សម្តេចបវរធិបតី ហ៊ុន ម៉ាណែត អញ្ជើញជាអធិបតីប្រគល់សញ្ញាបត្រជូនដល់និស្សិត នៃវិទ្យាស្ថាន វ៉ាន់ដា
ចេញផ្សាយនៅថ្ងៃទី១១ ខែមីនា ឆ្នាំ២០២៥៖
សម្តេចបវរធិបតី ហ៊ុន ម៉ាណែត នាយករដ្ឋមន្រ្តី នៃកម្ពុជា បានអញ្ជើញជាអធិបតីភាពក្នុងពិធីប្រគល់សញ្ញាបត្រ ជូននិស្សិតជ័យលាភី កម្រិតបរិញ្ញាបត្ររង បរិញ្ញាបត្រ និង បរិញ្ញាបត្រជាន់ខ្ពស់របស់វិទ្យាស្ថានវ៉ាន់ដាចំនួន ៤.៤២៦ នាក់ (នារី ៣.៩២៤ នាក់) នាព្រឹកថ្ងៃទី ១១ ខែមីនា ឆ្នាំ២០២៥ដែលបាន បញ្ចប់ការសិក្សាក្នុងឆ្នាំសិក្សា២០២៣-២០២៤ កន្លងមកនេះនៅទីតាំងគោលរាជធានីភ្នំពេញ សាខាខេត្តសៀមរាប និងសាខាខេត្តបាត់ដំបង ក្នុងនោះក៏មាននិស្សិតបរិញ្ញាបត្រ ផ្នែកអាហារូបករណ៍របស់សម្តេចអគ្គមហាសេនាបតីតេជោ និង សម្តេចកិត្តិព្រឹទ្ធបណ្ឌិត ចំនួន ៥០ នាក់ (នារី ៤១ នាក់) ។
ឯកឧត្តមបណ្ឌិត ហេង វ៉ាន់ដា ប្រធានក្រុមប្រឹក្សាភិបាល នៃវិទ្យាស្ថានវ៉ាន់ដា បានថ្លែងថា “ក្នុងចំណោមជាង៤ពាន់៤រយនាក់ដែលទទួលបានជ័យលាភីនាពេលនេះ ថ្នាក់បរិញ្ញាបត្ររងចំនួន ៤១១នាក់ (នារី ៣៣៤ នាក់ស្មើ៨១,២៧%) ថ្នាក់បរិញ្ញាបត្រចំនួន៣.៨៩៦នាក់ (នារី ៣.៥២២នាក់ ស្មើ៩០,៤០%) ថ្នាក់បរិញ្ញាបត្រជាន់ខ្ពស់ ចំនួន១១៩នាក់ (នារី ៦៨នាក់ ស្មើ ៥៧,១៤%)”។
ឯកឧត្តមបណ្ឌិត ហេង វ៉ាន់ដា បានបន្តថា “ក្នុងឆ្នាំសិក្សា២០២៤-២០២៥នេះ វិទ្យាស្ថាន វ៉ាន់ដា មានក្រុមប្រឹក្សាភិបាល គណៈគ្រប់គ្រង បុគ្គលិក និង សាស្ត្រាចារ្យ សរុបចំនួន ៩៧១ នាក់ (នារី ៣៨២ នាក់ ) និង និស្សិត កំពុងសិក្សា ចំនួន ១០.២១២ នាក់ (នារី ៩.១៧០ នាក់) និង គិតចាប់ពីឆ្នាំសិក្សា២០០២-២០០៣ ដល់ឆ្នាំសិក្សា២០២៣-២០២៤កន្លងមកនេះ និស្សិតបានបញ្ចប់ការសិក្សា គិតទាំងនិស្សិតជ័យលាភី នេះផង សរុបចំនួន ៥៦.៥២៦ នាក់ (នារី ៤៧.៩៨៣ នាក់ )។ ដោយឡែក ចំពោះនិស្សិតជ័យលាភី ត្រូវទទួលសញ្ញាបត្រនាឱកាសនេះវិញ យោងតាមការធ្វើអង្កេតបានបង្ហាញថា និស្សិតចំនួន ៤.៤២៦ នាក់ នេះ អ្នកមានការងារធ្វើ ចំនួន ៣.៩៧៤ នាក់ ស្មើនឹង ៨៩,៧៩%”៕
Nº.0514
