ប្រលងបាក់ឌុប៖ ក្រសួងអប់រំ នឹងបិទផ្សាយឈ្មោះបេក្ខជន លេខតុ លេខបន្ទប់ និងបទប្បញ្ញត្តិផ្សេងៗនៅថ្ងៃទី២៧សីហា
ចេញផ្សាយនៅថ្ងៃទី១៤ ខែសីហា ឆ្នាំ២០២៥
អ្នកនាំពាក្យក្រសួងអប់រំយុវជន និងកីឡា បានធ្វើការអំពាវនាវដល់បេក្ខជនភៀសសឹកមកពីខេត្តព្រះវិហារ និងឧត្តរមានជ័យរួសរាន់ចុះឈ្មោះដាក់ពាក្យប្រឡងសញ្ញាបត្រមធ្យមសិក្សាទុតិយភូមិឱ្យបានមុនថ្ងៃទី១៥សីហា ដើម្បីឱ្យក្រសួងអាចរៀបចំជាបញ្ជីរាយនាមបេក្ខជន និងសលាកបត្រឯកត្តជន និងបន្តនីតិវិធីនៃដំណើការប្រឡងជាបន្តទៀត ខណៈការប្រឡងនឹងឈានចូលមកដល់នៅចុងខែសីហាខាងមុខនេះ។
ក្រសួងអប់រំយុវជន និងកីឡា នឹងបិទផ្សព្វផ្សាយបញ្ជីឈ្មោះបេក្ខជន លេខតុ លេខបន្ទប់ និងបទប្បញ្ញត្តិផ្សេងៗទាក់ទងនឹងការប្រឡងសញ្ញាបត្រមធ្យមសិក្សាទុតិយភូមិ ឬបាក់ឌុប នៅតាមមណ្ឌលប្រឡងនានានៅថ្ងៃទី២៧ ខែសីហាឆ្នាំ២០២៥ វេលាម៉ោង៩ព្រឹក។
លោកស្រី ឃួន វិច្ឆិកា អ្នកនាំពាក្យក្រសួងអប់រំយុវជន និងកីឡា បានមានប្រសាសន៍នៅថ្ងៃទី១៣សីហា ក្រើនរំលឹកដល់បេក្ខជនភៀសសឹកមកពីខេត្តព្រះវិហារ និងឧត្តរមានជ័យ ដែលមានបំណងទៅចូលរួមប្រឡងនៅខេត្តដទៃទៀតក្រៅពីខេត្តរបស់ខ្លួន ត្រូវចុះឈ្មោះឱ្យបានមុនថ្ងៃទី១៥សីហា។ ក្នុងករណីថ្ងៃទី១៥សីហាគាត់អត់បានដាក់ពាក្យទេបេក្ខជនខេត្តព្រះវិហារអាចប្រឡងនៅទីរួមខេត្តធម្មតា។ ចំណែកបេក្ខជននៅខេត្តឧត្តរមានជ័យក្រសួងនឹងលើកមកប្រឡងនៅក្នុងស្រុកពួកខេត្តសៀមរាបវិញដោយក្រសួងនឹងបង្កើតក្រុមការងារ ដើម្បីគាំទ្រលើការដឹកជញ្ជូនបេក្ខជន ផ្តល់ថវិកាសម្រាប់ការហូបចុក ការស្នាក់នៅ និងរៀបចំយន្តការផ្សេងទៀត តាមការចាំបាច់។
ទន្ទឹមនឹងនេះក្រសួងអប់រំយុវជន និងកីឡា ក៏បានណែនាំឱ្យមន្ទីរអប់រំ យុវជន និងកីឡារាជធានី ខេត្តចំនួន ២៣លើកលែងតែខេត្តឧត្តរមានជ័យ និងខេត្តព្រះវិហារ ត្រូវចាត់ចែងទទួលពាក្យសុំចុះឈ្មោះប្រឡង និងទទួលបូកសរុបព័ត៌មានដែលទទួលបានពីបេក្ខជនភៀសខ្លួន ពីខេត្តទាំងព្រះវិហារ និងឧត្តរមានជ័យ រួចហើយរៀបចំជាបញ្ជីឈ្មោះបេក្ខជនភៀសខ្លួន ដែលបានដាក់ពាក្យប្រឡង ព្រមទាំងបញ្ជូនមកក្រសួងនៅត្រឹមថ្ងៃទី១៥ ខែសីហា ឆ្នាំ២០២៥ ដើម្បីក្រសួងអាចបូកសរុប និងរៀបចំជាបញ្ជីរាយនាមបេក្ខជន និងសលាកបត្រឯកត្តជន និងបន្តនីតិវិធីនៃដំណើការប្រឡងជាបន្តទៀត។
Nº.0929
