រញ្ជួយដីនៅអាហ្វហ្កានីស្ថាន ស្លាប់ជាង៨០០នាក់ របួសយ៉ាងហោចជិត៣០០០នាក់
ចេញផ្សាយនៅថ្ងៃទី២ ខែកញ្ញា ឆ្នាំ២០២៥៖
គ្រោះរញ្ជួយដីកម្រិត ៦នៃមាត្រដ្ឋានរិចទែរ បានកើតឡើងនៅភាគខាងកើតប្រទេសអាហ្វហ្កានីស្ថាន កាលពីយប់ថ្ងៃអាទិត្យឈានចូលថ្ងៃចន្ទ ទី១កញ្ញានេះ។ យោងតាមព័ត៌មានបឋម ពីអាជ្ញាធរតាលីបង់ មានមនុស្សស្លាប់យ៉ាងហោច ៨០០នាក់ និងរបួសយ៉ាងហោចជិត៣០០០នាក់។
យប់ថ្ងៃអាទិត្យ ទី៣១សីហា គ្រោះរញ្ជួយដីកម្រិត ៦នៃមាត្រដ្ឋានរិចទែរ បន្តដោយការរំញោចផ្ទួនៗគ្នាដល់ទៅ៥ដង បានកើតឡើងនៅខេត្ត Kounar និង Nangarhar ភាគខាងកើតអាហ្វហ្កានីស្ថាន មិនឆ្ងាយប៉ុន្មានពីព្រំដែនជាមួយប៉ាគីស្ថាន។ ចំណុចកណ្តាលនៃគ្រោះរញ្ជួយដីនេះ មានជម្រៅប្រមាណតែ៧គីឡូម៉ែត្រក្នុងដី ស្ថិតនៅចម្ងាយប្រមាណតែ២៧គីឡូម៉ែត្រប៉ុណ្ណោះ ពីទីក្រុងចាឡាឡាបាត។
យោងតាមតួលេខបឋមផ្តល់ឲ្យដោយអាជ្ញាធរតាលីបង់ គិតត្រឹមរសៀលថ្ងៃចន្ទទី១កញ្ញា ចំនួនមនុស្សស្លាប់មានប្រមាណ ៨០០នាក់ និងមានមនុស្សរបួសយ៉ាងហោច២៨០០នាក់។ ចំនួនមនុស្សស្លាប់និងរបួស នឹងកើនឡើងលើសនេះទៀត ខណៈក្រុមសង្គ្រោះកំពុងស្វះស្វែងរកអ្នកបាត់ខ្លួន។ ក្នុងរូបភាពវីដេអូ បង្ហាញឲ្យឃើញផ្ទះសំបែងប្រជាជនបាក់រលំ ដែលភាគច្រើនសង់ពីឈើនិងដី ដ៏ផុយស្រួយជាទីបំផុត។ តំបន់រងគ្រោះដែលជាតំបន់ភ្នំដាច់ស្រយាល មិនសូវមានផ្លូវថ្នល់ អាជ្ញាធរតាលីបង់បានប្រើឧទ្ថម្ភាគចក្រដើម្បីដឹកអ្នករបួស និងជម្លៀសមនុស្ស ដែលជាកត្តាមួយបង្កការយឺតយ៉ាវបន្ថែមទៀត ដល់ប្រតិបត្តិការសង្គ្រោះ។
គួរបញ្ជាក់ថា អាហ្វហ្កានីស្ថាន មានទីតាំងស្ថិតនៅក្បែរចំណុចប្រសព្វ រវាងស្រទាប់ទ្វីបអឺរ៉ាស៊ី និងស្រទាប់ឧបទ្វីបឥណ្ឌា ដែលធ្វើឲ្យប្រឈមនឹងគ្រោះរញ្ជួយដី។ បូកបន្ថែមនឹងហេដ្ឋារចនាសម្ព័ន្ធមិនរឹងមាំ ឆ្លើយតបទៅនឹងស្តង់ដាររញ្ជួយដីទៀតនោះ បានធ្វើមានមនុស្សស្លាប់ច្រើននាក់នៅក្នុងពេលមានករណីរញ្ជួយដីម្តងៗ។ កាលពីខែតុលាឆ្នាំ២០២៣ គ្រោះរញ្ជួយដីកម្រិត ៦,៣រិចទែរ នៅតំបន់ Hérat ភាគខាងលិចប្រទេសក្បែរព្រំដែនអ៊ីរ៉ង់ បានផ្តាច់ជីវិតមនុស្សជាង១៥០០នាក់ និងបានកម្ទេចផ្ទះសំបែងប្រមាណ៦៣០០០ខ្នង។
សូមបញ្ជាក់ដែរថា បន្ទាប់ពីក្រុមអ៊ីស្លាមជ្រុលនិយម តាលីបង់ បានត្រលប់មកកាន់អំណាចនៅអាហ្វហ្កានីស្ថាន អង្គការក្រៅរដ្ឋាភិបាល និងស្ថាប័នមនុស្សធម៌អន្តរជាតិ បានដកខ្លួនចេញជាបន្តបន្ទាប់។ បេសកកម្មអង្គការសហប្រជាជាតិប្រចាំអាហ្វហ្កានីស្ថាន បានបង្ហាញការព្រួយបារម្ភជាខ្លាំង ខណៈតម្រូវជំនួយមនុស្សធម៌កាន់តែអាសន្នឡើង ក្រោយគ្រោះរញ្ជួយដីនេះ។ មុននឹងរងគ្រោះរញ្ជួយដី ខេត្ត Nangarhar បានរងគ្រោះដោយគ្រោះទឹកជំនន់រួចទៅហើយ កាលពីសប្តាហ៍កន្លងទៅ។ គ្រោះទឹកជំនន់ ដែលបានផ្តាច់ជីវិតមនុស្ស៥នាក់ បំផ្លាញផ្ទះសំបែង និងដំណាំកសិផលយ៉ាងសន្ធឹកសន្ធាប់។ ផ្អែកតាមធនាគារពិភពលោក ក្នុងចំណោមប្រជាជនអាហ្វហ្កានីស្ថានចំនួន៤៥លាននាក់ មានពាក់កណ្តាលរស់នៅក្រោមបន្ទាត់នៃភាពក្រីក្រ៕
Nº.0975
