ប្រមុខការទូតអ៊ីរ៉ង់ ទៅជួប លោក ពូទីនដើម្បីសុំការគាំទ្រ ក្រោយរងការវាយប្រហារពីអ៊ីស្រាអែលនិងអាមេរិក
ចេញផ្សាយនៅថ្ងៃទី២៤ ខែមិថុនា ឆ្នាំ២០២៥៖
កាលពី ថ្ងៃចន្ទទី ២៣មិថុនា លោក អាបាស អារ៉ាកឈី ប្រមុខការទូតអ៊ីរ៉ង់ បានធ្វើ ដំណើរទៅទីក្រុ ងម៉ូស្គូ ដើម្បីជួបជាមួយ លោក ពូទីន ។ នៅក្នុងបរិបទដែល របប ដឹកនាំអ៊ីរ៉ង់ កាន់តែចុះទន់ខ្សោយ ដោយរងការបាញ់ប្រហារជាបន្តបន្ទាប់ ពីអ៊ីស្រាអែលនិងពីអាមេរិក អ៊ីរ៉ង់កំពុងតែស្វះស្វែងរក ការគាំទ្រពីខាងក្រៅ ។ លោក ប្រមុខការទូតអ៊ីរ៉ង់បានអះអាងថា ការទៅជួបពិភាក្សាយោបល់ជាមួយរុស្ស៊ី វាជារឿងមានសារៈសំខាន់ខ្លាំងណាស់ ។
របបសាធារណរដ្ឋអ៊ីស្លាមអ៊ីរ៉ង់ កំពុងតែស្វះ ស្វែងរកបង្អែកគាំទ្រ ពីសំណាក់សម្ព័ន្ធមិត្តខ្លួន ដែល បច្ចុប្បន្ននេះ គឺមានតែរុស្ស៊ីប៉ុណ្ណោះ។ លោក Abbas Araghchi រដ្ឋមន្ត្រីការបរទេសអ៊ីរ៉ង់ បានទៅដល់ ទីក្រុង ម៉ូស្គូ នៅព្រឹកថ្ងៃចន្ទទី ២៣មិថុនា ដើម្បី ជួបជាមួយ លោក ប្រធានាធិបតី ពូទីន ។ ទូរទស្សន៍ ជាតិអ៊ីរ៉ង់ បានផ្សាយថា មុននឹងចូលជួប លោក ពូទីននៅ ម៉ូស្គូ លោក Abbas Araghchi បានទទួលស្គាល់ ថា ក្នុងកាលៈទេសៈ បច្ចុប្បន្ននេះ ការពិភាក្សាយោបល់ជាមួយ រុស្ស៊ី គឺជារឿងមួយ ដ៏ចាំបាច់បំផុត។
បណ្តាញព័ត៌មានអ៊ីរ៉ង់ បាន ផ្សាយថា ការពិភាក្សាគ្នារវាងភាគីរុស្ស៊ី និងអ៊ីរ៉ង់ គឺផ្តោតទៅលើ ស្ថានការណ៍តំបន់ និង អន្តរជាតិ បន្ទាប់ពី កងទ័ពអាមេរិក និង អ៊ីស្រាអែល បានវាយ ប្រហារ ឈ្លានពាន ដោយ ខុសច្បាប់ មកលើអ៊ីរ៉ង់ ។
សូមបញ្ជាក់ថា តាំងតែពីផ្ទុះ សង្គ្រាមរវាង អ៊ីស្រាអែល និងអ៊ីរ៉ង់នៅថ្ងៃទី ១៣មិថុនា វិមានក្រេមឡាំងបានអះអាងថា លោក ពូទីន បានត្រៀមខ្លួន ជួយធ្វើជាអាជ្ញាកណ្តាល សម្របសម្រួល ដើម្បី បញ្ចៀស សង្គ្រាម ឆាប ឆេះ ធំឡើង។ កាលពីថ្ងៃអាទិត្យ ភ្លាម ៗក្រោយ ពេលដែល កងទ័ពអាមេរិក បានបើកការវាយប្រហារ ទៅលើ ទីតាំងនុយក្លេអ៊ែរអ៊ីរ៉ង់ រុស្ស៊ី បាន ប្រកាសថ្កោលទោស ថាជាទង្វើគ្មានការទទួលខុសត្រូវ។
នៅថ្ងៃចន្ទ ទី ២៣មិថុនា ក្រោយជួប ជាមួយ លោក ប្រមុខការទូតអ៊ីរ៉ង់ លោក ពូទីន បានចាត់ទុក ថាការវាយប្រហារ របស់ អាមេរិក ជាការវាយប្រហារ ដោយ ឯកត្តោភាគី គ្មានមូលដ្ឋាន និងគ្មានហេតុផល។ លោកពូទីន បានប្រាប់ លោក Abbas Araghchi ថារុស្ស៊ី នឹងរកវិធីដើម្បីជួយដល់ ប្រជាជនអ៊ីរ៉ង់ ។ តែយ៉ាងណាក៏ដោយ លោក ពូទីន មិន បានសន្យាឲ្យបានជាក់លាក់ ថារុស្ស៊ី អាចនឹងជួយ ផ្តល់ជាជំនួយ យោធា ទៅឲ្យអ៊ីរ៉ង់នោះឡើយ ខណៈនៅក្នុងសង្គ្រាម អ៊ុយក្រែន អ៊ីរ៉ង់បានផ្តល់ដ្រូន រាប់រយ គ្រឿងទៅ ឲ្យរុស្ស៊ី ។
គួរបញ្ជាក់ថា កាលពីខែ មករា ដើមឆ្នាំ ២០២៥ រុស្ស៊ីនិងអ៊ីរ៉ង់ បានចុះហត្ថលេខា រួមគ្នា លើសន្ធិសញ្ញា សហប្រតិបត្តិការយុទ្ធសាស្ត្ររួម ដែល មានខ្លឹមសារ ពង្រឹង ចំណងទំនាក់ទំនងរវាងប្រទេសទាំង ២ ដោយរាប់ទាំងផ្នែកយោធាផង ។ តែសន្ធិសញ្ញានេះ មិនបានចែងកំណត់ អំពីកាតព្វកិច្ចជួយការពារគ្នាទៅវិញទៅមកនោះទេ ។
ដោយឡែក នៅ លើកញ្ចក់ទូរទស្សន៍ Fox News ព្រឹកថ្ងៃចន្ទ ទី ២៣មិថុនា លោកស្រី Karoline Leavitt អ្នកនាំពាក្យសេតវិមាន បានលើកឡើងថា លោកដូណាល់ ត្រាំ នៅតែចង់ ផ្តល់ ឱកាសដល់ ការចរចាការទូតជាមួយរបបអ៊ីរ៉ង់។ តែទន្ទឹមនឹងនេះ អ្នកនាំពាក្យសេតវិមាន រូបនេះ បាន លើកឡើងថា ប្រជាជន អ៊ីរ៉ង់ គួរតែងើបឈរឡើង ដណ្តើមអំណាចពីរបបផ្តាច់ការ ដែលបាន ធ្វើបាបពួកគេអស់ជាច្រើន ទសវត្សរ៍ ប្រសិនបើរបបនេះ នៅតែបដិសេធមិនព្រម ចរចាដោយសន្តិវិធីទេនោះ ៕
Nº.0802
