អ.ស.ប និងអង្គការប៉ាឡេស្ទីន ថាអ៊ីស្រាអែលធ្វើអំពើប្រល័យពូជសាសន៍ ដោយកាត់បន្ថយកំណើតទារក
ចេញផ្សាយនៅថ្ងៃទី១ ខែឧសភា ឆ្នាំ២០២៥៖
អ៊ីស្រាអែលកំពុងតែធ្វើអំពើប្រល័យពូជសាសន៍ ទៅលើប្រជាជនប៉ាឡេស្ទីននៅតំបន់ហ្កាហ្សា តាមរយៈការប្រើវិធីរារាំងមិនឲ្យអ្នករស់នៅតំបន់ហ្កាហ្សា អាចមានកូន។ នេះគឺជាការអះអាងសន្និដ្ឋាន របស់អង្គការក្រៅរដ្ឋាភិបាលប៉ាឡេស្ទីនមួយ និងក្រុមអ្នកជំនាញមួយក្រុម នៃអង្គការសហប្រជាជាតិ ដែលបានចេញផ្សាយរបាយការណ៍ កាលពីថ្ងៃទី២៩មេសា។ ដោយឡែក អ៊ីស្រាអែលបានបរិហារបាយការណ៍នេះ ថាជារបាយការណ៍បែប ស្អប់ខ្ពើមមកលើប្រជាជនជ្វីហ្វអ៊ីស្រាអែល។
អ្នកទទួលខុសត្រូវម្នាក់ ដោយសុំមិនបញ្ចេញឈ្មោះ នៃអង្គការប៉ាឡេស្ទីន Miftah បានអះអាងថា អ៊ីស្រាអែលកំពុងធ្វើឲ្យប្រជាជននៅតំបន់ហ្កាហ្សាត្រូវផុតពូជ តាមរយៈការប្រើវិធីរារាំងមិនឲ្យប្រជាជនប៉ាឡេស្ទីនមានកូនតពូជ។ របាយការណ៍ របស់អង្គការប៉ាឡេស្ទីនមួយនេះ បានលើកឡើងទៀតថា អាជ្ញាធរអ៊ីស្រាអែលមិនដែលលាក់ទេ នូវចេតនាចង់ធ្វើឲ្យតំបន់ហ្កាហ្សា លែងមានប្រជាជនប៉ាឡេស្ទីនរស់នៅតទៅទៀត។ ដូច្នេះ ការជម្លៀសមនុស្សចេញ និងការកាត់បន្ថយអត្រាកំណើតទារក នៅក្នុងតំបន់ហ្កាហ្សា គឺជាមធ្យោបាយដែលអ៊ីស្រាអែលកំពុងតែធ្វើ។
គួរបញ្ជាក់ថា របាយការណ៍នេះ ត្រូវបានបង្ហាញជាសាធារណៈ កាលពីថ្ងៃទី២៩មេសា នៅទីក្រុងរ៉ាម៉ាឡា។ មន្ត្រីអង្គការ Miftah ខាងលើ បានលើកឡើងថា អ៊ីស្រាអែលបានធ្វើឲ្យការពរពោះ ត្រូវប្រឈមគ្រោះថ្នាក់ខ្លាំង ខណៈបណ្តាញសេវាកម្មសុខភាពមាតានិងទារក នៅតំបន់ហ្កាហ្សា ត្រូវបំផ្លេចបំផ្លាញខ្ទេចខ្ទីរអស់។
សេចក្តីសន្និដ្ឋានខាងលើរបស់អង្គការប៉ាឡេស្ទីនេះ ក៏មានមានខ្លឹមសារដូចគ្នាទៅនឹងការសន្និដ្ឋានរបស់ ក្រុមអ្នកជំនាញនៃអង្គការសហប្រជាជាតិ។ លោក Chris Sidoti មេធាវីម្នាក់នៅក្រុមអ្នកជំនាញអង្គការសហប្រជាជាតិ បានលើកឡើងថា មន្ទីរពេទ្យសម្ពពនៅហ្កាហ្សា បានរងការខូចខាតដោយការបាញ់ប្លោងទម្លាក់គ្រាប់របស់អ៊ីស្រាអែល ក្នុងនោះគឺមានគ្លីនិកបង្កកំណើតទារកក្នុងកែវ ដ៏ធំបំផុតនៅហ្កាហ្សា។ យ៉ាងហោច អំប៊្រីយ៉ុងចំនួន៤០០០ត្រូវបានកំទេច។ លោកមេធាវីរូបនេះអះអាងថា ទង្វើនេះអាចចាត់ទុកបានថាជាសង្គ្រាមប្រឆាំងអត្រាកំណើតទារក ដែលអ៊ីស្រាអែលធ្វើទៅលើប្រជាជននៅហ្កាហ្សា។ លោក Chris Sidoti អះអាងទៀតថា មានករណីទារុណកម្មជាច្រើនបង្កឡើងដោយភាគីអ៊ីស្រាអែល ដែលមានលក្ខណៈជាការបៀតបៀនផ្លូវភេទ ការគំរាមផ្លូវភេទៗផ្សេងៗទៀត។
យ៉ាងណាក៏ដោយ អ៊ីស្រាអែលបានបរិហារសេចក្តីសន្និដ្ឋាននៃរបាយការណ៍ខាងលើ ដោយចាត់ទុកថាជារបាយការណ៍កុហកបោកប្រាស់ និងមានលក្ខណៈស្អប់ខ្ពើមមកលើប្រជាជនជ្វីហ្វអ៊ីស្រាអែល។
សូមបញ្ជាក់ថា កាលពីថ្ងៃចន្ទដើមសប្តាហ៍នេះ តុលាការយុត្តិធម៌អន្តរជាតិទីក្រុងឡាអេ បានបើកសវនាការរបស់ខ្លួន ដែលនឹងមានរយៈពេល៥០ថ្ងៃ ដើម្បីជំរំជំរះសំណុំរឿងដែលអ៊ីស្រាអែល ត្រូវគេចោទថាបានបិទខ្ទប់តំបន់ហ្កាហ្សា ក្នុងចេតនាប្រល័យពូជសាសន៍ ឬអាចជាឧក្រិដ្ឋកម្មប្រឆាំងមនុស្សជាតិ។ នៅចំពោះមុខអង្គចៅក្រម តំណាងរដ្ឋាភិបាលបារាំង លោក Diégo Colas បានថ្លែងថា អ៊ីស្រាអែលត្រូវតែដកចេញជាបន្ទាន់ នូវការបិទខ្ទប់ការដឹកជញ្ជូនស្បៀងចូលទៅតំបន់ហ្កាហ្សា ព្រោះថាទង្វើនេះជាទង្វើធ្វើឲ្យប្រជាជនប៉ាឡេស្ទីនសា្លប់ដោយដាច់ពោះ។
ដោយឡែក លោក Josh Simmons តំណាងរដ្ឋាភិបាលអាមេរិកវិញ បានថ្លែងនៅមុខចៅក្រមតុលាការក្រុងឡាអេ ថាទីភ្នាក់ងារអង្គការសហប្រជាជាតិទទួលបន្ទុកជនភៀសខ្លួនប៉ាឡេស្ទីន ហៅកាត់ថា UNRWA បានធ្វើសកម្មភាពលំអៀងទៅខាងក្រុមភេរវកម្មហាម៉ាស ព្រោះទីភ្នាក់ងារនេះបានអនុញ្ញាតឲ្យក្រុមហាម៉ាសយកទីតាំងខ្លួន ប្រើជាកន្លែងលាក់ខ្លួន និងជាទីតាំងស្តុកអាវុធជាដើម។ មន្ត្រីអាមេរិករូបនេះ អះអាងទៀតថា អង្គការនេះមិនមែនជាជម្រើសតែមួយគត់ ក្នុងការចាត់ចែងបែងចែកស្បៀងអាហារនិងជំនួយមនុស្សធម៌ នៅតំបន់ហ្កាហ្សានោះឡើយ៕
Nº.0642
