ចេញផ្សាយនៅថ្ងៃទី២៨ ខែសីហា ឆ្នាំ២០២៥៖
ចំនួនជនអន្តោប្រវេសន៍ធ្លាក់ចុះ ក្រោមអាណត្តិ លោក ដូណាល់ ត្រាំនៅសហរដ្ឋអាមេរិក នយោបាយប្រឆាំងជនអន្តោប្រវេសន៍របស់លោកដូណាល់ ត្រាំបានបង្ហាញលទ្ធផលយ៉ាងច្បាស់ក្រឡែត។ យោងតាមវិទ្យាស្ថានស្រាវជ្រាវឈ្មោះPew Centerចំនួនជនអន្តោប្រវេសន៍បានធ្លាក់ចុះអស់ជាង១លាន៥សែននាក់។ ជាការធ្លាក់ចុះយ៉ាងខ្លាំង មិនធ្លាប់មាននៅក្នុងរយៈពេល៦០ឆ្នាំចុងក្រោយនេះ និងជាលើកទី១ក្នុងប្រវត្តិសាស្រ្តអាមេរិក ចំនួនជនអន្តោប្រវេសន៍ចាកចេញពីទឹកដីអាមេរិក មានចំនួនច្រើនជាងជនអន្តោប្រវេសន៍ដែលសម្រេចចិត្តកសាងជីវិតថ្មីនៅទីនោះ។
នយោបាយប្រឆាំងជនអន្តោប្រវេសន៍បានធ្វើឲ្យរដ្ឋបាលលោកដូណាល់ត្រាំទទួលលទ្ធផលគួរជាទីគាប់ចិត្ត។ ក្នុងរយៈពេលតែ៦ខែដំបូងនៃការវិលត្រលប់មកកាន់អំណាចរបស់លោកដូណាល់ ត្រាំ ចំនួនជនអន្តោប្រវេសន៍រស់នៅស្របច្បាប់ ឬមិនស្របច្បាប់ នៅទឹកដីអាមេរិក បានធ្លាក់ចុះគួរឲ្យកត់សំគាល់ ពីចំនួន៥៣,៣លាននាក់ នៅខែមករា មកនៅត្រឹម៥១,៩លាននាក់ ពោលគឺថយចុះជិត១លាន៥សែននាក់។ នេះបើតាមរបាយការណ៍ចេញផ្សាយដោយវិទ្យាស្ថានស្រាវជ្រាវ Pew Center។
បើតាមការពន្យល់របស់វិទ្យាសា្ថនខាងលើ ក្រឹត្យ និងវិធានការជិត២០០ ដែលលោកដូណាល់ត្រាំ ចុះហត្ថលេខាជាបន្តបន្ទាប់តាំងពីដើមអាណត្តិនេះបានធ្វើឲ្យចំនួនជនអន្តោប្រវេសន៍ដែលចាកចេញពីអាមេរិក មានច្រើនជាងចំនួនជនអន្តោប្រវេសន៍ដែលធ្វើដំណើរចូលមកស្នាក់នៅទឹកដីអាមេរិក។
ចំនួនជនអន្តោប្រវេសន៍ធ្លាក់ថយចុះដល់ទៅជិត១លាន ៥សែននាក់ ក្នុងរយៈពេលតែ៦ខែ ពោលគឺច្រើនជាងការរំពឹងទុករបស់លោកដូណាល់ត្រាំ ដែលបានដាក់គោលដៅ មហិច្ឆតា បណ្តេញជនអន្តោប្រវេសន៍ឲ្យបាន១លាននាក់ ក្នុងមួយឆ្នាំ។
រដ្ឋបាលលោកដូណាល់ ត្រាំតាមចាប់ បណ្តេញជនអន្តោប្រវេសន៍ពីទឹកដីអាមេរិក ដោយមិនខ្វល់ពីការរំលោភសិទ្ធិមនុស្ស សុខទុក្ខ ជោគវាសនារបស់ជនអន្តោប្រវេសន៍។ ដើម្បីអាចបើកប្រតិបត្តិការចាប់បណ្តេញជនអន្តោប្រវេសន៍ក្នុងទ្រង់ទ្រាយធំមិនធ្លាប់មានក្នុងប្រវត្តិសាស្រ្ត លោកដូណាល់ ត្រាំមិនខ្លាចនឹងបកប្រែច្បាប់មួយចំនួនដូចជាច្បាប់ Alien Enemies Act នៅឆ្នាំ១៧៩៨ ដើម្បីចាប់បញ្ជូនជនជាតិវ៉េណេស៊ុយអេឡាដែលអាមេរិកចោទប្រកាន់ថាជាភេរវជនទៅកាន់ប្រទេសអេលសាល់វ៉ាឌ័រ។ ដើម្បីសម្រួល ពន្លឿនដំណើរការចាប់បណ្តេញចេញជនអន្តោប្រវេសន៍ពីទឹកដីអាមេរិក លោកដូណាល់ ត្រាំ អតីតមហាសេដ្ឋីអ្នកជំនួញអចលនទ្រព្យ បានចរចា ដាក់សម្ពាធ ឲ្យប្រទេសទី៣ ដែលភាគច្រើនជាប្រទេសក្រីក្រឲ្យយល់ព្រមទទួលជនអន្តោប្រវេសន៍ ជនសុំសិទ្ធិជ្រកកោន នោះបើទោះបីជាប្រទេសទាំងនោះមិនធ្លាប់ជាកន្លែងឆ្លងកាត់របស់ជនអន្តោប្រវេសន៍ទាំងនោះក្តី។ នៅពាក់កណ្តាលខែ សីហានេះ ក្រសួងការបរទេសអាមេរិកទើបចុះហត្ថលេខាជាមួយប្រទេសប៉ារ៉ាហ្កាយដើម្បីក្លាយជាប្រទេសទី១២ដែលយល់ព្រមទទួលជនអន្តោប្រវេសន៍ខុសច្បាប់ពីអាមេរិក ជាថ្នូរនឹងកញ្ចប់ជំនួយ ឬការសម្រួលលក្ខខណ្ឌពន្ធគយដែលរដ្ឋបាលលោកដូណាល់ ត្រាំយកមកប្រើដាក់សម្ពាធលើគេគ្រប់គ្នា។
អង្គការការពារសិទ្ធិមនុស្សដូចជា Human Rights Watch បរិហាររិះគន់ និងព្រមានពីផលវិបាក ព្រោះថា ប្រទេសទី៣ដែលមួយចំនួនស្ថិតនៅទឹកដីអាហ្វ្រិក ដូចជាអ៊ូហ្កង់ដា ជាប្រទេសក្រីក្រ គ្មានរចនាសម្ព័ន្ធ ផ្តល់ការស្នាក់នៅត្រឹមត្រូវដល់ជនអន្តោប្រវេសន៍។ ម្យ៉ាងប្រទេសទី៣មិនមែនជាប្រទេសគោលដៅរបស់ជនអន្តោប្រវេសន៍ ដែលធ្លាប់ពុះពារឧបសគ្គដើម្បីទៅស្វែងរកជីវិតថ្មីនៅលើទឹកដីអាមេរិកឡើយ។
Nº.0965
