាំកសិកម្មជិត ២០០ហិកតា។
លោក សុទ្ធ គឹមកុលមុនី អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយបានប្រាប់បណ្ដាញព័ត៌មានកាលពីព្រឹកថ្ងៃទី២ ខែកញ្ញាថា ភ្លៀងធ្លាក់ជាប់គ្នាចាប់ពីថ្ងៃទី២៩ ខែសីហាដល់ថ្ងៃទី១ ខែកញ្ញាមកបង្កឱ្យកើតជំនន់ទឹកភ្លៀងបង្កផលប៉ះពាល់ខេត្តចំនួនបី ,ប៉ះពាល់ប្រជាពលរដ្ឋចំនួនជិត៧០០គ្រួសារ។ក្នុងនេះ៖ ទី១.ខេត្តបាត់ដំបង ប៉ះពាល់ស្រុកចំនួនមួយ គឺស្រុកសំឡូត ស្មើនឹងបួនឃុំ , ប៉ះពាល់ចំនួន ២៦គ្រួសារ និងប៉ះពាល់ដំណាំរួមផ្សំចំនួន ១៨.៥ ហិកតា។ទី២. ខេត្តសៀមរាប ប៉ះពាល់ស្រុកចំនួនបួន ស្មើនឹង១៣ឃុំ ,ប៉ះពាល់ ៤១៥ គ្រួសារនិង ប៉ះពាល់ផ្ទះ ៤១៥ខ្នង។ ចំណែកខេត្តទី៣ ជាខេត្តជាប់ដងទន្លេមេគង្គ គឺខេត្តក្រចេះ ប៉ះពាល់ពីរស្រុក ស្មើនឹង២ឃុំ, ប៉ះពាល់ប្រជាពលរដ្ឋ២២៤គ្រួសារនិង ប៉ះពាល់ដំណាំកសិកម្មចំនួន ១៦៩ហិកតា។
នៅខេត្ដបាត់ដំបងលើបណ្ដាញសង្គមហ្វេសប៊ុកកាលពីព្រឹកថ្ងៃទី២ ខែកញ្ញា លោក សុខ លូ អភិបាលខេត្ដបាត់ដំបង បានបញ្ជាក់ថា កម្ពស់ទឹកស្ទឹងសង្កែក្នុងក្រុងបាត់ដំបងដល់កម្រិតប្រុងប្រយ័ត្ន តែនឹងស្រកចុះវិញឆាប់ៗនេះបើផ្នែកខាងលើមិនមានភ្លៀងបន្ថែម។សូមប្រជាពលរដ្ឋនៅតាមដងស្ទឹង ពិសេសស្រុកឯកភ្នំប្រុងប្រយ័ត្នខ្ពស់។
Nº.0974
