រុស្ស៊ី សម្រុកវាយប្រហារដល់បេះដូងប្រទេសអ៊ុយក្រែន
ចេញផ្សាយនៅថ្ងៃទី២៩ ខែសីហា ឆ្នាំ២០២៥៖
កងទ័ពរុស្ស៊ីបានសម្រុកបញ្ឆេះភ្លើងសង្គ្រាមនៅអ៊ុយក្រែន ដោយប្លោងគ្រាប់យ៉ាងច្រើនសន្ធឹកទៅលើរដ្ឋធានីកៀវ។ ការវាយប្រហាររបស់រុស្ស៊ី បណ្តាលឲ្យស្លាប់ពលរដ្ឋអ៊ុយក្រែន ប្រមាណ ១៧ នាក់ ក្នុងនោះ មានកូនក្មេង ៣ នាក់។ ប្រធានាធិបតីអ៊ុយក្រែន លោក វ៉ូឡូឌីមៀរ ហ្សេឡេនស្គី បានប្រតិកម្មថា រុស្ស៊ីពេញចិត្តចង់បានមីស៊ីលបាឡីស្ទីក ច្រើនជាងតុចរចាសន្តិភាព។
នៅកណ្តាលទីក្រុងកៀវ ពលរដ្ឋអ៊ុយក្រែនច្រើនលាននាក់ឆ្លងកាត់រាត្រីមួយដ៏ស្លុតរន្ធត់ នៅយប់ថ្ងៃពុធឈានចូលថ្ងៃព្រហស្បតិ៍ ទី២៨សីហា។ ដ្បិតថា កងទ័ពរុស្ស៊ី បានប្រើដ្រូនជិត ៦០០ គ្រឿង និងមីស៊ីលជាង ៣០ គ្រាប់ សម្រុកវាយប្រហារយ៉ាងសន្ធាប់លើរដ្ឋធានីកៀវ ដែលបានសម្លាប់ពលរដ្ឋអ៊ុយក្រែន យ៉ាងហោច ១៧ នាក់ ។ នេះបើតាមតុល្យការរបស់កងទ័ពអ៊ុយក្រែន គិតត្រឹមថ្ងៃព្រហស្បតិ៍ ទី២៨សីហា ដោយបញ្ជាក់ទៀតថា អ្នករបួស មានច្រើនជាង ៤០ នាក់។
ឋិតក្នុងកាលៈទេសៈដែលពិភពលោកខាងលិចជំរុញចរចាគ្នា លោក វ៉ូឡូឌីមៀរ ហ្សេឡេនស្គី ប្រធានាធិបតីអ៊ុយក្រែន បានប្រតិកម្មថា កងទ័ពរុស្ស៊ីបានបើកប្រតិបត្តិការវាយប្រហារដល់បេះដូងប្រទេសអ៊ុនក្រែនយ៉ាងដូច្នេះ បានបង្ហាញឲ្យឃើញថា រដ្ឋាភិបាលក្រុងម៉ូស្គូពេញចិត្តចង់បានមីស៊ីលបាឡីស្ទីកនិងបន្តសម្លាប់មនុស្ស ច្រើនជាងចង់ចូលតុចរចាដើម្បីបញ្ចប់សង្គ្រាម។ ប្រមុខរដ្ឋអ៊ុយក្រែន ក៏ទន្ទឹងរង់ចាំប្រតិកម្មរបស់ពិភពលោកទាំងមូល ហើយសង្ឃឹមថា បណ្តាប្រទេសមានទម្ងន់អំណាចនិងសេដ្ឋកិច្ច នឹងចូលរួមដាក់បន្ថែមទណ្ឌកម្មសង្កត់ករុស្ស៊ី។ ឆ្លៀតឱកាសនេះ លោក វ៉ូឡូឌីមៀរ ហ្សេឡេនស្គី បានអំពាវនាវផ្ទាល់ចំពោះមហាយក្សចិន ដែលជាដៃគូរកស៊ីរបស់រុស្ស៊ី និងប្រទេសហុងគ្រី ដែលជារដ្ឋសមាជិកសហភាពអឺរ៉ុប ឲ្យចូលរួមសាមគ្គីក្នុងជំហរដាក់សម្ពាធទៅលើរដ្ឋអំណាចក្រុងម៉ូស្គូ។
ការវាយប្រហាររបស់រុស្ស៊ីនៅពេលនេះ បានប៉ះពាល់ទៅដល់អគារលំនៅដ្ឋាន កន្លែងអគារការិយាល័យធ្វើការ និងសួនក្មេងកម្សាន្ត ព្រមទាំងហេដ្ឋារចនាសម្ព័ន្ធផ្លូវដែក ចំនួនជាង ២០ ទីតាំងសំខាន់ៗ។ អគារស្នាក់នៅខ្លះ កម្ពស់ ៥ ជាន់ ត្រូវគ្រាប់មីស៊ីលរុស្ស៊ី ធ្វើឲ្យរលំបាក់រាបដល់ដី។ នេះបើតាមសេចក្តីរាយការណ៍របស់អ្នកកាសែតទីភ្នាក់ងារព័ត៌មានបារាំងAFP ដែលឈរជើងនៅក្រុងកៀវ ដោយបានបញ្ជាក់ទៀតថា សូម្បីតែ ការិយាល័យរបស់ស្ថានបេសកកម្មសហភាពអឺរ៉ុបប្រចាំក្រុងកៀវ ក៏បានរងការប៉ះពាល់ព្រោះតែគ្រាប់ប្លោករុស្ស៊ីដែរ។ កន្លែងបង្រៀនភាសាអង់គ្លេស ការិយាល័យ British Council នៅក្រុងកៀវ ក៏រងគ្រោះបាក់បែកយ៉ាងដំណំ និងបានប្រកាសបិទទ្វារ ទម្រាំមានបទបញ្ជាថ្មី។ ក៏ប៉ុន្តែ កងទ័ពរុស្ស៊ី បានអះអាងថា ការវាយប្រហាររបស់ខ្លួនទៅលើក្រុងកៀវ សំដៅតែ«ផ្ទាំងស៊ីបយោធា»តែប៉ុណ្ណោះ និងបាញ់ចំគោលដៅដែលបានកំណត់។
ថ្ងៃព្រហស្បតិ៍ ទី២៨សីហា ក្រុមអ្នកសង្គ្រោះបន្ទាន់ ប្រមាណ ៥០០នាក់ និងប៉ូលិសអ៊ុយក្រែន ជាង ១ ០០០ នាក់ ចូលរួមជួយសង្គ្រោះ ពន្លត់ភ្លើង និងស្វះស្វែងរកមនុស្សដែលឋិតនៅក្រោមគំនរបាក់បែក។
តាមបណ្តាញសង្គមX ប្រធានាធិបតីបារាំង លោក អេម៉ានុយអែល ម៉ាក្រុង បានចាត់ទុកការវាយប្រហាររបស់រុស្ស៊ី ថាជាអំពើឃោរឃៅព្រៃផ្សៃបំផុស។ ចំណែក ប្រធានក្រុមប្រឹក្សាអឺរ៉ុប លោក អង់តូនីញ៉ូ កូស្តា ថ្លែងរំលែកទុក្ខចំពោះជនរងគ្រោះអ៊ុយក្រែន និងប្រកាសថា សហភាពអឺរ៉ុបមិនទម្លាក់ដៃនោះឡើយ ហើយថែមទាំងប្តេជ្ញាចិត្តបន្តជួយគាំទ្រអ៊ុនក្រែន ជានិច្ច៕
Nº.0968
