នៅអេស្ប៉ាញនិងព័រទុយហ្កាល់ ភ្លើងឆេះព្រៃមានទំហំសរុប៥៦ម៉ឺនហិកតា គិតពីដើមឆ្នាំ២០២៥មក
ចេញផ្សាយនៅថ្ងៃទី១៩ ខែសីហា ឆ្នាំ២០២៥
ធាតុអាកាសក្តៅនិងស្ងួតខ្លាំងឆ្នាំនេះ បានបង្កជាភ្លើងឆេះព្រៃយ៉ាងសន្ធោសន្ធៅ នៅតាមប្រទេសអឺរ៉ុប ដូចជាក្រិក បារាំង និងជាពិសេសអេស្ប៉ាញនិងព័រទុយហ្កាល់។ គិតពីដើមឆ្នាំ២០២៥មក ភ្លើងបានលេបត្របាក់ព្រៃឈើ លំនៅដ្ឋានប្រជាជន ក្នុងទំហំផ្ទៃដីសរុបជាង៥៦ម៉ឺនហិកតា នៅអេស្ប៉ាញនិងព័រទុយហ្កាល់។ គិតត្រឹមថ្ងៃចន្ទទី១៨សីហា ក្រុមពន្លត់អគ្គីភ័យកំពុងព្យាយាមយ៉ាងលំបាក ដើម្បីពន្លត់ភ្លើងនិងបង្អាក់ការឆេះរាលដាល។
គិតពីដើមឆ្នាំ២០២៥ មកទល់ថ្ងៃទី១៨សីហា នៅអេស្ប៉ាញភ្លើងបានលេបត្របាក់ដៃព្រៃនិងផ្ទះសំបែងប្រជាជន ក្នុងទំហំចំនួន៣៤៣០០០ហិកតា។ នេះគឺជាទំហំដ៏ធំធេងបំផុត លើសឆ្នាំ២០២២ ដែលមាន៣០៦០០០ហិកតា។ តំបន់ភាគខាងលិច និងភាគពាយ័ព្យអេស្ប៉ាញ បានរងគ្រោះខ្លាំងបំផុត ដោយមហន្តរាយភ្លើងឆេះព្រៃ។ គិតចាប់ពីចុងខែកក្កដាមក រកកំដៅសីតុណ្ហភាពក្តៅខ្លាំងនិងស្ងួត ដល់ទៅជាង៤០អង្សារសេ បានគ្របដណ្តប់តំបន់ទាំងនេះ។
អាជ្ញាធរអេស្ប៉ាញបានជម្លៀសមនុស្សជាច្រើនម៉ឺននាក់ ចេញពីតំបន់គ្រោះថ្នាក់ និងតំបន់ប្រឈម ខណៈសីតុណ្ហភាពនៅតែមិនចុះត្រជាក់ ហើយផ្សែងខ្មៅក្រាសលាយឡំដោយផេះផង់ បានគ្រប់ដណ្តប់លើផ្ទៃមេឃ ធ្វើឲ្យមនុស្សពិបាកដកដង្ហើម។ នៅអេស្ប៉ាញ គិតត្រឹមថ្ងៃទី១៨សីហា មានមនុស្សស្លាប់ចំនួន៤នាក់ដោយភ្លើងឆេះព្រៃ ក្នុងនោះមានអ្នកពន្លត់អគ្គីភ័យម្នាក់។ លោករដ្ឋមន្ត្រីក្រសួងការពារជាតិអេស្ប៉ាញ បានលើកឡើងថា ស្ថានភាពនៅតែអាសន្ន។ គិតត្រឹមថ្ងៃចន្ទទី១៨សីហា មានចំណុចភ្លើងប្រមាន ២៣ទីតាំងដែលនៅតែសកម្ម ធ្វើឲ្យក្រុមសង្គ្រោះត្រូវតែបន្តប្រឹងពន្លត់។ ទំហំភ្លើងឆេះព្រៃដ៏សែនធ្ងន់ធ្ងរ ដែលគេអាចមើលឃើញយ៉ាងច្បាស់ពីលើអាកាស តាមរយៈរូបភាពដោយផ្កាយរណប។
ប្រឈមនឹងមហន្តរាយកាន់តែធំឡើងៗពីមួយឆ្នាំទៅមួយឆ្នាំនេះ លោកនាយករដ្ឋមន្ត្រីអេស្ប៉ាញ ប៉េដ្រូ សាន់ឈែស បានប្រកាសនៅព្រឹកថ្ងៃទី១៨សីហា បង្កើតកាតិកាសញ្ញាជាតិអេស្ប៉ាញ ដើម្បីប្រយុទ្ធនឹងការកើនឡើងកំដៅភែនដី ព្រមទាំងភាពអាសន្ននៃវិបត្តិអាកាសធាតុ។
ព័រទុយហ្កាល់នៅជាប់អេស្ប៉ាញ ក៏ត្រូវភ្លើងព្រៃលេបត្របាក់យ៉ាងខ្លាំងអស្ចារ្យដែរឆ្នាំនេះ។ ជាសរុប ជាមួយអេស្ប៉ាញ គិតពីដើមឆ្នាំមក ភ្លើងបានលេបត្របាក់ គិតជាទំហំផ្ទៃដីចំនួនយ៉ាងហោច៥៦ម៉ឺនហិកតារួចហើយ ខណៈចំណុចភ្លើងឆេះសកម្មច្រើនសិបកន្លែងទៀត នៅមិនទាន់ពន្លត់បានទាំងស្រុងនៅឡើយ។ បណ្តាប្រទេសអឺរ៉ុប បានបញ្ជូនកម្លាំងក្រុមពន្លត់អគ្គីភ័យច្រើនពាន់នាក់ទៅជួយ ទៅតាមការស្នើសុំពីអាជ្ញាធរអេស្ប៉ាញនិងព័រទុយហ្កាល់។ ឆ្នាំនេះអេស្ប៉ាញបំបែកឯតទគ្គកម្មផ្ទាល់ខ្លួន តែព័រទុយហ្កាល់វិញ ធ្លាប់បានបំបែកឯតទគ្គកម្មអឺរ៉ុប កាលពីឆ្នាំ២០១៧ ដោយភ្លើងបានឆាបឆេះផ្ទៃដីទំហំ ៥៦៣០០០ហិកតា និងបានផ្តាច់ជីវិតមនុស្ស១១៩នាក់៕
Nº.0942
