ចិន សងសឹក សហភាព អឺរ៉ុបដោយ ឈប់ បញ្ជាទិញ សម្ភារៈ បរិក្ខារពេទ្យ

ចិន សងសឹក សហភាព អឺរ៉ុបដោយ ឈប់ បញ្ជាទិញ សម្ភារៈ បរិក្ខារពេទ្យ

ចេញផ្សាយនៅថ្ងៃទី៧ ខែកក្កដា ឆ្នាំ២០២៥៖

ពេល កន្លងទៅ ប៉េកាំង និង ព្រុចសែល ដំឡើង ពន្ធ គយ លើទំនិញ ស្រា និង រថយន្ត អគ្គិសនី ហើយ ពេលនេះ ឈាន ដល់ សម្ភារៈ គ្រឿង បរិក្ខារ ពេទ្យ ។ នៅថ្ងៃអាទិត្យ ទី ៦កក្កដា ក្រសួង ហិរញ្ញវត្ថុចិន ពន្យល់ថា ប៉េកាំង គ្មាន ជម្រើស អ្វីផ្សេង ក្រៅពី វិធានការ សងសឹក បែបនេះ ពី ព្រោះ តែ សហភាព អឺរ៉ុប បាន សម្រេច ឈប់ បញ្ជាទិញ សម្ភារៈ បរិក្ខារ ពេទ្យ ពីចិន កាលពី ខែមិថុនា ។

រដ្ឋាភិបាល ទីក្រុង ប៉េកាំង បាន សម្រេច ឈប់ផ្តល់ សិទ្ធិ ឲ្យ ក្រុមហ៊ុន សហភាពអឺរ៉ុប ទទួល បញ្ជាទិញ សម្ភារៈបរិក្ខារពេទ្យសម្រាប់ផ្គត់ផ្គង់ វិស័យ សុខាភិបាល ចិន ។ វិធានការ នេះ ប្រកាស ចេញនៅ ថ្ងៃ អាទិត្យ ទី ៦កក្កដា និង មា នប្រសិទ្ធភាពអនុវត្ត ភ្លាមតែម្តង ដោយ ប៉ះពាល់ ទៅលើ សម្ភារៈបរិក្ខារពេទ្យ តួយ៉ាង គ្រឿង បង្គុំឧបករណ៍ គ្រឿង ម៉ាស៊ីន វះកាត់ សរីរាង្គកាយ សិប្បនិម្មិត ។ល។ សរុប ជា ទឹកប្រាក់ ប្រមាណ ៤៥ លាន យ៉ន់ ស្មើប្រហែល ជាង ៥ ពាន់ លាន អឺរ៉ូ ។

ក្នុងសេចក្តីថ្លែងការណ៍ ក្រសួង ហិរញ្ញវត្ថុ ចិន បាន ពន្យល់ ថា រដ្ឋាភិបាល ក្រុង ប៉េកាំង មាន សុឆន្ទៈ ចរចា ទ្វេភាគី ជា ច្រើន លើកច្រើន សា ដើម្បី ដោះស្រាយ ចំពោះ ការ បញ្ជាទិញ សម្រាប់ វិស័យ សាធារណៈ។ ទោះបី ជា ចិន ខំប្រឹង បង្ហាញភាព ស្មោះត្រង់ ម្តេច ក្តី តែភាគី សហភាអឺរ៉ុបនៅតែ ប្រកាន់ ជំហរ ជំទាស់ ដោយ ដាក់ចេញ វិធានការមិនសមហេតុផល និង ដំឡើង រនាំង ពន្ធគយ យ៉ាង តឹងតែង ប្រឆាំង ចិន ។ ម្ល៉ោះហើយ ចិន គ្មាន ជម្រើស អ្វីផ្សេង ក្រៅ ពី វិធានការ ឆ្លើយ តប នោះឡើយ។ នេះបើតាម ក្រសួង ហិរញ្ញវត្ថុ ចិន ដោយគូស បង្ហាញថា វិធានការ ចំពោះ គ្រឿង បរិក្ខារពេទ្យ ជា ចំណាត់ ការ ដូចគ្នាដែល សហភាព អឺរ៉ុប បាន ធ្វើ ចំពោះ ចិន នៅថ្ងៃទី ២០មិថុនា កន្លងទៅ ។

ប្រមាណ ជា ៣ឆ្នាំចុងក្រោយ នេះ សហភាពអឺរ៉ុប និងចិន ឈ្លោះទាស់ទែង គ្នា ទៅលើ វិស័យ ឧស្សាហកម្មរថយន្ត ដើរដោយថាមពល អគ្គិសនី ឧស្សាហកម្ម ផ្លូវដែក ផ្ទាំង សូឡាស្រូបពន្លឺព្រះអាទិត្យ ផលិតថាមពលអគ្គិសនី និង កង្វារទាញខ្យល់ ផលិតអគ្គិសនី ។

សហភាព អឺរ៉ុប ក៏បាន ស្រាវជ្រាវ ឃើញថា រដ្ឋអំណាច ចិន បាន ឧបត្ថម្ភធន ទៅលើ វិស័យ ឧស្សាហកម្មរថយន្ត អគ្គិសនី ជាហេតុធ្វើឲ្យ រថយន្ត អគ្គិសនី របស់ ក្រុម ហ៊ុន ចិន ផលិតបាន លឿន រហ័ស និង ចំនួនច្រើន ព្រមទាំង លក់ ចេញ ក្នុង តម្លៃថោក ហើយ ដែល ធ្វើឲ្យ ប្រកួត ប្រជែង មិន ស្មោះត្រង់ ជាមួយ ក្រុម ហ៊ុន អឺរ៉ុប។ ម្ល៉ោះហើយទើប ព្រុចសែល បាន សម្រេច ដំឡើង ពន្ធ យ៉ាង ខ្ពស់ ចំពោះ រថយន្តអគ្គិសនី របស់ ចិន ពោលគឺរហូត ដល់ ៣៥%។ ជាវិធានការ វាយបក រដ្ឋអំណាច ក្រុង ប៉េកាំង បាន ដាក់ ពន្ធធ្ងន់ វិញដែរ ចំពោះ ទំនិញ អឺរ៉ុប ។ ពេល ចុងក្រោយ នេះ ចិន ដំឡើង ពន្ធ គយ ជាង ៣៤% លើគ្រឿងស្រវឹងផលិតផលអឺរ៉ុប ជា ពិសេស ស្រាប្រភេទខ្លាំងៗ តួយ៉ាង កូញាក របស់ បារាំង ជាដើម។

ក្នុងខែមិថុនា នេះ សហភាព អឺរ៉ុប និង ចិន ត្រូវប្រារព្ធ ខួប រម្លឹក ចំណង មេត្រីភាព ៥០ ឆ្នាំ ។ ក៏ប៉ុន្តែ ប្រសិន បើ ព្រុចសែល និង ប៉េកាំង នៅតែ បន្ត សង្គ្រឺតធ្មេញ ដាក់ គ្នា តាមរយៈ សម្ពាធ ពន្ធគយ ទៅវិញទៅមកយ៉ាងដូច្នេះ ពិធី ខួបមេត្រីភាព ៥ទសវត្សរ៍ ទំនងជាមិនអាច នឹង រៀបចំ ក្នុង បរិយាកាស ល្អឡើយ៕

Nº.0837