សហរដ្ឋអាមេរិក សម្រេចដាក់ពន្ធគយ ១៥% លើទំនិញសហភាពអឺរ៉ុប

សហរដ្ឋអាមេរិក សម្រេចដាក់ពន្ធគយ ១៥% លើទំនិញសហភាពអឺរ៉ុប

ចេញផ្សាយនៅថ្ងៃទី២២ ខែសីហា ឆ្នាំ២០២៥៖

រដ្ឋាភិបាលរបស់ លោកប្រធានាធិបតី ដូណាល់ ត្រាំ បាន សម្រេច ដាក់អត្រាពន្ធគយ ចំនួន ១៥% ចំពោះ ទំនិញ ជាច្រើន មុខ ដែល នាំចេញពី សហភាពអឺរ៉ុប ចូល ស្រុក អាមេរិក។ នេះបើយោង សេចក្តីថ្លែងការណ៍រួម រវាង វ៉ាស៊ីនតោន និង ព្រុចសែល ដែល ចុះ ផ្សាយ នៅ ថ្ងៃទី ២១ សីហា។ ចំពោះ អត្រា ពន្ធគយថ្មីនេះ បារាំង និង អ៊ីតាលី ហាក់ទំនង ជា ខកចិត្តខ្លាំង ដ្បិត ថា ស្រា អឺរ៉ុបមិន បានឋិត ក្នុង បញ្ជីលើកលែង ពិសេស។  

រថយន្ត ផលិតផលឱសថ គ្រឿង បង្គុំអេឡិចត្រូនិក សឺមីកុងឌុកទ័រ និង ឈើ របស់ អឺរ៉ុប ដែល នាំចូល សហរដ្ឋអាមេរិក ត្រូវ ជាប់ ពន្ធគយ ១៥% ។ អត្រាពន្ធគយ នេះ ចែង ក្នុង សេចក្តីប្រកាស រួម រវាង រ ដ្ឋាភិបាល ក្រុង វ៉ាស៊ីនតោន និង សហភាព អឺរ៉ុប នៅថ្ងៃទី ២១សីហា។ កិច្ចព្រមព្រៀម ពាណិជ្ជកម្ម នេះ ផ្អែក តាម គោលការណ៍ យល់ព្រមព្រៀងគ្នា រវាង ប្រធានាធិបតី អាមេរិក ដូណាល់ ត្រាំ និង ប្រធានគណៈកម្មការអឺរ៉ុប លោកស្រី អួរស៊ូឡា វ៉ុនឌែរ ឡេយែន ដែល បាន ឯកភាពគ្នា កាលពី ចុង ខែ កក្កដា នៅ ប្រទេស អង់គ្លេស ។ ស្នងការ ពាណិជ្ជកម្ម អឺរ៉ុប លោក Maroš Šefčovič បាន វាយតម្លៃថា កិច្ចព្រមព្រៀងនេះ ជា យុទ្ធសាស្ត្រ ដ៏សំខាន់ ដែល គណៈ កម្មការសហភាពអឺរ៉ុប គាំទ្រ យ៉ាង ពេញទំហឹង។

ដោយឡែក ស្រាទំពាំងបាយជូរ និងស្រាប្រភេទខ្លាំងៗរបស់អឺរ៉ុប មិនអាចគេចផុតពីអត្រាពន្ធគយ ១៥% នោះឡើយ បើទោះបីជា ប្រទេសបារាំងនិងអ៊ីតាលី ទាមទារឲ្យលើកលែងពន្ធក៏ដោយ។ ម្ល៉ោះហើយ ទើបលោកស្នងការអឺរ៉ុប Maroš Šefčovič បាន សម្តែងក្តី សោកស្តាយ ចំពោះ ករណី ស្រា អឺរ៉ុប តែក៏ បាន ប្តេជ្ញាចិត្ត ថា នឹង ចរចាបន្ថែមទៀត នៅថ្ងៃខាង មុខ ឲ្យ បាន ការ បញ្ចុះអត្រាពន្ធ ពិសេស។

រនាំងគយ អាមេរិក សព្វថ្ងៃ ប្រសិន បើ គ្មា នកិច្ចព្រម ពៀង ថ្មីនេះទេ គឺសហភាព អឺរ៉ុបត្រូវ ជាប់ ពន្ធ យ៉ាង តិច ២៧% តែ ក្នុង វិស័យ ខ្លះទៀត អាច ដល់ ៤០%ឯណោះ ។ ក៏ប៉ុន្តែ ការ អនុវត្ត ពន្ធគយអាមេរិក ១៥%អាច នឹង ចូល ជាធរមាន ល្គឹក ណា តែ ច្បាប់ កំណត់ ពន្ធគយ អឺរ៉ុប ចូល ជា ធរមាណ ដូចគ្នា។ ស្នងការ ពាណិជ្ជ អឺរ៉ុប រំពឹង ថា នឹង អាច សម្រេច រួច រាល់ នៅ ដើមខែ កញ្ញា។

ជា ថ្នូរទៅនឹង ការ បញ្ចុះអត្រារនាំងពន្ធគយ អាមេរិក ត្រឹម ១៥%នេះ សហភាព អឺរ៉ុបត្រូវ លុប ចោលពន្ធគយ ចំពោះ ទំនិញឧស្សាហកម្ម មួយ ចំនួន របស់ អាមេរិក ហើយ ត្រូវ បើកផ្លូវទីផ្សារ ឲ្យទូលំទូលាយ ជាងមុន សម្រាប់ ទទួល ផលិតផល កសិកម្ម និង គ្រឿង សមុទ្ររបស់ អាមេរិក ។ លើសពីនេះ សហភាពអឺរ៉ុប ត្រូវ សន្យា បោះទុន ៧៥០ ពាន់ លានដុល្លារ សម្រាប់ ទិញ ថាមពល អាមេរិក ក្នុងរយៈពេល ៣ឆ្នាំ ហើយ ៤០ពាន់ លាន ដុល្លារ សម្រាប់ ទិញ បន្ទះឈីបកុំព្យូទ័រ ក្នុងការ អភិវឌ្ឍវិស័យ បញ្ញា សិប្បនិម្មិត។ ក្រុមហ៊ុន សហភាពអឺរ៉ុប ក៏ ត្រូវ វិនិយោគទុន ៦០០ ពាន់ លាន ដុល្លារបន្ថែមទៀត ទៅលើ វិស័យ សំខាន់ៗ ជា យុទ្ធសាស្ត្រ របស់ អាមេរិក ចាប់ពីពេល នេះ ដល់ ឆ្នាំ២០២៨៕

Nº.0950