ប្រធានាធិបតីកូរ៉េខាងជើង លុតជង្គង់គោរពវិញ្ញាណក្ខន្ធយោធាពលីជីវិតក្នុងសង្គ្រាម រុស្ស៊ី អ៊ុយក្រែន

ប្រធានាធិបតីកូរ៉េខាងជើង លុតជង្គង់គោរពវិញ្ញាណក្ខន្ធយោធាពលីជីវិតក្នុងសង្គ្រាម រុស្ស៊ី អ៊ុយក្រែន

ចេញផ្សាយនៅថ្ងៃទី២៣ ខែសីហា ឆ្នាំ២០២៥៖

មេដឹកនាំកូរ៉េខាងជើង គីម ជុងអ៊ុន រៀបចំពិធីគោរពវិញ្ញាណក្ខន្ធទាហានកូរ៉េខាងជើង ដែលបានពលីជីវិត នៅសមរភូមិអ៊ុយក្រែន។ លុតជង្គង់ចំពោះ រូប ថត យោធិនពាលី លោកប្រមុខដឹកនាំរបបក្រុង ព្យុងយ៉ាង បានពោលពាក្យសរសើរ ខ្មោចយុទ្ធជន ថាពោរពេញដោយ «វីរភាព» និង «គួរ ឲ្យ គោរព»។ ពិធីគោរពវិញ្ញាណក្ខន្ធ នេះ រៀបចំ នៅទីស្នាក់ការកណ្តាល របស់ គណបក្ស ពលករកូរ៉េខាងជើង។

ប្រធានាធិបតីកូរ៉េខាងជើង លោក គីម ជុង អ៊ុន បានលុតជង្គង់ ចំពោះ មុខ រូប ថត របស់ យោធាពលី ដោយ សម្តែង ទឹក មុខ ស្រពាប់ស្រពោន។ នេះបើតាម បណ្តាញ ឃោសនា រដ្ឋកូរ៉េ ខាងជើង KCNA ដោយ បង្ហាញរូប ភាពឲ្យឃើញទៀត ថា បន្ទាប់ពី បន្ទន់ជង្គង់ ដោយ ស្រងូត ស្រងាត់ ប្រមុខ ដឹកនាំ របបក្រុង ព្យុងយ៉ាង បាន បំពាក់ កម្រងផ្កា និងផ្តល់ មេដាយកិត្តិយស ថ្នាក់វីរបុរសជាតិសាធារណរដ្ឋប្រជានាមិត្ត ប្រជាធិតេយ្យកូរ៉េ ជូន កងវីរយុទ្ធជនក៏ក្លាហាន ដែល បាន សម្រេច បេសកកម្ម នៅ បរទេស ដ៏គួរ ឲ្យ មោទនភាព ។

នៅចំពោះមុខបណ្តា សមាជិក នៃទីបញ្ជាការយោធា កូរ៉េ ខាងជើង លោក គីម ជុងអ៊ុន បាន ថ្លែង កោតសរសើរ កងទ័ពថា កូរ៉េ ខាងជើងមាន ទាហាន ដ៏ ក្លាហាន។ វីរកងទ័ព កូរ៉េខាងជើង បា នបំពេញ ភារកិច្ចដែល ត្រូវ ធ្វើ ហើយ នឹង បន្ត បំពេញ កាតព្វកិច្ច នេះបន្តទៀត នៅថ្ងៃ អនាគត។ ប្រសាសន៍ នេះ ធ្វើឡើង នៅទីស្នាក់ការកណ្តាលរបស់គណបក្ស ពលករកូរ៉េខាងជើង ក្នុង រដ្ឋធានី ព្យុងយ៉ាង ដែលជាទី រៀបចំ ពិធីបុណ្យសព ផ្លូវការ នៅថ្ងៃព្រហស្បតិ៍ ទី២១សីហា  ដើម្បីជាការ គោរពវិញ្ញាណក្ខន្ធទាហានកូរ៉េខាងជើង ពាលីជីវិត ក្នុង សមរភូមិ តំបន់ Koursk ប្រទេស រុស្ស៊ី ។

ពាក្យសរសើរ កងទ័ពកូរ៉េខាងជើងថា«អង់អាចក្លាហាន»នេះ ក៏បាន ត្រូវ ចៅហ្វាយ វិមាន ក្រេមឡាំង លោក វ្ល៉ាឌីមៀរ ពូទីន បង្ហាញការយល់ឃើញនិង ចាត់ទុក ដូចគ្នា កាលពី សប្តាហ៍ មុន ថា ក្រុម កងទាហាន កូរ៉េ ខាង ជើង ពិតជា ពូកែ ក្លាហាន មែន ។

ក្នុង ឆ្នាំ២០២៤ រដ្ឋអំណាច ក្រុង ព្យុងយ៉ាង បាន បញ្ជូន យោធា ច្រើន ជាង ១០ ០០០នាក់ ទៅ ជួយ ច្បាំង រុស្ស៊ី ក្នុង សមរភូមិ តំបន់ Koursk។ មិនត្រឹមតែ បញ្ចូន យោធាប៉ុណ្ណោះទេ កូរ៉េ ខាងជើងក៏ ថែមទាំង បាន បញ្ជូនគ្រឿង សព្វាវុធ គ្រាប់រំសេវ មីស៊ីល និង ប្រព័ន្ធបាញ់ រ៉ូក្កែត រយៈចម្ងាយ ឆ្ងាយ ទៅឲ្យ របបក្រុង ម៉ូស្គូ ទៀត ផង។ នេះបើតាម ការអះអាង បញ្ជាក់ពីសំណាក់ ក្រុមភ្នាក់ងារ ស៊ើប ការណ៍ សម្ងាត់ កូរ៉េ ខាងត្បូង អ៊ុយក្រែន និង សហរដ្ឋអាមេរិក។ ក៏ប៉ុន្តែ របបក្រុងព្យុងយ៉ាង តែងតែ បដិសេធ ច្រាន ចោល រាល់ការ ចោទ ប្រកាន់តែរហូត ហើយ ទើបតែ ក្នុង ខែ មេសាឆ្នាំ២០២៥នេះ តែប៉ុណ្ណោះ ដែល កូរ៉េខាងជើង បាន ទទួល សារភាព ជាលើកទី១ ថា ពិត ជា បាន បញ្ចូន កងទ័ពខ្លួន ទៅជួយ ច្បាំង រុស្ស៊ី នៅ សមរភូមិអ៊ុយក្រែន ពិតមែន។

ផ្អែក តាម ទិន្នន័យ របស់ក្រុមភ្នាក់ងារស៊ើបការណ៍សម្ងាត់ក្រុង សេអ៊ូល ទាហាន កូរ៉េ ខាងជើង មិនតិច ជាង ៦០០នាក់នោះទេ ដែល បានពាលីជីវិត និង ច្រើន ពាន់ នាក់ ទៀត រងរបួស នៅ ក្នុង សង្គ្រាមរុស្ស៊ី ឈ្លាន ពាន អ៊ុយក្រែន៕ 

Nº.0952