តុលាការបារាំងចេញដីកាចាប់ខ្លួនអតីតប្រធានាធិបតីស៊ីរី
ចេញផ្សាយនៅថ្ងៃទី៣ ខែកញ្ញា ឆ្នាំ២០២៥៖
រត់គេចខ្លួន ចាកចេញពីប្រទេស បន្ទាប់ពីត្រូវក្រុមប្រឆាំងផ្តួលរំលំអំណាចកាលពីខែធ្នូចុងឆ្នាំមុន អតីតប្រធានាធិបតីស៊ីរី លោកបាស្ហា អាល់អាសាដត្រូវមកជាប់សំណាញ់ច្បាប់បារាំង នៅក្នុងសំណុំរឿងសម្លាប់អ្នកកាសែតបរទេសពីរនាក់ កាលពីឆ្នាំ ២០១២។ នៅថ្ងៃអង្គារទី ២កញ្ញា សហព័ន្ធអន្តរជាតិផ្នែកសិទ្ធិមនុស្ស នៅទីក្រុងប៉ារីសបានចេញសេចក្តីប្រកាសព័ត៌មានមួយដែលបញ្ជាក់ថា តុលាការបារាំងបានចេញដីកាតាមចាប់ខ្លួន អតីតប្រធានាធិបតីស៊ីរី និងបក្សពួកចំនួន៦នាក់។
តុលាការបារាំងបានចេញកាលពីពាក់កណ្តាលខែសីហាកន្លងទៅ ដីកាចាប់ខ្លួនអតីតមេដឹកនាំប្រទេសស៊ីរី ចំនួន៧នាក់ ក្នុងនោះ មានអតីតប្រធានាធិបតីលោកបាស្ហា អាល់អាសាដ ដែលពេលនេះកំពុងរត់គេចខ្លួនទៅជ្រកកោននៅប្រទេសសម្ព័ន្ធមិត្តរុស្ស៊ី។
យោងតាមមេធាវីរបស់អង្គការសហព័ន្ធអន្តរជាតិផ្នែកសិទ្ធិមនុស្ស ហៅកាត់ជាភាសាបារាំងថា FIDH តុលាការបារាំងចេញដីកាចាប់ខ្លួនអតីតប្រធានាធិបតីស៊ីរី ក្នុងសំណុំរឿងសម្លាប់អ្នកកាសែតអាមេរិកម្នាក់ និងអ្នកថតរូបបារាំងម្នាក់នៅទីក្រុងHoms កាលពី១៣ឆ្នាំមុន។
នៅថ្ងៃទី ២២ខែកុម្ភៈ ឆ្នាំ ២០១២ នៅពេលដែលចលនាបះបោរប្រឆាំងរដ្ឋាភិបាលផ្ទុះរាលដាលកាន់តែខ្លាំងនៅប្រទេសស៊ីរី លោកស្រីMarie Colvin ជនជាតិអាមេរិកដែលជាប់ឈ្មោះជាអ្នកកាសែតសង្រ្គាម និងធ្វើការឲ្យកាសែតអង់គ្លេសThe Sunday Times បានព្យាយាមចូលទៅយកព័ត៌មាននៅទីក្រុងHoms ជាទីដែលក្រុមបាតុករប្រឆាំងរដ្ឋាភិបាលរងការបង្រ្កាបដ៏ហិង្សាពីសំណាក់អាជ្ញាធរ។ លោកស្រី Marie Colvin បានរត់ចូលក្នុងមណ្ឌលព័ត៌មានជាមួយអ្នកកាសែតបរទេសផ្សេងទៀត ដើម្បីគេចពីគ្រាប់កាំភ្លើងរបស់ទាហានរដ្ឋាភិបាល។ ប៉ុន្តែ ដោយសារមណ្ឌលរងគ្រាប់ខ្លាំងពេក លោកស្រីបានរត់ចេញពីអគារមុនគេ ជាមួយអ្នកថតរូបបារាំង គឺលោក Rémi Ochlik មុននឹងត្រូវគ្រាប់ប្លោងផ្តាច់យកសង្ខាររបស់អ្នកទាំងពីរ។ មនុស្ស៣នាក់ទៀត គឺអ្នកកាសែតបារាំង អ្នកថតរូបអង់គ្លេស អ្នកបកប្រែស៊ីរីបានរងរបួសធ្ងន់។
បើតាមសេចក្តីប្រកាសព័ត៌មានរបស់អង្គការការពារសិទ្ធិមនុស្សFIDH នៅក្រោយហេតុការណ៍នេះភ្លាម រដ្ឋអាជ្ញានៅទីក្រុងប៉ារីសបានបើកការស៊ើបអង្កេតលើការឃាតកម្មលើជនជាតិបារាំង។ នៅឆ្នាំ ២០១៤ ការស៊ើបអង្កេតក្នុងសំណុំរឿងឃាតកម្មត្រូវបានពង្រីកទៅជារឿងឧក្រិដ្ឋកម្មសង្រ្គាម មុននឹងវិវឌ្ឍទៅជាបទល្មើសប្រព្រឹត្តឧក្រិដ្ឋកម្មប្រឆាំងមនុស្សជាតិនៅឆ្នាំ ២០២៤។
បន្ទាប់ពីស៊ើបអង្កេតអស់១៣ឆ្នាំ ចៅក្រមស៊ើបអង្កេតផ្នែកឧក្រិដ្ឋកម្មប្រឆាំងមនុស្សជាតិនៅតុលាការក្រុងប៉ារីសបានសម្រេចចេញដីកាចាប់ខ្លួន អតីតប្រធានាធិបតីស៊ីរី គឺលោកបាស្ហា អាល់អាសាដ និងបក្សពួក៦នាក់ផ្សេងទៀត ដែលពាក់ព័ន្ធនឹងការបំប្លោងគ្រាប់សម្លាប់អ្នកកាសែត។ ក្នុងចំណោមអ្នកទាំងនោះ មានប្អូនប្រុសរបស់អតីតប្រធានាធិបតីស៊ីរី គឺ លោក Maher al Assad ដែលជាប្រធានអង្គភាពក្រុមរថពាសដែក និងប្រធានសន្តិសុខផ្ទៃក្នុង រួមទាំងប្រធានអង្គភាពទ័ពស៊ីរីនៅទីក្រុងHoms។
គេមិនច្បាស់ថា ដីការបស់តុលាការបារាំងនឹងអាចមានប្រសិទ្ធភាពចាប់អូសក ជនល្មើសមកកាត់ទោសដែរឬយ៉ាងណានោះទេ។ អតីតប្រធានាធិបតីស៊ីរី លោកបាស្ហា អាល់អាសាដបានរត់ទៅម៉ូស្គូ និងបានទទួលសិទ្ធិជ្រកកោនពីរុស្ស៊ីដែលជាសម្ព័ន្ធមិត្ត ខណៈប្អូនប្រុស និងមេយោធាផ្សេងទៀត រត់គេចខ្លួនបាត់ស្រមោល នៅបន្ទាប់ពីរបបបាស្ហា អាល់អាសាដដួលរលំនៅចុងឆ្នាំ២០២៤ ដោយសារការវាយប្រហាររបស់ក្រុមឧទ្ទាមប្រឆាំង។
Nº.0978
