អាជ្ញាធរឥណ្ឌូណេស៊ីចង់ បន្ថយ សំឡេងភ្លេងធុងបាស់ ដែលប៉ះពាល់ដល់ ភាពស្ងប់ស្ងាត់ និងសុខភាព របស់ប្រជាជន

អាជ្ញាធរឥណ្ឌូណេស៊ីចង់ បន្ថយ សំឡេងភ្លេងធុងបាស់ ដែលប៉ះពាល់ដល់ ភាពស្ងប់ស្ងាត់ និងសុខភាព របស់ប្រជាជន

ចេញផ្សាយនៅថ្ងៃទី២៥ ខែសីហា ឆ្នាំ២០២៥៖

នៅកោះហ្សាវ៉ា ប្រទេស ឥណ្ឌូណេស៊ី កម្មវិធីរាំសប្បាយចាក់ធុងបាស់ថ្លង់ទ្រហឹងអឺងកងតាមផ្លូវ កំពុងតែបង្កការរំខានយ៉ាងខ្លាំងដល់ភាពស្ងប់ស្ងាត់ និងបង្កផលប៉ះពាល់ទៅលើ សុខភាពរបស់ ប្រជាជន ។ ប្រឈមនឹងបញ្ហានេះ អាជ្ញាធរឥណ្ឌូណេស៊ី បាន ចេញវិធានការ បន្តិចបន្តួចដើម្បី បន្ថយ សំឡេងធុងបាស់។ ដោយឡែក ក្រុមប្រឹក្សា សាសនាអ៊ីស្លាមវិញប្រចាំតំបន់នៅឥណ្ឌូណេស៊ីវិញ បានប្រកាសចាត់ទុក ការចាក់ភ្លេងតាមធុងបាស់ឮៗខ្លាំង គឺជាទង្វើខុសនឹងច្បាប់សាសនាអ៊ីស្លាម ដែលហៅថា « ហារ៉ាំ »។

សំឡេង ភ្លេង ញ័រញាក់ បន្លឺចេញពីធុងបាស់ធំ ៗ ដែល គេដាក់ ត្រួតគ្នាលើរថយន្តបើកតាមបណ្តោយ ផ្លូវ បានធ្វើ ឲ្យ អ្នករស់នៅខេត្ត ហ្សាវ៉ាបូព៌ា ស្ថិតនៅខាងកើតកោះហ្សាវ៉ាឥណ្ឌូណេស៊ី ធុញថប់ អត់ទ្រាំមិនបាន ។ បុរសម្នាក់រស់នៅក្នុងភូមិ Ngantru បានប្រាប់ ថា សឹងតែរៀងរាល់ថ្ងៃ ជាពិសេសចុងសប្តាហ៍ សំឡេងធុងបាស់ ថ្លង់ទ្រហឹងស្ទើរហែកក្រដាសត្រចៀក បានលាន់ឮចាប់តាំងពីម៉ោង ១ថ្ងៃរសៀល រហូតដល់ ម៉ោង ៣ទៀបភ្លឺ។ អ្នកភូមិរូបនេះអះអាងថា សំឡេងភ្លេងខ្លាំងៗ លាយឡំដោយ ការរាំរែក យ៉ាងអាណាធិបតេយ្យ និង ការសេពសុរា ផង បាន បង្កការរំខានខ្លាំងណាស់ មកលើប្រជាជនមូលដ្ឋាន ។

នៅលើបណ្តាញសង្គម ប្រជាជនឥណ្ឌូណេស៊ីខ្លះ បាន បង្ហោះរូបភាព វីដេអូ បង្ហាញ ឲ្យ ឃើញ ជញ្ជាំង ប្រេះ ដំបូលផ្ទះរង្គោះរង្គើធ្លាក់ជ្រុះក្បឿង និង បង្អួចកញ្ចក់ប្រេះបែកជាដើម ។ល។ ដោយសារតែកម្លាំងសំឡេងធុងបាស់ ដ៏ ខ្លាំងក្លា ។ ធុងបាស់ធំៗ ដែលគេកែឆ្នៃ ហើយដាក់គចង ផ្អោបលើគ្នា ត្រូវ គេ ហៅថា “Sound Horeg” ជាភាសាអ្នកស្រុកហ្សាវ៉ា ប្រែមកថា សំឡេងញ័ររញ្ជួយ។ អ្នកចូលរួមខ្លះបានបង្ហោះ រូបថត បង្ហាញឲ្ឃឃើញ សំឡេងភ្លេង ឮដល់ទៅ កម្រិត ១៣០ ដេស៊ីប៊ែល ។

មិនអាចយកដៃខ្ទប់ត្រចៀកទៀតបាន អាជ្ញាធរខេត្ត ហ្សាវ៉ាបូព៌ា បានប្រកាស វិធាន ការ កាលពីពេលថ្មីៗនេះ ដើម្បីកាត់បន្ថយ សំឡេងធុងបាស់ ។ លោកស្រី Khofifah Indar Parawansa អភិបាល ខេត្តហ្សាវ៉ាបូព៌ា បានប្រាប់នៅថ្ងៃសៅរ៍ ទី ២៣សីហាថា ដើម្បី ការពារ សុខភាព និង សន្តិសុខ ប្រជាពលរដ្ឋ ចាប់ពីពេលនេះទៅ សំឡេងធុងបាស់មិនអាច ឲ្យ លើសពី ១២០នៃកម្រិតដេស៊ីបែលបានទេ ហើយត្រូវហាមឃាត់ នៅ ទីកន្លែងដែលកៀកនឹងសាលារៀន មន្ទីរពេទ្យ រឺទីកន្លែងគោរពជំនឿសាសនាជាដើម។

ដោយឡែក កាលពីខែកក្កដាកន្លងទៅ ក្រុមប្រឹក្សាអ៊ីស្លាម នៅ ខេត្តហ្សាវ៉ាបូព៌ា បានចេញលិខិត ប្រកាសមួយ ចាត់ទុកសំឡេងភ្លេងធុងបាស់ខ្លាំងៗ នៅក្នុងកម្មវិធីបុណ្យ អាពាហ៍ពិពាហ៍ ឬការ ជួបជុំផ្សេងៗ គឺត្រូវហាមឃាត់ ព្រោះមានលក្ខណៈ “ហារ៉ាំ” ពោលគឺផ្ទុយពី ទំនៀមទម្លាប់ ច្បាប់សាសនាអ៊ីស្លាម ។

សូមបញ្ជាក់ថា ផ្អែកតាម អង្គការសុខភាពពិភពលោក ការ ទទួលរងនូវ សំឡេងឮខ្លាំងលើសពី ៨៥ដេស៊ីបែល គឺអាច បង្កឲ្យ មាន បញ្ហាខូចត្រចៀក ក្នុងរយៈពេលយូរ ។ តែបើសំឡេងលាន់ឮលើស១២០ដេស៊ីបែល គឺអាចនឹងធ្វើឲ្យខូចក្រដាសត្រចៀក ភ្លាមៗមួយរំពេចតែម្តង ។ មិនត្រឹមប៉ុណ្ណោះទេ សំឡេងលាន់ឮខ្លាំង អាចបង្កឲ្យ បេះដូងគាំងអាចស្លាប់បាន ។

មិនខុសពីបណ្តាប្រទេសអាស៊ីមួយចំនួន ប្រមាណ ជាង ១០ឆ្នាំចុងក្រោយនេះ គេសង្កេតឃើញថា កម្មវិធីចាក់ធុងបាស់រាំ និងដង្ហែរតាមផ្លូវ យ៉ាងទ្រហឹងអឺងកង បានផុសផុលយ៉ាងខ្លាំងនៅលើកោះហ្សាវ៉ា។ បណ្តាញ ព័ត៌មាន ឥណ្ឌូណេស៊ីបានផ្សាយ ថា ប៉ុន្មានថ្ងៃមុននេះ មាន ស្ត្រីម្នាក់ បាន ស្លាប់ ដោយ គាំងបេះដូង នៅក្នុងកម្មវិធីដើរដង្ហែរក្បួន ចាក់ភ្លេងធុង បាស់ ៗ ខ្លាំង ហួសហេតុ។ ប្រភពដដែលនេះអះអាងទៀតថា គេសង្កេតឃើញ មានករណីមនុស្ស មានបញ្ហាឈឺត្រចៀក ស្តាប់លែងឮ កាន់តែច្រើនឡើង។

យ៉ាងណាក៏ដោយ វិធានការ របស់អាជ្ញាធរឥណ្ឌូណេស៊ីដើម្បីបន្ថយសំឡេងធុងបាស់ ត្រូវបានប្រជាជន មូលដ្ឋានខ្លះ ចាត់ទុកថា ដូចជាអឹមអៀនពេក ហើយ។ ស្របពេល ដែល កម្រិតសំឡេងឧឃោសនសព្ទនៅក្នុងកម្មវិធីជួបជុំធ្វើបាតុកម្ម នៅទីលានសាធារណៈ គឺត្រូវច្បាប់កំណត់ថាមិន ឲ្យ លើស៨៥ដេស៊ីបែល តែពេលចាក់ធុងបាស់រំខាន បែរជា អនុញ្ញាតឲ្យ សំឡេងភ្លេង មានដល់ទៅ ១២០ ដេស៊ីបែលទៅវិញ ។ 

Nº.0957