របាយការណ៍អង្គការ OPEP៖ តម្រូវការប្រេងក្នុងលោកកើនឡើងជានិច្ច រហូតដល់ឆ្នាំ ២០៥០

របាយការណ៍អង្គការ OPEP៖ តម្រូវការប្រេងក្នុងលោកកើនឡើងជានិច្ច រហូតដល់ឆ្នាំ ២០៥០

ចេញផ្សាយនៅថ្ងៃទី១១ ខែកក្កដា ឆ្នាំ២០២៥៖

នាយកអង្គការនៃប្រទេសនាំប្រេងចេញ ហៅកាត់ OPEP បានអះអាងនៅថ្ងៃព្រហស្បតិ៍ ទី១០ កក្កដា ថា ពិភពលោកត្រូវការប្រេងកាន់តែច្រើនឡើងជាលំដាប់ រហូតដល់ប្រមាណ ២០% នៅរវាង២៥ឆ្នាំ ខាងមុខ។ នាយកអង្គការរូបនេះក៏បានលើកឡើងថា ការងាកចេញភ្លាមៗពីថាមពលផូស៊ីល ទៅប្រើថាមពលបៃតងវិញ ជារឿងមិនអាចទៅរួចឡើយ។ ការព្យាករណ៍អំពីកំណើនតម្រូវការប្រេងរបស់អង្គការនេះ គឺផ្ទុយនឹងកិច្ចខិតខំប្រឹងប្រែងរបស់អ្នកជំនាញអាកាសធាតុ ប្រយុទ្ធប្រឆាំងនឹងការឡើងកំដៅផែនដីរបស់អ្នកជំនាញអាកាសធាតុ។

របាយការណ៍របស់អង្គការនៃប្រទេសនាំចេញប្រេង ហៅកាត់ OPEP ចេញផ្សាយនៅថ្ងៃទីព្រហស្បតិ៍ ទី ១០ កក្កដា ឆ្នាំ២០២៥ បង្ហាញពីកំណើនតម្រូវការប្រេង នៅរវាងឆ្នាំ២០២៤ និងឆ្នាំ២០៥០ ពោលគឺ កើនឡើងពី ១០៣លាន៧សែន ធុងបារីល ទៅ ១២៣លាន ធុងបារីល ក្នុងមួយថ្ងៃ។ បើធៀបនឹងការព្យាករណ៍ក្នុងរបាយការណ៍ឆ្នាំមុន តម្រូវការប្រេងនៅតែកើនឡើងជាលំដាប់។ នេះបើយោងតាមអគ្គលេខាធិការអង្គការ OPEP លោក Haitham al-Ghais។  

ការព្យាករណ៍របស់អង្គការនេះ គឺផ្ទុយនឹងអនុសាសន៍របស់អ្នកជំនាញអាកាសធាតុ ដែលបានស្នើឲ្យងាកចេញមកពីថាមពលផូស៊ីល តួយ៉ាង ធ្យូងថ្ម ប្រេង និងឧស្ម័ន ទៅប្រើថាមពលបៃតងវិញ ដើម្បីកម្រិតការឡើងកំដៅផែនដីត្រឹម ១,៥អង្សា ដូចមានចែងក្នុងកិច្ចព្រមព្រៀងអាកាសធាតុ ទីក្រុងប៉ារីសឆ្នាំ២០១៥។  

អគ្គលេខាធិការអង្គការ OPEP បានរិះគន់ថា ការបោះបង់ថាមពលផូស៊ីលភ្លាមៗ នៅប៉ុន្មានឆ្នាំចុងក្រោយនេះ គឺគ្រាន់តែជាការស្រមើស្រមៃរបស់អ្នកជំនាញអាកាសធាតុ ដែលបានកំណត់ គោលដៅ «ហ្សេរ៉ូកាបូន» នៅ ត្រឹម ឆ្នាំ២០៥០ ខាងមុខ។ អង្គការដដែលរំពឹងថា តម្រូវការថាមពលនឹងកើនឡើងចំនួនប្រមាណ ២៣% ពីពេលនេះ រហូតដល់ឆ្នាំ២០៥០ ដោយស្របតាមកំណើនប្រជាជនក្នុងលោក ពោលគឺ ពី៨ពាន់២០០លាននាក់ ទៅ ៩ពាន់៧០០លាននាក់ នៅឆ្នាំ២០៥០។ ជាក់ស្តែង តម្រូវការថាមពលអគ្គីសនីសម្រាប់ផ្គត់ផ្គង់មជ្ឈមណ្ឌលស្តុកទិន្នន័យ និង សម្រាប់ផ្តត់ផ្គង់ក្នុងប្រទេសកំពុងអភិវឌ្ឍន៍។

ចំពោះតម្រូវការថាមពលកកើតឡើងវិញ រួមមាន ថាមពលវាយោ និងថាមពេលព្រះអាទិត្យ មានចំនួនតិចតួចប៉ុណ្ណោះ ពោលគឺកើនឡើងពី ៣% នៅឆ្នាំ ២០២៤ ទៅ ១៤% នៅឆ្នាំ២០៥០។ ដូច្នេះ តម្រូវការថាមពលផូស៊ីល ដូចជាប្រេង និងឧស្ម័ន នៅតែមានចំនួនច្រើនលើសលប់ រហូតដល់ ៥៤% នៅឆ្នាំ២០៥០ លើកលែងតែធ្យូងថ្ម នឹងធ្លាក់ចុះពី ២៧% នៅសល់ត្រឹមចំនួនប្រមាណ ១៤%។

មានប្រជាជនច្រើនជាងគេក្នុងពិភពលោក ឥណ្ឌាបន្តប្រើប្រាស់ប្រេងឆៅច្រើនឡើងជាលំដាប់ ពោលគឺ កើនឡើងជាមធ្យម ៨,២លាន ធុងបារីល ក្នុងមួយថ្ងៃ រវាងឆ្នាំ ២០២៤ និង ឆ្នាំ២០៥០។ ចំណែកឯ ចិនវិញដែលជាប្រទេសសមាជិកអង្គការ OCDE និងជាប្រទេសប្រើប្រាស់ប្រេងឆៅច្រើនជាងគេលំដាប់ទី២បន្ទាប់ពីសហរដ្ឋអាមេរិក នឹងចាប់ផ្តើមធ្លាក់ចុះ នៅឆ្នាំ២០៤០។ បើតាមការព្យាករណ៍របស់អង្គការ OPEP ការវិនិយោគប្រេង អាចកើនឡើងរហូតដល់ ១៨ពាន់២០០លានដុល្លារ នៅឆ្នាំ២០៥០ ពោលគឺប្រហែល ៧០០លានដុល្លារក្នុងមួយឆ្នាំ៕

Nº.0840