សាលាឧទ្ធរណ៍ភ្នំពេញ៖ សម្រេចតម្កល់សាល ក្រមសាលាដំបូងរាជធានីភ្នំពេញផ្ដន្ទាទោសអតីតឧកញ៉ា ស្រី ស៊ីណា ដាក់ពន្ធនាគារ៣១ឆ្នាំ ដដែល
ចេញផ្សាយនៅថ្ងៃទី០១ ខែឧសភា ឆ្នាំ២០២៥
ភ្នំពេញ៖ សាលាឧទ្ធរណ៍ នៅថ្ងៃទី៣០ ខែមេសា បានសម្រេចតម្កល់សាលក្រមរបស់សាលាដំបូងរាជធានីភ្នំពេញ ទុកជាបានការដដែល។ សាលាដំបូងរាជធានីភ្នំពេញ នៅថ្ងៃទី២៣ ខែធ្នូ ឆ្នាំ២០២៤ បានសម្រេចផ្ដន្ទាទោសដាក់ពន្ធនាគារ ជនជាប់ចោទ ស្រី ស៊ីណា សរុប៣១ឆ្នាំ និងពិន័យជាប្រាក់សរុបជាង២លានដុល្លារ ដល់គ្រួសារជនរងគ្រោះដែលស្លាប់ទាំង២នាក់ និងប្រមាណ ៥០ម៉ឺនដុល្លារ ដល់ជនរងគ្រោះដែលរងរបួស ពាក់ព័ន្ធនឹងសំណុំរឿងចំនួន៣ គឺករណីឃាតកម្ម , ប៉ុនប៉ងឃាតកម្ម។ ប្រើប្រាស់អាវុធដោយគ្មានការអនុញ្ញាត និងរំលោភលើលំនៅឋាន។
សំណុំរឿងទាំងនោះគឺសំណុំរឿងទី១ សាលាដំបូង បានសម្រេចផ្តន្ទាទោសលើជនជាប់ចោទឈ្មោះ ស្រី ស៊ីណា ដាក់ពន្ធនាគារកំណត់រយៈពេល ១៥ (ដប់ប្រាំ) ឆ្នាំ និងពិន័យជាប្រាក់ចំនួន ២ ០០០ ០០០ (ពីរលាន) រៀល ពីបទឃាតកម្ម និងប្រើប្រាស់អាវុធដោយគ្មានការអនុញ្ញាត បទល្មើសព្រហ្មទណ្ឌ ដែលមានចែង និងផ្តន្ទាទោសតាមមាត្រា១៩៩ ក្រមព្រហ្មទណ្ឌ និងមាត្រា២០ នៃច្បាប់ស្តីពីការគ្រប់គ្រងអាវុធជាតិផ្ទុះ និងគ្រាប់រំសេវ និងបានបង្គាប់ឱ្យ ស្រី ស៊ីណា សងសំណងជំងឺចិត្តចំនួន ១ លានដុល្លារ ទៅដើមបណ្តឹងរដ្ឋប្បវេណីឈ្មោះ ម៉ាំង បូណា ត្រូវជាឪពុកជនរងគ្រោះ ឃីន កញ្ចនា ដែលបានស្លាប់ និងបង្គាប់ឱ្យសងសំណងជំងឺចិត្តចំនួន ១ លានដុល្លារទៀត ទៅដើមបណ្តឹងរដ្ឋប្បវេណីឈ្មោះ ជា អញ្ជលី ត្រូវជាម្តាយជនរងគ្រោះឈ្មោះ ឡុង លីសុង ដែលបានស្លាប់។
សំណុំរឿងទី២ តុលាការបានសម្រេចផ្តន្ទាទោសលើជនជាប់ចោទ ស្រី ស៊ីណា ដាក់ពន្ធនាគារកំណត់រយៈពេល១៥ឆ្នាំ និងពិន័យជាប្រាក់ចំនួន ២ លានរៀល ពីបទប៉ុនប៉ងឃាតកម្ម និងប្រើប្រាស់អាវុធដោយគ្មានការអនុញ្ញាត បទល្មើសព្រហ្មទណ្ឌដែលមានចែង និងផ្តន្ទាទោសតាមមាត្រា២៧ មាត្រា១៩៩ ក្រមព្រហ្មទណ្ឌនៃព្រះរាជាណាចក្រកម្ពុជា និងមាត្រា២០ នៃច្បាប់ស្តីពីការគ្រប់គ្រងអាវុធជាតិផ្ទុះ និងគ្រាប់រំសេវ និងបានបង្គាប់ឱ្យសងសំណងជំងឺចិត្តចំនួន ៣០ម៉ឺនដុល្លារ ទៅដើមបណ្តឹងរដ្ឋប្បវេណីឈ្មោះ សុខុម ចរណៈ ដែលជាអ្នករងរបួស និងចំនួន ២០ម៉ឺនដុល្លារ ទៅដើមបណ្តឹងរដ្ឋប្បវេណីឈ្មោះ ហុង រិទ្ធារ័ក្ស ដែលជាអ្នករងរបួស។
សំណុំរឿងទី៣ តុលាការបានសម្រេចផ្តន្ទាទោសលើជនជាប់ចោទ ស្រី ស៊ីណា ដាក់ពន្ធនាគារកំណត់រយៈពេល ១ ឆ្នាំ និងពិន័យជាប្រាក់ចំនួន ២ លានរៀល ពីបទ រំលោភលើលំនៅឋាន បទល្មើសព្រហ្មទណ្ឌដែលមានចែង និងផ្តន្ទាទោស តាមមាត្រា២៩៩ ក្រមព្រហ្មទណ្ឌកម្ពុជា និងបានបង្គាប់ឱ្យ ស្រី ស៊ីណា សងសំណងជំងឺចិត្តចំនួន ៥ម៉ឺនដុល្លារ ទៅដើមបណ្តឹងរដ្ឋប្បវេណីឈ្មោះ ជា អញ្ជលី ត្រូវជាម្តាយម្ចាស់ផ្ទះ។
ជនជាប់ចោទ រី ស៊ីណា បានបាញ់ទៅលើជនរងគ្រោះ៤នាក់ ដោយក្នុងនោះយុវជន២នាក់ ដែលជាគូដណ្ដឹងនឹងគ្នាបានស្លាប់ និងមនុស្ស២នាក់ទៀតរងរបួស។ ជនរងគ្រោះទាំង៤នាក់ ក្នុងហេតុការណ៍នេះ រួមមានលោក ឡុង លីសុង និងកញ្ញា ឃីម កញ្ចនា ដែលជាគូដណ្ដឹងនឹងគ្នា បានបាត់បង់ជីវិត។ ចំណែកយុវជន សុខុម រ៉ាចាណៈ និង ហុង រិទ្ធធារ័ក្ស រងរបួសធ្ងន់ និងស្រាល។ ពួកគេទាំង៤នាក់ មានមុខរបរជាជាងថតរូប ស្នាក់នៅផ្ទះកើតហេតុខាងលើ។
សមត្ថកិច្ច បានឃាត់ខ្លួនខ្មាន់កាំភ្លើងភ្លាមៗក្រោយកើតហេតុ ដោយរូបគេបានសារភាពប្រាប់សមត្ថកិច្ចថា ខ្លួនដកកាំភ្លើងបាញ់ប្រហារលើជនរងគ្រោះ ព្រោះតែទំនាស់រឿងប្រើប្រាស់ស្នួហាលខោអាវ និងការចតឡានមុខផ្ទះ៕
Nº.0641
