ក្រសួងបរិស្ថានសម្រេចផ្អាកក្រុមហ៊ុន២កន្លែង បន្ទាប់ពីរកឃើញការបំពុលប្រភពទឹកសាធារណៈ

ក្រសួងបរិស្ថានសម្រេចផ្អាកក្រុមហ៊ុន២កន្លែង បន្ទាប់ពីរកឃើញការបំពុលប្រភពទឹកសាធារណៈ

ចេញផ្សាយនៅថ្ងៃទី២៥ ខែមិថុនា ឆ្នាំ២០២៥៖

ក្រសួងបរិស្ថានបានសម្រេចផ្អាកផ្នែកផលិតកម្មជាបណ្តោះអាសន្នរបស់ក្រុមហ៊ុន Cambodian Noble Taste Food Co., Ltd និង ក្រុមហ៊ុន កែច្នៃស្បែកគោ Kubon (Cambodia) Biotechnology Co., Ltd បន្ទាប់ពីក្រុមហ៊ុនទាំង២នេះ មិនបានអនុវត្តច្បាប់ និងតាមការណែនាំរបស់ក្រសួង ដែលឱ្យបញ្ឈប់ការបំពុលប្រភពទឹកសាធារណៈ។

ក្រសួងបានលើកឡើង នៅថ្ងៃអង្គារ ទី២៤ ខែមិថុនា

ថា ក្រុមហ៊ុនទាំង២ នៅតែបន្តបញ្ចេញសំណល់រាវ ដែលធ្វើឱ្យប៉ះពាល់ ដល់ព្រែកកំពង់ស្មាច់ និងព្រែកផ្អាវ នៅក្នុងឃុំសាមគ្គី ឃុំទឹកល្អក់ និងឃុំទឹកថ្លា ក្នុងស្រុកព្រៃនប់ ខេត្តព្រះសីហនុ។

ការសម្រេចបិទណើរការផលិតកម្មទាំងស្រុងជាបណ្តោះអាសន្ននេះធ្វើឡើងតាមរយៈលិខិតដាច់ដោយឡែកពីគ្នាកាលពីពេលថ្មីៗនេះ របស់រដ្ឋមន្រ្តីក្រសួងបរិស្ថាន លោកអ៊ាង សុផល្លែត។

ក្រសួងបញ្ជាក់ថា៖«ក្រុមហ៊ុន Kubon (Cambodia) Biotechnology Co., Ltd និងក្រុមហ៊ុន Cambodian Noble Taste Food Co., Ltd ត្រូវផ្អាកដំណើការផលិតកម្មទាំងស្រុងជាបណ្តោះអាសន្ន រហូតដល់ទទួលបានការអនុញ្ញាតពីក្រសួងបរិស្ថាន ដោយមូលហេតុ ក្រុមហ៊ុនមិនបានអនុវត្តតាមច្បាប់»។ ក្នុងនោះរួមមាន មាត្រ១៥៦ មាត្រា២៨៧ មាត្រា២៨៩ មាត្រា២៩០ នៃក្រមបរិស្ថាន និងធនធានធម្មជាតិ និងអនុក្រឹត្យពាក់ព័ន្ធផ្សេងទៀត។

បន្ថែមពីនោះ ក្រុមហ៊ុនទាំង២ ក៏មិនបានអនុវត្តតាម សេចក្តីជូនដំណឹងរបស់ទីស្តីការគណៈរដ្ឋមន្រ្តី លេខ៥៩០ សជណ.ដប ចុះថ្ងៃទី៨ ខែមេសា ឆ្នាំ២០២៥ និងប្រសាសន៍របស់ លោកនាយករដ្ឋមន្រ្តីហ៊ុន ម៉ាណែត ដែលបានណែនាំក្រសួងបរិស្ថាន ត្រូវផ្អាកសកម្មភាពផលិតកម្មរបស់ក្រុមហ៊ុន រហូតដល់មានការកែតម្រូវតាមច្បាប់ និងគោលការណ៍ដែលមានជាធរមាន។

ក្រសួងបានព្រមានដូច្នេះថា៖«ក្នុងករណីក្រុមហ៊ុនមិនបានអនុវត្តតាមការសម្រេចខាងលើ ក្រសួងបរិស្ថាននឹងមានចំណាត់ការបិទក្រុមហ៊ុនតាមច្បាប់និងគោលការណ៍ជាធរមាន»។

រោងចក្រ សហគ្រាស និងទីតាំងក្រុមហ៊ុនជាង៣០ទីតាំងហើយ ត្រូវបាន ក្រសួងបរិស្ថានចាត់វិធានការតាមផ្លូវច្បាប់ ដោយសារតែសកម្មភាពបំពុលប្រភពទឹកស្អាតសាធារណៈ នាពេលកន្លងមក៕

Nº.0803