លោក ដូណាល់ ត្រាំ ទុកពេលឲ្យរុស្ស៊ី១២ថ្ងៃ បិទបញ្ចប់សង្គ្រាមជាមួយអ៊ុយក្រែន

លោក ដូណាល់ ត្រាំ ទុកពេលឲ្យរុស្ស៊ី១២ថ្ងៃ បិទបញ្ចប់សង្គ្រាមជាមួយអ៊ុយក្រែន

ចេញផ្សាយនៅថ្ងៃទី៣០ ខែកក្កដា ឆ្នាំ២០២៥៖

ប្រធានាធិបតីសហរដ្ឋអាមេរិក លោក ដូណាល់ ត្រាំ បានរន្ថើនឲ្យថ្នាក់ដឹកនាំរុស្ស៊ីបញ្ចប់សង្គ្រាមនៅអ៊ុយក្រែន ដោយកាត់បន្ថយថ្ងៃឱសានវាទ។ ពីប្រទេសអង់គ្លេស ចៅហ្វាយសេតវិមានបានកំណត់ពេលត្រឹមតែពី ១០ ទៅ១២ថ្ងៃប៉ុណ្ណោះ ដើម្បីឲ្យចៅហ្វាយវិមានក្រេមឡាំង ពន្លត់ភ្លើងសង្គ្រាមឈ្លានពានអ៊ុយក្រែន។ បើពុំដូច្នោះទេ វ៉ាស៊ីនតោននឹងដាក់ទណ្ឌកម្មធ្ងន់ចំពោះម៉ូស្គូ។

ជាបឋម គួររម្លឹកថា កាលពីថ្ងៃទី១៤កក្កដា កន្លងទៅ ប្រធានាធិបតីសហរដ្ឋអាមេរិក លោក ដូណាល់ ត្រាំ បានប្រកាសកម្រិតឱសានវាទត្រឹមតែ ៥០ ថ្ងៃឲ្យប្រមុខរដ្ឋរុស្ស៊ី លោក វ្ល៉ាឌីមៀរ ពូទីន បញ្ចប់ភ្លើងសង្គ្រាមនៅអ៊ុយក្រែន។ តែការកំណត់រយៈពេល៥០ថ្ងៃនៅមិនទាន់បានពាក់កណ្តាលពេលស្រួលបួលផង លោក ដូណាល់ ត្រាំ បានប្តូរចិត្ត ដោយបង្ខិតរយៈពេលឲ្យខ្លី ត្រឹមតែពី ១០ទៅ១២ថ្ងៃវិញ។ «ឱសានវាទថ្មីពី ១០ ទៅ ១២ថ្ងៃត្រូវចាប់ផ្តើមរាប់ពីថ្ងៃចន្ទ ទី២៨កក្កដាទៅ ដោយគ្មានអ្វីត្រូវបង្អែរបង្អង់ទៀតឡើយ»។ ការណ៍នេះក៏ព្រោះតែលោក ដូណាល់ ត្រាំ យល់ឃើញថា ដំណើរការចរចាបញ្ចប់សង្គ្រាមហាក់គ្មានការចម្រើនទៅមុខសោះ។

ចៅហ្វាយសេតវិមានអាមេរិក សង្កត់ធ្ងន់ថា លោកសែនខកចិត្តចំពោះទង្វើរបស់លោកប្រធានាធិបតីរុស្ស៊ី ពូទីន។ តាមសម្តីរបស់ប្រធានាធិបតីអាមេរិក រាល់ដងឲ្យតែលោកគិតថាសង្គ្រាមចប់ បែរជាលោកត្រូវខកចិត្តរាល់តែពេល ព្រោះ លោក ពូទីន បានបន្តសម្លាប់មនុស្សបន្ថែមទៀត។ ម្ល៉ោះហើយចៅហ្វាយសេតវិមាន អះអាងថា លោកលែងចាប់អារម្មណ៍នឹងជជែកជាមួយលោក ពូទីន ទៀតឡើយ ។ ការប្រកាសរបស់លោក ដូណាល់ ត្រាំ យ៉ាងដូច្នេះ បានធ្វើឡើងនៅក្នុងដំណើរទស្សនកិច្ចផ្លូវរដ្ឋ នៅអេកូស ដែលអមដំណើរដោយនាយករដ្ឋមន្ត្រីអង់គ្លេស លោក គៀរ ស្តាមឺ។

លោក ត្រាំ ក៏បានដាក់សម្ពាធជាថ្មីចំពោះលោកពូទីនឲ្យស្វះស្វែងចរចាជាមួយអ៊ុយក្រែន ដើម្បីចុះកិច្ចព្រមព្រៀងបទឈប់បាញ់ជាបន្ទាន់ បើពុំដូច្នោះទេ អាមេរិកនឹងដាក់ទណ្ឌកម្មឲ្យធ្ងន់ធ្ងរបន្ថែមទៀតចំពោះរុស្ស៊ី។

ទណ្ឌកម្មដែលវ៉ាស៊ីនតោនគំរាមដាក់ គឺជាទណ្ឌកម្មសេដ្ឋកិច្ច ពិសេសផ្តោតលើវិស័យឧស្សាហកម្មប្រេងរុស្ស៊ី ហើយដែលអាចជះឥទ្ធិពលប៉ះពាល់ដល់ប្រទេសដៃគូរកស៊ី និងទិញប្រេងពីរុស្ស៊ី។ បណ្តាប្រទេសបស្ចិមលោកជឿជាក់ថា ការដាក់ទណ្ឌកម្មប្រេងរុស្ស៊ីនឹងធ្វើឲ្យកកស្ទះប្រភពចំណូលសេដ្ឋកិច្ចដែលម៉ូស្គូយកទៅបំប៉នភ្លើងសង្គ្រាម។ គ្រាន់តែក្រោយការប្រកាសដាក់សម្ពាធរបស់លោកត្រាំបានបន្តិច តម្លៃប្រេងបានធ្លាក់ចុះមួយរំពេច ប្រមាណ ២,១៥% កាលពីល្ងាចថ្ងៃចន្ទ ទី២៨កក្កដា ។

កាលពីពេលកន្លងទៅ វ៉ាស៊ីនតោនក៏បានគំរាមដាក់ទណ្ឌកម្មសេដ្ឋកិច្ចចំពោះផលិតផលនៃប្រទេសដៃគូដែលរកស៊ីជាមួយរុស្ស៊ី ដោយកំណត់រនាំងពន្ធគយរហូតដល់ ១០០%។ ប្រទេសដៃគូទាំងនោះ មានដូចជា ចិន តួកគី និងបេឡារុស។

ប្រធានាធិបតីអ៊ុយក្រែន លោក វ៉ូឡូឌីមៀរ ហ្សេឡេនស្គី បានថ្លែងប្រតិកម្មសាទរចំពោះជំហរថ្មី និងដ៏ច្បាស់លាស់របស់ចៅហ្វាយសេតវិមានអាមេរិក។ លោក ហ្សេឡេនស្គី ក៏បានប្រកាសថា នៅលើសមរភូមិអ៊ុយក្រែន ថ្ងៃទី២៩ កក្កដា មានស្លាប់ពលរដ្ឋអ៊ុយក្រែនចំនួន ១៧នាក់ និងរបួសជិត៥០នាក់ដោយសារ ការវាយប្រហាររបស់កងទ័ពរុស្ស៊ីលើមន្ទីរឃុំឃាំងមួយកន្លែង ក្នុងតំបន់ហ្សាប៉ូរីចា ភាគខាងត្បូងអ៊ុយក្រែន។

Nº.0890