បាតុកម្មហិង្សានៅឥណ្ឌូណេស៊ី៖ ក្រុមជនខិលខូចចូលលួចក្នុងផ្ទះរដ្ឋមន្ត្រី និងឥស្សរជន
ចេញផ្សាយនៅថ្ងៃទី១ ខែសីហា ឆ្នាំ២០២៥៖
នៅឥណ្ឌូណេស៊ី បាតុកម្មហិង្សាប្រឆាំងនគរបាលនិងអាជ្ញាធររដ្ឋ កាន់តែរីករាយដាលខ្លាំងឡើងៗ។ ក្រៅពីដុតបំផ្លាញស្ថាប័នសាធារណៈពីសំណាក់បាតុករហិង្សា ក៏មានក្រុមជនខិលខូចបានឆ្លៀតឱកាសចូលលួចរបស់របរនៅក្នុងគេហដ្ឋានរបស់រដ្ឋមន្ត្រីក្រសួងហិរញ្ញវត្ថុ និងផ្ទះសមាជិកសភា ជាច្រើននាក់។ ភ្លាមៗ រដ្ឋមន្ត្រីក្រសួងការពារជាតិ បានចេញវិធានការក្តៅប្រឆាំងនឹងក្រុមចោរ។ ចំណែក ប្រធានាធិបតីឥណ្ឌូណេស៊ី បានចាត់ទុកក្រុមចោរឆ្លៀតឱកាសនោះ ថា ភេរវជន ក្បត់ជាតិ ។
ប្រធានាធិបតីឥណ្ឌូណេស៊ី លោក ប្រាបូវូ ស៊ូប៊ីយ៉ានតូ ដែលជាអតីតមេទាហាន បានរិះគន់ក្រុមបាតុករហិង្សាថា កំពុងតែប្រព្រឹត្តិអំពើក្បត់ជាតិ និងភេរវកម្ម។ ប្រមុខរដ្ឋរូបនេះទទួលស្គាល់ថា សិទ្ធិបាតុកម្មដោយសន្តិវិធី គួរតែត្រូវគោរពនិងការពារ ក៏ប៉ុន្តែរដ្ឋាភិបាលមិនអាចបិទភ្នែក ឬអត់ឱនចំពោះទង្វើផ្ទុយពីច្បាប់នោះឡើយ។ ប្រតិកម្មក្នុងសម្តីធ្ងន់ៗបែបនេះ ឆ្លើយតបទៅនឹងសកម្មភាពហិង្សារបស់បាតុករឥណ្ឌូណេស៊ី និងការចូលលុកលុយលួចរបស់របរ នៅក្នុងគេហដ្ឋានរដ្ឋមន្ត្រី និងសមាជិកសភា មួយចំនួន។
កាលពីយប់ថ្ងៃសៅរ៍ ឈានចូលថ្ងៃអាទិត្យ ទី៣១សីហា មនុស្សមួយក្រុម មានគ្នាជាង១០០នាក់ បានចូលលួចអីវ៉ាន់ នៅគេហដ្ឋានរបស់រដ្ឋមន្ត្រីក្រសួងហិរញ្ញវត្ថុ លោកស្រី Sri Mulyani Indrawati។ ខណៈពេលពួកចោរកំពុងធ្វើសកម្មភាព លោកស្រីរដ្ឋមន្ត្រីមិននៅផ្ទះទេ។ ក្រៅពីផ្ទះរដ្ឋមន្ត្រីរូបនេះ គេហដ្ឋានរបស់សមាជិកសភា យ៉ាងតិច ៣ នាក់ ក៏ត្រូវពួកចោរចូលលួចដែរ។ នេះបើតាមទីភ្នាក់ងារព័ត៌មានឥណ្ឌូណេស៊ី Antara ដោយសង្កត់ធ្ងន់ថា គេហដ្ឋានរបស់មន្ត្រីអ្នកមុខអ្នកការជាន់ខ្ពស់ ក៏ឋិតនៅក្នុងផ្ទាំងមុខសញ្ញាស៊ើបដែរ។ ក្រៅពីដាក់ពង្រាយប៉ូលិសទាហានយាមកាមផ្ទះឥស្សរជនសំខាន់ៗ រដ្ឋមន្ត្រីក្រសួងការពារជាតិឥណ្ឌូណេស៊ី លោក Sjafrie Sjamsoeddin បានចាត់ទុកហ្វូងបាតុករថាជាក្រុមអ្នកបះបោរ និងពួកចោរប្លន់ ហើយលោកសន្យាចាត់វិធានការតឹងរឹងប្រឆាំងនឹងពួកបះបោរ និងចោរ។
បាតុកម្មនៅឥណ្ឌូណេស៊ី ធ្លាក់ក្នុងសភាពហិង្សាខ្លាំងឡើងៗ ក្នុងរដ្ឋធានីហ្សាការតា និងនៅបណ្តាទីក្រុងធំៗ។ ដើមហេតុដែលនាំឲ្យភ្លើងកំហឹងពលរដ្ឋឆេះខ្លាំង ព្រោះតែ សភាបោះឆ្នោតសម្រេចឲ្យបន្ថែមប្រាក់ឧបត្ថម្ភ ដល់សមាជិកសភាដើម្បីជួលផ្ទះស្នាក់នៅ ក្នុងម្នាក់ៗ ចំនួន ៥០លានរូពី (Roupies) ប្រហែលជាង ៣ ០៣៤ ដុល្លារ។ លុយឧបត្ថម្ភនេះ ប្រហែល ច្រើនជាង ១០ដង ធៀបនឹងប្រាក់ឈ្នួលអប្បបរមា នៅក្រុងហ្សារតាកា។ មិនតែប៉ុណ្ណោះ ប៉ូលិសឥណ្ឌូណេស៊ីបានបើកឡានបុកអ្នករត់ម៉ូតូឌុប ម្នាក់ស្លាប់។ ហេតុការណ៍ផ្ទួនៗនេះ ហាក់ប្រៀបបាននឹងយកសាំងចាក់លើភ្លើង។ ពួកបាតុករបានដុតបំផ្លាញក្រុមប្រឹក្សាក្រុង Makassar ហើយបណ្តាលឲ្យមនុស្ស ៣ នាក់ ស្លាប់ក្នុងអគ្គិភ័យ។
ប្រឈមមុខនឹងបាតុកម្មហិង្សារីករាលដាលខ្លាំងទៅៗ ប្រធានាធិបតីឥណ្ឌូណេស៊ី លោក ប្រាបូវូ ស៊ូប៊ីយ៉ានតូ បានសន្យាស្វែងរកយុត្តិធម៌ឲ្យគ្រួសារសព ហើយដើម្បីសម្រន់កំហឹងបាតុករ លោកបានសម្រេចលុបចោលច្បាប់ដ៏ចម្រូងចម្រាសស្តីពីការឧបត្ថម្ភប្រាក់ចំពោះសមាជិកសភាសម្រាប់ជួលផ្ទះ។ ប្រមុខរដ្ឋឥណ្ឌូណេស៊ី ក៏បានសម្រេចលុបចោលដំណើរទស្សនកិច្ចទៅកាន់ប្រទេសចិន ដើម្បីទុកពេលដោះស្រាយវិបត្តិក្នុងស្រុក៕
Nº.0972
