គណៈកម្មការអង្កេតថាមានបាត់ខ្លួនជាងបី សែននាក់ នៅស៊ីរីក្រោមរបបផ្តាច់ការ អាសាដ
ចេញផ្សាយនៅថ្ងៃទី២១ ខែសីហា ឆ្នាំ២០២៥៖
គណៈកម្មការ អង្កេត ដែល បង្កើត ឡើងនៅ ខែ ឧសភា ដោយ រដ្ឋាភិបាល បណ្តោះអាសន្ន ស៊ីរី បាន ទម្លាយ ឱ្យ ដឹង ថា មាន ករណី បាត់ ខ្លួនដល់ ទៅ ជាង ៣សែន នាក់ ក្នុងអំឡុង ពេល ៥០ ឆ្នាំ នៃ របប ផ្តាច់ការ ស៊ីរី ដឹកនាំ ឱ្យ ត្រកូល អាសាដ ឪនិង កូន។ បើ ចំនួន មនុស្ស បាត់ ខ្លួន ច្រើន ការងារ វែក រក អត្តសញ្ញាណដើម្បី បញ្ជាក់ ការ ពិត ក៏ នឹង ធំធេងខ្លាំងដែរ។
នៅ រវាង ពី ឆ្នាំ ១៩៧០ ដល់ ឆ្នាំ ២០២៤ ពោល គឺ ក្នុង អំឡុង ពេល ស៊ីរី ស្ថិត ក្រោម ការ ដឹកនាំ ផ្តាច់ការ របស់ លោក ហាហ្វេស អាល់អាសាដជា ឪពុក រហូត ដល់ ការ ធ្លាក់ពី តំណែង របស់ លោក បាស្ហារ អាល់អាសាដ ជា កូន មាន មនុស្ស ប្រមាណ ពី ១សែន ២ ម៉ឺននាក់ ដល់ ទៅ ជាង បី សែន បាន បាត់ ខ្លួន។ នេះ បើ តាមការ អះអាង របស់ លោក រីដា ចាល់ឃី Rida Jalkhi ប្រធាន គណៈកម្មការ អង្កេត លើ ករណី បាត់ ខ្លួន នៅ ស៊ីរី ទៅ កាន់ អ្នក សារព័ត៌មាន កាលពី ថ្ងៃ ចន្ទ ដើម សប្តាហ៍ ដោយ បញ្ជាក់ ទៀត ថា ជា សរុប ក្រុម អង្កេត បាន រក ឃើញនិង គូស ផែន ទី ចង្អុល ទី តាំង រណ្តៅ កប់ ខ្មោច រួម ចំនួន ៦៣ រណ្តៅ រាយប៉ាយ នៅ ពេញ ផ្ទៃ ប្រទេស ស៊ីរី។ មិន យូរ ទេ ស៊ីរី នឹង មាន ទិន្នន័យ ស្តី ពីករណី មនុស្ស ស្លាប់ និង បាត់ ខ្លួន ។
សម្រាប់ លោក រីដា ចាល់ឃី តួលេខ ពិត អាច ខ្ពស់ ជាង ការ ប៉ាន់ ស្មាននេះ ទៅ ទៀត ព្រោះ មាន ពលរដ្ឋ ស៊ីរី ជាច្រើន សិប ពាន់ នាក់ ណាស់ ត្រូវ ចាប់ ខ្លួន ឬ បាត់ ខ្លួន ពេល ផ្ទុះ សង្គ្រាម ស៊ីវិល ក្នុង ឆ្នាំ ២០១១ ក្រោយ ការ បង្ក្រាប បាតុកម្ម ប្រឆាំង រដ្ឋាភិបាល យ៉ាង ហិង្សា ពី សំណាក់ អតីត ប្រធានាធិបតី ស៊ីរី បាស្ហារអាល់អាសាដ។ ក្នុង ពេល មាន សង្គ្រាមដែល ផ្តាច់ ជីវិត មនុស្ស អស់ ជាង កន្លះ លាន នាក់ គ្រប់ ភាគី មិន ថា រដ្ឋាភិបាល ឬ ក្រុម ជីហាត អង្គការ រដ្ឋ អ៊ីស្លាម ទេ សុទ្ធ តែ ជាប់ ចោទ ពី បទ ប្រព្រឹត្ត ទង្វើ ព្រៃផ្សៃ ចាប់ មនុស្ស យក ទៅ ឃុំ ឃាំង និង សម្លាប់។ គេ នៅ ចង ចាំ រូបភាព អ្នក ទោស រាប់ ពាន់ នាក់ បាន ទទួល សេរីភាព ក្រោយ ការ ដួល រលំ នៃ របប ផ្តាច់ការ បាស្ហារ អាល់អាសាដ កាលពី ចុង ឆ្នាំ ២០២៤។ ជាង មួយ សែន នាក់ បាន ស្លាប់ ដោយ រង ទារុណកម្ម ឬ ទ្រាំ នឹង លក្ខខណ្ឌ ក្នុង ពន្ធនាគារ មិន រួច។ នេះ បើ តាម តួលេខ ផ្តល់ ដោយ ក្រុម អ្នក សង្កេតការណ៍ សិទ្ធិមនុស្ស ស៊ីរី។
ក្រៅ ពី អ្នក បាន ទទួល ការ ដោះលែង និង ស្លាប់ ពលរដ្ឋ ស៊ីរី ជាច្រើន ពាន់ គ្រួទៀត បន្ត ស្វែង រកដាន សមាជិក គ្រួសារបាត់ ខ្លួន។ តែ ជា ការ ងារ ដ៏ លំបាក បំផុត ! នេះ ជា ប្រសាសន៍ របស់ ប្រធាន អង្គការ កាកបាទ ក្រហម កាលពី ថ្ងៃទី ១៩ សីហា ដែល កំពុង តាម ដានសំណុំ រឿង បាត់ខ្លួន៤៣០០០ ករណី ។
ការ បាត់ ខ្លួន និង ស្លាប់ ជា មរតក ដ៏ ឈឺចាប់ បំផុត ដែល របប ផ្តាច់ការ ស៊ីរី ដឹកនាំដោយ លោក បាស្ហារអាល់អាសាដ បាន បន្សល់ ទុក។ ដូច្នេះ ហើយ បាន ជា ប្រមុខ ដឹកនាំបណ្តោះ អាសន្ន ស៊ីរី លោក អាម៉េដ អាល់ឆារ៉ា ដែល ជា អតីត មេដឹកនាំ ជីហាត អ៊ីស្លាម ម្នាក់ និង ជា អ្នក ផ្តួល រដ្ឋាភិបាល អាសាដ បាន សម្រេច បង្កើត គណៈកម្មការ អង្កេត ឯករាជ្យ ដើម្បី ស្វែង រក ការ ពិត ចំពោះ ទង្វើ រំលោភបំពាន មនុស្ស ដ៏ ធ្ងន់ធ្ងរ ក្នុង របប មុន និង ដើម្បី រក ឱ្យ ឃើញ អំពី ជោគ វាសនា របស់ អ្នក បាត់ ខ្លួន ព្រមទាំង ជនរងគ្រោះ នៃ ការ បាត់ ខ្លួន ដោយ បង្ខំ។ គណៈកម្មការ យុត្តិធម៌អន្តរកាល ក៏ ទើប បង្កើត ឡើង ដែរ ដោយ ត្រូវ សហការ ជាមួយ អាជ្ញាធរ មាន សមត្ថកិច្ច ដើម្បី ផ្តល់យុត្តិធម៌ និង សំណង ជំងឺ ចិត្ត ដល់ ជន រងគ្រោះ ដើម្បី កុំ ឱ្យ ឧក្រិដ្ឋកម្ម បែ ប នេះ កើត ឡើង ជា ថ្មី និង ដើម្បី ផ្សះផ្សា ជាតិ៕
Nº.0947
