ហ្កាហ្សា៖ អង្គការ ១៦៩ ទាមទារឲ្យ បញ្ឈប់ប្រព័ន្ធចែកចាយ ជំនួយមនុស្សធម៌ ចាត់ចែង ដោយអង្គការ GHF
ចេញផ្សាយនៅថ្ងៃទី២ ខែមិថុនា ឆ្នាំ២០២៥៖
មានអង្គការ ប្រមាណ ជិត ១៧០ស្ថាប័ន បានរួមគ្នាអំពាវនាវ សុំ ឲ្យ បញ្ឈប់ជាបន្ទាន់នូវប្រព័ន្ធចែកចាយ ស្បៀងអាហារ ជំនួយ មនុស្សធម៌ នៅ តំបន់ហ្កហ្សា ដែលចាត់ចែង ផ្តាច់មុខដោយអង្គការមួយ ហើយ ដែលត្រូវគេដឹងថា ជាអង្គការ ស្និទ្ធ ជាមួយ រដ្ឋាភិបាលអ៊ីស្រាអែលនិង សហរដ្ឋអាមេរិក។ អាជ្ញាធរហាម៉ាស ដែលគ្រប់គ្រងតំបន់ហ្កាហ្សា បានអះអាងថាប៉ុន្មានសប្តាហ៍មកនេះ មានប្រជាជនប៉ាឡេស្ទីនស្លាប់ច្រើនរយនាក់ នៅក្នុងការដំណើរ ស្វះស្វែងរកចំណីអាហារ ដោយលំបាក ។
អង្គការមនុស្សធម៌អន្តរជាតិ ចំនួន ១៦៩ ដែលធ្វើសកម្មភាពមនុស្សធម៌នៅតំបន់ ហ្កាហ្សា បានរួមគ្នា ចេញលិខិតអំពាវនាវ ឲ្យ បិទបញ្ចប់ជាបន្ទាន់ នូវប្រព័ន្ធ ប្រតិបត្តិការចែកចាយ ស្បៀងអាហារនៅហ្កាហ្សា ដែល ស្ថិតក្នុងការចាត់ចែងផ្តាច់មុខ ដោយអង្គការមួយ ឈ្មោះថា Gaza Humanitarian Foundation (GHF)។ ក្រុមអង្គការអន្តរជាតិ បានចោទថា អង្គការ GHF ដែល មានទំនោរស្និទ្ធនឹងរដ្ឋាភិបាលអ៊ីស្រាអែលនិង សហរដ្ឋអាមេរិក បានចាត់ចែងការចែក ស្បៀងអាហារនៅហ្កាហ្សា បណ្តាល ឲ្យ មានប្រជាជនប៉ាឡេស្ទីន ស្លាប់ច្រើនរយនាក់។
អង្គការ ទាំង ១៦៩ បាន អំពាវនាវ ផងដែរ ឲ្យ គេត្រលប់ មកអនុវត្តប្រព័ន្ធចែកចាយ ស្បៀង នៅតំបន់ ហ្កាហ្សា ដែលធ្លាប់ធ្វើ កាលពី មុន ខែមិនា។ ពោលគឺជាប្រព័ន្ធដែល សម្របសម្រួលដោយ អង្គការមនុស្សធម៌ ច្រើនផ្សេងគ្នា សហការជាមួយភ្នាក់ងាររបស់អង្គការសហប្រជាជាតិ ដើម្បី ពង្រីក ការចែក ស្បៀងអាហារ និង ជំនួយមនុស្ស ធម៌ ឲ្យបានទូលំទូលាយពាសពេញ តំបន់ ហ្កាហ្សា ។ បន្ថែមពីនេះ អង្គការទាំង ១៦៩ បានអំពាវនាវ ឲ្យអ៊ីស្រាអែលដកចេញជាបន្ទាន់ នូវការបិទខ្ទប់ ការនាំចូលស្បៀងអាហារ ក៏ដូចជា ទំនិញប្រើប្រាស់ ប្រចាំថ្ងៃ ទៅក្នុងតំបន់ ហ្កាហ្សា ។
សូមបញ្ជាក់ថា បន្ទាប់ ពី បាន បិទខ្ទប់ជំនួយ មនុស្សធម៌ជាច្រើនខែនៅឯច្រកព្រំដែន ចូលហ្កាហ្សា អ៊ីស្រាអែល បានអនុញ្ញាត ឲ្យរថយន្តដឹកស្បៀងមួយចំនួន តូច អាចចូលទៅហ្កាហ្សាកាលពីខែឧសភា។ ក៏ប៉ុន្តែ ការបែងចែក ស្បៀងអាហារជំនួយមនុស្សធម៌ទាំងអស់ ត្រូវចាត់ចែងដោយអង្គការ GHF។ អង្គការសហប្រជាជាតិ ក៏ដូចជា អង្គការមនុស្សធម៌ផ្សេងៗទៀត បានបដិសេធមិនសហការជាមួយអង្គការនេះ ដោយលើកឡើងពី ភាពមិនអព្យាក្រិត្យ ព្រមទាំង ដំណើរការចាត់ចែងការងារ មិនត្រឹមត្រូវ ។
យោងតាម លិខិតអំពាវនាវរបស់អង្គការមនុស្សធម៌ទាំង ១៦៩ គឺ ប្រព័ន្ធចែកចាយជំនួយ មនុស្សធម៌ ក្រោមការចាត់ចែងរបស់អង្គការ GHF គឺ បានតម្រូវ ឲ្យ ប្រជាជនប៉ាឡេស្ទីន ត្រូវធ្វើដំណើរផ្លូវឆ្ងាយ ប្រថុយគ្រោះថ្នាក់ ដល់ជីវិត ។ ការធ្វើដំណើរ ដែល តែងតែកើតមានជា សកម្មភាពចលាចល ប្រណាំងប្រជែង វាយដណ្តើម គ្នា ដើម្បីចូលទៅដល់ ទីកន្លែង ចែកស្បៀង ដែលភាគច្រើនជាទីតាំង គ្រប់គ្រងដោយ កងទ័ពអ៊ីស្រាអែល។ ផ្អែកតាមអង្គការមនុស្សធម៌អន្តរជាតិ ក្នុងរយៈពេល ប្រមាណ ៤សប្តាហ៍ មកនេះ យ៉ាងហោចណាស់ មានប្រជាជនប៉ាឡេស្ទីន ស្លាប់ ជាង ៥០០នាក់ និងរបួសជិត ៤០០០នាក់ បន្ទាប់ពីពួកគេបានព្យាយាមប្រជ្រៀតចូលទៅក្នុងទីតាំងទទួលស្បៀង ។ ជាង នេះទៀត កងទ័ពអ៊ីស្រាអែល បានអះអាងថា ខ្លួន បាន បាញ់រះនៅត្រង់ទីតាំង ចែកស្បៀង ដោយ អះអាងថា ដើម្បី រក្សាសណ្តាប់ធ្នាប់របៀបរៀបរយ។
គួរបញ្ជាក់ដែរថា កាលពីសប្តាហ៍ កន្លងទៅ សារព័ត៌មាន អ៊ីស្រាអែលមួយឈ្មោះ Haaretz បានចុះផ្សាយ ដោយស្រង់សម្តី អះអាងរបស់ ទាហានអ៊ីស្រាអែល ថា ពួកគេបានទទួលបញ្ជាពីថ្នាក់លើមក ថា អាចបាញ់ ទៅលើ ប្រជាជនស៊ីវីល ប៉ាឡេស្ទីន នៅក្បែរទីតាំងចែកស្បៀង អាហារ ។ តែកងទ័ពអ៊ីស្រាអែល បានចេញ មុខច្រានចោលការចុះផ្សាយ នេះ ភ្លាម ។ កងទ័ពអ៊ីស្រាអែល អះអាងថា ប្រតិបត្តិរបស់ខ្លួន គឺ សម្រួលដល់ការចែកចាយស្បៀងអាហារនិងជំនួយមនុស្សធម៌របស់អង្គការGHF ការពារសន្តិសុខផ្លូវធ្វើដំណើរមកកាន់ ទីតាំង ចែកស្បៀង និងធានាថា ជំនួយស្បៀងអាហារ ទាំងនោះ បានទៅដល់ដៃប្រជាជនស៊ីវីលប៉ាឡេស្ទីន ដោយ ពិតប្រាកដ មិនមែនធ្លាក់ចូល ក្នុងដៃរបស់ ពួកហាម៉ាស ៕
Nº.0822
