ភូមា បិទច្រក ព្រំដែនជាមួយ ថៃ ដើម្បីខ្ទប់ប្រភពហិរញ្ញវត្ថុរបស់ក្រុមឧទ្ទាមប្រដាប់អាវុធ

ភូមា បិទច្រក ព្រំដែនជាមួយ ថៃ ដើម្បីខ្ទប់ប្រភពហិរញ្ញវត្ថុរបស់ក្រុមឧទ្ទាមប្រដាប់អាវុធ

ចេញផ្សាយនៅថ្ងៃទី២០ ខែសីហា ឆ្នាំ២០២៥៖

របប សឹក ភូមា បាន សម្រេច បិទ ច្រកព្រំដែន ដ៏ សំខាន់ ជាងគេ មួយ ជាមួយ ថៃ តាំងពី ថ្ងៃ ចន្ទទី ១៨ សីហា មក។ នេះ បើ តាមការ អះអាង របស់ អ្នក នាំពាក្យ យោធា ភូមា នៅ ថ្ងៃ អង្គារ ទី ១៩ សីហា ២០២៥។ ប៉ុន្តែ ការ បិទ ច្រក ព្រំដែនក្នុង បំណង កាត់ ផ្តាច់ ប្រភព ហិរញ្ញវត្ថុ របស់ ក្រុម ឧទ្ទាម ប្រដាប់ អាវុធ នៅ ភូមា នេះ បាន ធ្វើ ឱ្យភាគី ថៃ ខាត បង់ ថវិកា អស់ប្រមាណ ១៣០ពាន់ លាន បាត។

នៅ ថ្ងៃ ទី ១៨ សីហា អាជ្ញាធរ ភូមា បាន សម្រេច បិទ ច្រក ព្រំដែនឆ្លង ទៅ ថៃ ក្នុង រដ្ឋ Kayin ទល់ មុខ ស្រុកMae Sot ថៃ មិន ឱ្យ យាន យន្ត ដឹកទំនិញ ពាណិជ្ជកម្ម នានា ចេញ ចូល ដោយ គ្មាន ពន្យល់ អំពី មូលហេតុ អ្វី ទាំង អស់។ រហូត ថ្ងៃ អង្គារ ទី ១៩ សីហា ទើប អ្នក នាំ ពាក្យ យោធា ចេញ មុខ មក បំភ្លឺ។ បើ តាម ប្រភព យោធា ទទួល កិច្ចការ ព្រំដែន ភូមា ច្រក ព្រំដែនត្រង់ ស្ពាន មិត្តភាព ភូមា ថៃ Myawaddy បាន បិទ ក្នុង បំណង កាត់ ផ្តាច់ ប្រភព ហិរញ្ញវត្ថុ កុំ ឱ្យ ហូរ ចូល ទៅ ដល់ ដៃ ក្រុមឧទ្ទាម ប្រដាប់ អាវុធ ជនជាតិ ភាគ តិច ដែល ប្រយុទ្ធ ប្រឆាំង នឹង រដ្ឋាភិបាល សឹក ភូមា។

តាំង ពី ធ្វើ រដ្ឋប្រហារ ទម្លាក់ រដ្ឋាភិបាល ស៊ីវិល ភូមា នៅ ខែកុម្ភៈ ២០២១ មក ក្រុមយោធា ជា អ្នក គ្រប់ គ្រង ច្រក ព្រំដែនMyawaddy ដែល ជា ច្រក ពាណិជ្ជកម្ម ដ៏ សំខាន់ មាន ការ ផ្តោះ ប្តូរ ទំនិញ ក្នុង មួយ ខែៗទំហំ ជាង ១២០ លាន ដុល្លារ អាមេរិករវាង ប្រទេស ជិត ខាងទាំងពីរ។ ប៉ុន្តែ ក្រុម ឧទ្ទាម ប្រដាប់ អាវុធ មាន ប្រៀប ខ្លាំង ក្នុង តំបន់ និង ជា អ្នក ប្រមូល ផល ពី ចរន្ត ពាណិជ្ជកម្ម នេះអស់ មួយ ភាគ ធំ តាម រយៈ ការ ដាក់ រនាំង ចាំ កាក់ នៅ តាម បណ្តោយ ផ្លូវ ភ្ជាប់ ពី ច្រក ព្រំដែន ទៅរដ្ឋធានី ពាណិជ្ជកម្ម រ៉ង់ហ្គូន ។ ហេតុ ដូច្នេះ ហើយ បាន ជា រដ្ឋាភិបាល សឹក ដែល ទើប ប្រកាស រៀប ចំ ការ បោះឆ្នោត សភា នៅ ថ្ងៃ ទី ២៨ ធ្នូ ចុង ឆ្នាំ ចង់ បោស សម្អាត ពាណិជ្ជកម្ម ខុស ច្បាប់ ដែល ចិញ្ចឹម ពួក ឧទ្ទាម ប្រដាប់អាវុធ។

ប្រភព ថៃ សុំ មិន បញ្ចេញ ឈ្មោះ ក៏ បាន គូស បញ្ជាក់ ដូច គ្នា ថា របប សឹក ភូមា ចាត់ វិធានការ បិទ ច្រក ព្រំដែន ដើម្បី ច្របាច់ក ក្រុម ឧទ្ទាម ជនជាតិ ភាគ តិច ដើម្បី សាកល្បង រារាំង កុំឱ្យ ក្រុម បះបោរ នេះ បាន ចំណេញ ប្រាក់ ច្រើន ដូច មុន។ ប៉ុន្តែ ផលវិបាក ភ្លាម ៗ មិនមែន ប៉ះពាល់ ត្រឹម ខាង ភូមា ទេ។ ការ នាំចេញ និង សកម្មភាព ពាណិជ្ជកម្ម នៅ តាម ព្រំ ដែន ខាង ភាគី ថៃ កំពុង រង ផល រំខាន យ៉ាង ខ្លាំង ។ អាជ្ញាធរ ថៃ កំពុង ព្យាយាម ចរចាជា បន្ទាន់ ជាមួយ រដ្ឋាភិបាល សឹក ភូមា ដើម្បី ស្វែង រក ដំណោះស្រាយ។

ការ សម្រេច បិទ ច្រក ព្រំ ដែន Myawaddy ពី សំណាក់ អាជ្ញាធរ ភូមា ជា ឯកតោ ភាគី ដោយ គ្មាន ជូន ដំណឹង ដល់ ភាគី ថៃ មុន សោះ បូក នឹង វិធានការ ថ្មី រឹត បន្តឹង ការ ត្រួត ពិនិត្យ ទំនិញ នាំ ចូល ពី សំណាក់ អាជ្ញាធរ ថៃ ដែល ត្រូវ ចូល ជា ធរមាន ចាប់ ពី ថ្ងៃ ទី ២០ សីហាទៀត ក្រុម ពាណិជ្ជករ ព្រួយ បារម្ភ កាន់ តែ ខ្លាំង ខ្លាចបាន ធ្វើ ឱ្យ ចរាចរណ៍ទំនិញ ធំៗ តាម ផ្លូវ គោក និង ផ្លូវ ទឹក ព្រមទាំង ប្រព័ន្ធ ដោះដូរ ពាណិជ្ជកម្មតាម ព្រំដែន ត្រូវ រអាក់រអួល និង ជាប់ គាំងកាន់ តែ យូរ ។ បើ តាម តួលេខ ផ្លូវ ការ របស់ អាជ្ញាធរ ស្រុក Mae Sot ថៃ ការនាំ ចេញ តាម ព្រំ ដែន ភូមា បាន ធ្លាក់ ចុះ យ៉ាង ខ្លាំង ពី ជិត ៥០ពាន់ លាន បាត មក នៅ ត្រឹម ជាង ១០ ពាន់ លាន បាត ៕

Nº.0945