អង្គការ មនុស្សធម៌ អំពាវនាវ ឲ្យ សំរុកបញ្ជូនស្បៀងចូលតំបន់ហ្កាហ្សា

អង្គការ មនុស្សធម៌ អំពាវនាវ ឲ្យ សំរុកបញ្ជូនស្បៀងចូលតំបន់ហ្កាហ្សា

ចេញផ្សាយនៅថ្ងៃទី៣១ ខែកក្កដា ឆ្នាំ២០២៥៖

អង្គការមនុស្សធម៌ បន្តស្រែកដង្ហើយ ឲ្យ មានការសំរុក បញ្ជូន ស្បៀង ឲ្យ បានច្រើន បំផុត ទៅហ្កាហ្សា ព្រោះគ្រោះទុរ្ភិក្សកំពុងតែគំរាមអាសន្ន ខ្លាំង ណាស់ ។ រសៀលថ្ងៃអង្គារ ២៩កក្កដា បារាំង អាល្លឺម៉ង់ បានប្រកាសថាគេ នឹង បញ្ជូន ស្បៀង បន្ថែម ឲ្យ បានច្រើនតាមតែអាចធ្វើទៅបាន ។

ជាច្រើនសប្តាហ៍ មកហើយ ដែលអង្គការមនុស្សធម៌ជាច្រើន បានទាញសញ្ញាអាសន្ន ពីគ្រោះទុរ្ភិក្សនៅតំបន់ ហ្កាហ្សា ដោយសារតែអ៊ីស្រាអែល បានបិទខ្ទប់ទាំងស្រុងមិន ឲ្យ គេដឹកស្បៀងចូល ប្រមាណ ២ខែមកហើយ ។ កាលពីថ្ងៃចន្ទ ទី ២៨កក្កដា លោកដូណាល់ ត្រាំ បាន ប្រកាសទទួលស្គាល់ ថាលោក បានឃើញ តាមទូរទស្សន៍ រូបភាពកុមារប៉ាឡេស្ទីន រកអ្វី ហូបមិនបាន គួរឲ្យសង្វេងណាស់ ។ លោក បន្ថែមថា នៅហ្កាហ្សាពិត ជាមាន គ្រោះទុរ្ភិក្ស ដោយមិន អាចលាក់ បាំងបញ្ហានេះ បាន ទេ ព្រោះមាន មនុស្ស ច្រើនណាស់ស្លាប់ដោយដាច់ពោះ ។

ដោយ រងសំពាធកាន់តែខ្លាំងពីសហគមន៍អន្តរជាតិ រដ្ឋាភិបាលអ៊ីស្រាអែលបានសម្រេចកាលពីថ្ងៃទី ២៥កក្កដា ផ្អាកបាញ់ ប្លោង គ្រាប់ នៅតំបន់មួយចំនួន ពីម៉ោង ១០ព្រឹកដល់ម៉ោង ៨យប់ និងបើកច្រកផ្លូវ មនុស្សធម៌ដើម្បី ដឹកជញ្ជូនស្បៀង ។ អ៊ីស្រាអែល ក៏បាន បើកឲ្យ មានការទម្លាក់ ស្បៀងតាមឆ័ត្រយោងដែរ។ ផ្អែកតាមរដ្ឋាភិបាលហ្សកដានី កាលពីថ្ងៃចន្ទ យន្តហោះហ្សកដានីនិងអេហ្ស៊ីប បាន ទម្លាក់ ស្បៀងតាមឆ័ត្រយោង ចំនួន ១៧តោន។ ចំណែក តាមផ្លូវគោកវិញ ស្បៀងអាហារចំនួន ១២០កាមីញ៉ុង ត្រូវបាន គេដឹកចូលហ្កាហ្សា ត្រង់ច្រករ៉ាហ្វា ជាប់ព្រំដែនអេហ្ស៊ីប យកទៅឲ្យភ្នាក់ងារអង្គការ សហប្រជាជាតិ ជាអ្នកចាត់ចែងចែក ឲ្យ ប្រជាជន ប៉ាឡេស្ទីន ។

តែយ៉ាងណា ចំនួន ស្បៀងទាំងនេះ ត្រូវបានអង្គការមនុស្សធម៌ត្អូញត្អែរ ថាមិនគ្រប់គ្រាន់ទេ នៅខ្វះច្រើនណាស់។ អង្គការ មនុស្ស ធម៌ អំពាវនាវ ឲ្យ គ្រប់ប្រទេសទាំងអស់ រកមធ្យោបាយ បញ្ជូនស្បៀង ទៅ ឲ្យ បានច្រើនបំផុត ដើម្បីស្រោចស្រង់ជីវិតប្រជាជននៅហ្កាហ្សា ដែលកំពុងប្រឈមនឹង គ្រោះអត់ឃ្លាន។ ដោយឡែក ប្រជាជន ហ្កាហ្សាខ្លះ បានត្អូញត្អែរប្រាប់អ្នកយកព័ត៌មាន ថាការទម្លាក់ស្បៀងតាម ឆ័ត្រយោង ធ្វើ ឲ្យមនុស្សរត់ប្រញាយដណ្តើមគ្នា ប្រៀបបាននឹងសត្វធាតុ អ្នកខ្លះបានអ្នកខ្លះក៏អត់។

លោកដូណាល់ ត្រាំ បានប្រកាសថាលោកនឹងបញ្ជា ឲ្យ រៀបចំ បើកមណ្ឌល ចែកស្បៀងអាហារ ឲ្យ មនុស្សចេញចូល ដោយ សេរី និងគ្រប់ពេលនៅហ្កាហ្សា ។ នៅព្រឹកថ្ងៃអង្គារ ទី ២៩ កក្កដា រដ្ឋាភិបាល អាល្លឺម៉ង់ វិញបានប ញ្ជាក់ថា គេនឹងសហការជាមួយហ្សកដានី ដើម្បីដឹកស្បៀងអាហារ ក៏ដូចជា សម្ភារៈបរិក្ខាពេទ្យ តាមយន្តហោះយកទៅហ្កាហ្សា។ រដ្ឋាភិបាល បារាំងបានបញ្ជាក់ដែរថា បន្ថែមពីស្បៀងតាម ផ្លូវគោកដែលគេនឹងបញ្ជូនទៅ គឺកងទ័ពបារាំងនឹងទម្លាក់ស្បៀងតាមឆ័ត្រយោងក្នុងពេលឆាប់ៗនេះ តែប្រតិបត្តិការនេះនឹងត្រូវធ្វើដោយ ប្រុងប្រយ័ត្នបំផុត ដើម្បីការពារសុខសុវត្ថិភាពរបស់ ប្រជាជនប៉ាឡេស្ទីន ។

ជិត ២២ខែ នៃសង្គ្រាមនៅហ្កាហ្សា ចំនួន មនុស្ស ស្លាប់បាន កើនដល់៦ម៉ឺននាក់។ នេះបើផ្អែកតាម តួលេខរបស់អាជ្ញាហាម៉ាសដែលគ្រប់គ្រងហ្កាហ្សា។ ហើយយោងតាមអង្គការសន្តិសុខស្បៀងអាហារមួយឈ្មោះ IPC គឺមាន កុមារប៉ាឡេស្ទីន ចំនួន ជាង ២ម៉ឺននាក់ ដែល កំពុងមានបញ្ហាសុខភាពធ្ងន់ធ្ងរដោយសារកង្វះអាហាររូបត្ថម្ភ។ មន្ទីរពេទ្យ បាន បញ្ជាក់ថា គិត ពីថ្ងៃទី ១៧កក្កដាមក មានកុមារអាយុក្រោម ៥ឆ្នាំ ចំនួន ១៦នាក់បានស្លាប់ ដោយសារតែបញ្ហានេះ ។ 

Nº.0893