របាយការណ៍ អ.ស.ប. ថា មនុស្សជាង ២ពាន់លាននាក់ គ្មានទឹកស្អាតប្រើប្រាស់

របាយការណ៍ អ.ស.ប. ថា មនុស្សជាង ២ពាន់លាននាក់ គ្មានទឹកស្អាតប្រើប្រាស់

ចេញផ្សាយនៅថ្ងៃទី២៧ ខែសីហា ឆ្នាំ២០២៥៖

មនុស្សជាង ២ពាន់លាននាក់ នៅលើពិភពលោកយើងនេះ គ្មានទឹកស្អាតបរិភោគ ឬគ្មានប្រព័ន្ធទឹកស្អាតដែលមានអនាម័យគួរជាទី ទុកចិត្តទេ។ នេះបើផ្អែកតាមរបាយការណ៍ថ្មីមួយ របស់អង្គការសហប្រជាជាតិ ចេញផ្សាយ កាលពីថ្ងៃអង្គារទី ២៦សីហា ។ ទាំងអង្គការសុខភាពពិភពលោក និងអង្គការUnicef ជាដើម សុទ្ធតែបានបង្ហាញការបារម្ភ ទាក់ទិននឹង ភាពយឺតយ៉ាវនៅទូទាំងពិភពលោក ស្តីពី ការរៀបចំប្រព័ន្ធបណ្តាញទឹកស្អាត មានអនាម័យ ហើយដែលការយឺតយ៉ាវនេះ ធ្វើ ឲ្យ មនុស្សច្រើនពាន់លាននាក់ប្រឈមនឹងជម្ងឺដង្កាត់នានា ។

យោងតាមរបាយការណ៍ថ្មីមួយរបស់អង្គការសហប្រជាជាតិ ចេញផ្សាយថ្ងៃទី ២៦សីហា ២០២៥ មានមនុស្ស យ៉ាងហោច២ពាន់ លាននាក់ នៅទូទាំងពិភពលោក ដែល គ្មានទឹកស្អាតប្រើប្រាស់ ។ ទីភ្នាក់ងារសហប្រជាជាតិ ទទួល បន្ទុក សុខភាព កុមារ បាន អះអាងថា កាលពីឆ្នាំ ២០២៤ មនុស្ស ម្នាក់ ក្នុងចំណោម ៤នាក់ នៅតែមិនអាចទទួលបាននូវសេវា ទឹកស្អាត ដែលមានអនាម័យនិងជាទីទុកចិត្ត បានទេ។

ការសិក្សាដែល ធ្វើឡើងរួមគ្នា ដោយអង្គការសុខភាពពិភពលោក និង អង្គការUnicef បានទាញសញ្ញាអាសន្នថា ដំណើរការ អភិវឌ្ឍន៍រៀបចំបណ្តាញទឹកស្អាត មានការយឺតយ៉ាវខ្លាំងណាស់។ ភាពយឺតយ៉ាវ ដែលធ្វើឲ្យ មនុស្សច្រើនពាន់លាននាក់ ត្រូវប្រឈមនឹងបញ្ហាសុខភាព ជម្ងឺដង្កាត់នានា ដោយសារតែប្រើប្រាស់ទឹកមិនស្អាត។ ស្ថាប័នទាំងពីរនេះ បាន លើកឡើងថា ពិភពលោក ពិតជាពុំអាច ឈានទៅសម្រេចកម្មវត្ថុរួម ដែល គ្រោង ផ្គត់ផ្គង់ ទឹកស្អាតឲ្យ បានទាំងស្រុង នៅរវាង ឆ្នាំ ២០៣០ឡើយ ។

លោក Rüdiger Krech មន្ត្រីទទួលបន្ទុក បរិស្ថាននិងបម្រែបម្រួល អាកាសធាតុ នៅអង្គការសុខភាពពិភពលោក បានលើកឡើងថា ទឹកស្អាត និងប្រព័ន្ធអនាម័យ ល្អ វា គឺជាសិទ្ធិ ជាមូលដ្ឋានរបស់មនុស្សគ្រប់រូប ស្មើៗគ្នា ។ ដូច្នេះ គ្រប់ប្រទេសនិងស្ថាប័នទាំងអស់ ត្រូវតែរួសរាន់ធ្វើការ ដើម្បី ផ្តល់សិទ្ធិនេះ ទៅ ឲ្យ អ្នកដែលមិនទាន់ បានទទួលវា ដោយ សមភាពបំផុត ។

យោងតាមតួលេខរបាយការណ៍ខាងលើ បើគិតពីឆ្នាំ ២០១៥មក មានមនុស្សប្រមាណ ៩៦១លាននាក់ បន្ថែមទៀត ដែល ទទួលសេវាទឹកស្អាតប្រើប្រាស់ ក្នុងកម្រិត ស្តង់ដារមួយ គួរឲ្យទុកចិត្តបំផុត ។ មានន័យថា ការលាតសន្ធឹង នៃ ការ ផ្គត់ផ្គង់ទឹកស្អាត បានកើនឡើង ពី ៦៨% ដល់ ៧៥%។ ក្នុងចំណោម មនុស្ស ប្រមាណ ២១០០លាននាក់ ដែលគ្មានទឹកស្អាតបរិភោគ គឺមានប្រមាណ ១០៦លាននាក់ ដែលនៅបន្តប្រើប្រាស់ និងបរិភោគ ទឹក ដែលមានប្រភព ស្ថិតលើគម្របផ្ទៃដីដោយផ្ទាល់ ដូចជាទឹកបឹង ខ្ពប ស្រះ ស្ទឹង ទន្លេ ឬទឹកព្រែកជាដើម ដោយ សារតែពួកគេគ្មានជម្រើស។ បើប្រៀបធៀបទៅ កាលពី១០ឆ្នាំមុន ចំនួន អ្នកប្រើប្រាស់ទឹកដោយ ផ្ទាល់ លើគម្របផ្ទៃដី គឺបានថយចុះចំនួន ៦៥លាននាក់ ។ ហើយប្រទេសដែលបានឈានទៅ លុបបំបាត់ ការប្រើប្រាស់បរិភោគ ទឹកទន្លេទឹកបឹងដោយ ផ្ទាល់ គឺកើនពី ១៤២ ដល់១៥៤ប្រទេស ។

Nº.0962