សហភាពអឺរ៉ុប ជំរុញឲ្យរដ្ឋសមាជិក ឯកភាពចុះកិច្ចព្រមព្រៀង EU - Mercosur
ចេញផ្សាយនៅថ្ងៃទី៤ ខែកញ្ញា ឆ្នាំ២០២៥៖
ថ្នាក់ដឹកនាំសហភាពអឺរ៉ុប បានជំរុញឲ្យសមាជិកទាំង២៧ប្រទេស ត្រូវយល់ព្រមចុះកិច្ចព្រមព្រៀងដោះដូរពាណិជ្ជកម្ម ជាមួយក្រុមប្រទេសស្ថិតក្នុងសហគមន៍សេដ្ឋកិច្ចប៉ែកខាងត្បូង ហៅកាត់ មែរកូសួរ (Mercosur)។ ដើម្បីបន្ទន់ចិត្តដល់រដ្ឋសមាជិកដែលមានជំហរជំទាស់ សហភាពអឺរ៉ុបបានសម្រេចបន្ថែមមាត្រាច្បាប់ថ្មីមួយទៅក្នុងគំរូកិច្ចព្រមព្រៀង ដោយបញ្ជាក់ថាត្រូវការពារនិងធ្វើអន្តរាគមន៍ជួយប្រជាកសិករអឺរ៉ុបនិងទំនិញអឺរ៉ុបដែលរងផលប៉ះពាល់ព្រោះតែកិច្ចព្រមព្រៀងពាណិជ្ជកម្មនេះ។
ប្រសិនបើសហភាពអឺរ៉ុបយល់ព្រមចុះកិច្ចព្រមព្រៀងពាណិជ្ជកម្មជាមួយ Mercosur មែននោះ អឺរ៉ុបនឹងមានទីផ្សារធំជាងមុនសម្រាប់នាំចេញផលិតផលឧស្សាហកម្ម មានដូចជា រថយន្ត និង គ្រឿងម៉ាស៊ីន ជាដើម។ ទន្ទឹមគ្នានេះ អឺរ៉ុបក៏នឹងនាំចូលវិញនូវផលិតផលកសិកម្ម ដូចជា សាច់គោ ស្ករ ស្រូវ អង្ករ ទឹកឃ្មុំ និងសណ្តែក។ល។ តែការចរចាគ្នា ស៊ីពេល ប្រមាណជា២៥ឆ្នាំហើយ នៅមិនទាន់រកឃើញកិច្ចព្រមព្រៀង ជារូបរាងទេ។ រហូតមកទល់ពេលនេះ អាល្លឺម៉ង់ និងអេស្ប៉ាញយល់ព្រម។ រីឯ បារាំង អ៊ីតាលី និងប៉ូឡូញ ជំទាស់។ ជំទាស់ ដ្បិតថា ក្រុមប្រទេស Mercosur មានច្បាប់ និងបទដ្ឋានក្នុងវិស័យកសិកម្មផ្សេងៗគ្នា និងផ្ទុយពីបទដ្ឋានកសិកម្មរបស់អឺរ៉ុប។ ក្រៅពីបារម្ភចំពោះបញ្ហាសុខភាពអ្នកប្រើប្រាស់ ប្រទេសអឺរ៉ុបខ្លះក៏ព្រួយខ្លាចក្រែងលក់ទំនិញចាញ់ក្រុមប្រទេស Mercosur ព្រោះតែទំនិញរបស់ពួកគេនោះ លក់ក្នុងតម្លៃថោកជាងឆ្ងាយពីទំនិញអឺរ៉ុប។
ជាថ្មីម្តងទៀត ថ្នាក់ដឹកនាំសហភាពអឺរ៉ុប បានរន្ថើនជំរុញ ឲ្យរដ្ឋសមាជិកទាំង២៧ ត្រូវឯកភាពគ្នាចុះកិច្ចព្រមព្រៀងដោះដូរពាណិជ្ជកម្ម ជាមួយក្រុមប្រទេសស្ថិតក្នុងសហគមន៍សេដ្ឋកិច្ចប៉ែកខាងត្បូង Mercosur។ ទន្ទឹមនឹងការអំពាវនាវជាថ្មីឲ្យសមាជិកយល់ព្រមចុះកិច្ចព្រមព្រៀង ថ្នាក់ដឹកនាំសហភាពអឺរ៉ុបក៏បានធ្វើសម្បទាន ដោយបន្ថែមមាត្រាច្បាប់ថ្មីមួយ ស្តីពីការជួយរក្សាការពារទៅដល់ប្រជាកសិករអឺរ៉ុបនិងទំនិញអឺរ៉ុប ដែលរងផលប៉ះពាល់ ឬអាចនឹងរងគ្រោះធ្ងន់ធ្ងរ។ ប្រទេសបារាំង តាមរយៈអ្នកនាំពាក្យរដ្ឋាភិបាល លោកស្រី Sophie Primas បានសាទរដែលសហភាពអឺរ៉ុបគិតគូរពីក្តីបារម្ភរបស់ខ្លួន តែរដ្ឋាភិបាលក្រុងប៉ារីសនៅតែរក្សាជំហរបន្តពិចារណាសិន។
ជាការកត់សម្គាល់ គិតចាប់តាំងពីលោក ដូណាល់ ត្រាំ ឡើងកាន់អំណាចសេតវិមានអាមេរិកនិងបានធ្វើឲ្យពិភពពាណិជ្ជកម្មអន្តរជាតិរញ្ជួយតាមរយៈរនាំងពន្ធគយ សហភាពអឺរ៉ុបខំប្រឹងរកដៃគូពាណិជ្ជកម្មបន្ថែមទៀត។ ជាក់ស្តែង សហភាពអឺរ៉ុប ក៏បានពន្លឿនកិច្ចចរចាពាណិជ្ជកម្មជាមួយ ចិន ឥណ្ឌា ឥណ្ឌូណេស៊ី អេម៊ីរ៉ាត់អារ៉ាប់រួម ព្រមទាំងបន្តពង្រឹងទំនាក់ទំនងពាណិជ្ជកម្មជាមួយអង់គ្លេស កាដាណ និងជប៉ុន ជាដើម។ ម្ល៉ោះហើយទើប ប្រធានគណៈកម្មការអឺរ៉ុប លោកស្រី អួរស៊ូឡា វ៉ុនឌែរ ឡេយែន បានសង្កត់ធ្ងន់ថា ក្នុងបរិបទពិភពលោកបច្ចុប្បន្ន សហភាពអឺរ៉ុបខំប្រឹងបន្តធ្វើពិពិធកម្មពាណិជ្ជកម្ម ពង្រីកទំនាក់ទំនងដៃគូរកស៊ីឲ្យច្រើន ហើយបង្កើតឱកាសសក្តានុពលពាណិជ្ជកម្មបន្ថែមទៀត។
Nº.0981
