ហ្កាហ្សា៖ កុមារជាង ៧ម៉ឺននាក់ កំពុងប្រឈមនឹងសេចក្ដីស្លាប់ព្រោះកង្វះអាហារូបត្ថម្ភ

ហ្កាហ្សា៖ កុមារជាង ៧ម៉ឺននាក់ កំពុងប្រឈមនឹងសេចក្ដីស្លាប់ព្រោះកង្វះអាហារូបត្ថម្ភ

ចេញផ្សាយនៅថ្ងៃទី២៤  ខែកក្កដា ឆ្នាំ២០២៥៖

កុមារប្រមាណ ៧១០០០នាក់នៅតំបន់ ហ្កាហ្សា កំពុងប្រឈម នឹងបញ្ហា កង្វះអាហារូបត្ថម្ភដ៏ធ្ងន់ធ្ងរបំផុត។ កាលពីថ្ងៃទី ២៣កក្កដា អង្គការ មនុស្សធម៌ ចំនួន ១១០អង្គការ បានរួមគ្នាអំពាវនាវទៅកាន់សហគមន៍អន្តរជាតិ ត្រូវតែ រកវិធីជួយជាបន្ទាន់ ព្រោះ គ្រោះអត់ឃ្លាន គ្មានអ្វីបរិភោគ កំពុង តែសម្លាប់ ប្រជាជននៅហ្កាហ្សា។ ជនរងគ្រោះដែលប្រឈមបំផុតនោះ គឺកុមារ ។ តំណាងអង្គការ Unicef បាន រន្ធាន់ ថាត្រូវតែដកចេញជាបន្ទាន់ នូវ រនាំងរាំងខ្ទប់ការ ដឹកជំនួយស្បៀងអាហារ ទៅកាន់ ហ្កាហ្សា។

អ្នក ទទួលបន្ទុក ប្រតិបត្តិការ អន្តរជាតិរបស់អង្គការUnicef បាន ទាញសញ្ញាអាសន្នដ៏អស់ សង្ឃឹមជាទីបំផុត ទាក់ទិននឹងស្ថានភាព មនុស្សធម៌នៅ តំបន់ហ្កាហ្សា ជាពិសេសគឺពាក់ព័ន្ធ នឹងអាយុជីវិត កុមារ ។ យោងតាម ការអះអាងរបស់ លោក កុមារប៉ាឡេស្ទីននៅតំបន់ ហ្កាហ្សា ប្រមាណ ៧១០០០នាក់ កំពុងតែប្រឈមនឹង សេចក្តីស្លាប់ ដោយសារតែ កង្វះអាហារូបត្ថម្ភដ៏ធ្ងន់ធ្ងរបំផុត ។

ផ្អែកតាមតួលេខរបស់អាជ្ញាធរសុខាភិបាល តំបន់ហ្កាហ្សា ហើយដែលអង្គការ Unicef បាន ផ្ទៀតផ្ទាត់ថាត្រឹមត្រូវ គឺ កាលពីសប្តាហ៍ កន្លងទៅ មានមនុស្ស ស្លាប់ចំនួន យ៉ាងហោច ១០០នាក់ ដោយ ដាច់ពោះគ្មានអ្វីបរិភោគ។ ក្នុងចំណោមនេះ គឺ ៨០នាក់សុទ្ធតែជាកុមារ ។ ហើយចន្លោះពីថ្ងៃទី ២១ ដល់២២កក្កដា អ្នកស្លាប់ដោយដាច់ពោះមាន ១៥នាក់ ក្នុងនោះមាន កុមារ ៤នាក់ ។

ជារៀងរាល់ថ្ងៃ កុមារប៉ាឡេស្ទីននៅហ្កាហ្សា ត្រូវបើកភ្នែកភ្ញាក់ឡើង ជាមួយនឹងក្រពះទទេ ស្អាត គ្មានអ្វីបរិភោគជាច្រើនថ្ងៃ ហើយត្រូវរស់នៅ ជាមួយ នឹងការភ័យខ្លាច ដោយ សារតែសំឡេងគ្រាប់ បែក មីស៊ីល កាំភ្លើងធំ ផ្ទុះ មិនស្រាកស្រាន្ត ។ ក្នុងរយៈពេល ២១ខែមកនេះ ជាមធ្យម មានកុមារចំនួន ២៨នាក់ស្លាប់ជារៀងរាល់ថ្ងៃ ពោលគឺមួយថ្ងៃ ហាក់ដូចជាមានសិស្សសាលាមួយថ្នាក់ ត្រូវស្លាប់ដូច្នោះដែរ ។ តួលេខស្លាប់ដ៏ច្រើនសន្ធឹកនេះ គួរ ណា តែធ្វើឲ្យមនុស្សទាំងពិភពលោក ក្រោកឈរឡើងឈឺឆ្អាល !

មិនត្រឹមតែប្រឈមនឹង ការស្លាប់ ដោយ ដាច់ពោះប៉ុណ្ណោះទេ តែ ប្រជាជនប៉ាឡេស្ទីន ត្រូវប្រឈមគ្រោះថ្នាក់ ត្រូវគ្រាប់បែក គ្រាប់កាំភ្លើងថែមទៀត នៅពេលពួកគេធ្វើដំណើរ ឬឈររងចាំការចែក ស្បៀងអាហារបន្តិចបន្តួច នៅតាម ទីកន្លែងចែកស្បៀង ។ តួលេខអង្គការសហប្រជាជាតិបានអះអាងថា គិតចាប់ពីថ្ងៃទី ២៧ ឧសភាមក មានប្រជាជនប៉ាឡេស្ទីន យ៉ាងហោច ៨០០នាក់ បានស្លាប់នៅទីកន្លែងចែកស្បៀងអាហារ បន្ទាប់ពីរងការបាញ់ ផ្លោងគ្រាប់របស់អ៊ីស្រាអែល ។

២ខែមកហើយ ដែល គ្មានស្បៀងអាហារចូលទៅតំបន់ ហ្កាហ្សាទាល់តែសោះ ដោយសារតែ អាជ្ញាធរអ៊ីស្រាអែល បានបិទខ្ទប់ទាំងស្រុង ។ បុគ្គលិកអង្គការមនុស្សធម៌ បានសង្កេតឃើញ ស្ថានការណ៍កាន់តែធ្លាក់ចុះដុនដាប អាសន្ន ខ្លាំងឡើងៗជារៀងរាល់ថ្ងៃ។ តួយ៉ាង មណ្ឌលអប់រំបណ្តោះអាសន្ន ដែលអង្គការUnicef ទទួលបង្រៀនកុមារ ប្រមាណ ៥៧០០០នាក់ ក៏ក្លាយទៅជាទី លែងមានសុវត្ថិភាពដែរ ។ មិនត្រឹមតែប្រជាជនប៉ាឡេស្ទីន ទូទៅ ទេ ដែលប្រឈមគ្រោះថ្នាក់ បុគ្គលិកអង្គការមនុស្សធម៌ ក៏ ប្រឈមគ្រោះថ្នាក់ ដោយដាច់ពោះស្លាប់ និង ស្លាប់ដោយ រងគ្រាប់ ផ្លោង របស់អ៊ីស្រាអែល ដែរ ។ កាលពីថ្ងៃចន្ទទី២១កក្កដា កងទ័ពអ៊ីស្រាអែល បាន ប្រកាស ឲ្យ ប្រជាជន ប៉ាឡេស្ទីន ប្រមាណ ចន្លោះពី ៥ម៉ឺន ទៅ ៨ម៉ឺននាក់ ត្រូវធ្វើដំណើរចាកចេញ ពីតំបន់ Deir al-Balah ដែល បង្ក ឲ្យ កាន់តែមានការព្រួយបារម្ភពីក្រុមអង្គការមនុស្សធម៌ ។

Nº.0876