យន្តហោះយោធាបង់ក្លាដែសធ្លាក់លើសាលារៀនបណ្ដាលឲ្យស្លាប់ និងរបួសក្មេងជាច្រើននាក់

7News

យន្តហោះយោធាបង់ក្លាដែសធ្លាក់លើសាលារៀនបណ្ដាលឲ្យស្លាប់ និងរបួសក្មេងជាច្រើននាក់

ចេញផ្សាយនៅថ្ងៃទី២២ ខែកក្កដា ឆ្នាំ២០២៥៖

យន្តហោះប្រដេញរបស់កងទ័ពជើងអាកាសបង់ក្លាដែសមួយគ្រឿងដែលកំពុងហាត់ហោះហើរបានធ្លាក់លើសាលារៀនមួយក្នុងរដ្ឋធានីដាកានាថ្ងៃចន្ទ ទី២១ កក្កដា ២០២៥។ មានស្លាប់យ៉ាងហោចណាស់ ១៦នាក់ ភាគច្រើនជាសិស្សសាលា និងរបួសជាង១០០នាក់។ នេះបើតាមតុល្យការផ្លូវការបឋម។

ក្នុងចំណោមយន្តហោះយោធា ២គ្រឿងដែលចេញហាត់ហ្វឹកហ្វឺននៅវេលាម៉ោង១ និង០៦នាទី ម៉ោងនៅក្នុងស្រុក មួយគ្រឿងប្រភេទ F-7 BGI ដែលផលិតនៅប្រទេសចិន បានធ្លាក់ចំលើសាលាបឋមសិក្សាមួយក្នុងរដ្ឋធានីដាកា។ មានឈ្មោះ ទូគៀ អ៊ីស្លាម សាហ្ការ អ្នកបើកបរបានស្លាប់ភ្លាមដោយរងរបួសធ្ងន់ពេក។ នេះបើតាមសេចក្តីជូនដំណឹងរបស់នាយសេនាធិការដ្ឋានយោធាបង់ក្លាដែស។ នេះជាគ្រោះមហន្តរាយធ្លាក់យន្តហោះដ៏ធ្ងន់ធ្ងរបំផុតដែលបង់ក្លាដែលមិនធ្លាប់ប្រទះទេ គិតចាប់តាំងពីជាច្រើនទសវត្សរ៍កន្លងមក។

បើតាមតុល្យការផ្លូវការបឋម ក្រៅពីអ្នកបើកយន្តហោះ មានសិស្សសាលាបឋមសិក្សាយ៉ាង ហោច ១៦នាក់បានបាត់បង់ជីវិត និងមនុស្ស ជាង១០០នាក់រងរបួស ក្នុងនោះភាគច្រើនរបួសធ្ងន់ខ្លាំង។ ជនរងគ្រោះច្រើនមានរបួសក្នុងទម្រង់ជាការរលាកធ្ងន់ធ្ងរដែលអាជ្ញាធរបានបញ្ជូនទៅមន្ទីរពេទ្យ ផ្នែកវិទ្យាស្ថានជាតិ រលាកធ្ងន់។ ឪពុកម្តាយសិស្សជាច្រើនក៏បានរួសរាន់រត់ទៅមន្ទីរពេទ្យដើម្បីរកកូន។ ក្រុមអ្នកជួយសង្គ្រោះក៏បានទៅដល់កន្លែងកើតហេតុភ្លាមដែរ និងបន្តស្វែងរកជនរងគ្រោះផ្សេងទៀត ដែលជាប់កុនក្នុងបំណែកថ្មអាគារបាក់បែក បង្ក ឡើង ដោយយន្តហោះធ្លាក់កិនពីលើ។

ប្រមុខរដ្ឋាភិបាលបណ្តោះអាសន្នបង់ក្លាដែស លោក មុហាម៉ាដ យូនូស ដែលជាជ័យលាភីរង្វាន់ណូបែលសន្តិភាពបានថ្លែងសាររំលែកទុក្ខក្រៀមក្រំជាមួយគ្រួសារជនរងគ្រោះ និងជាមួយប្រទេសជាតិទាំងមូល ដោយសន្យាចាត់វិធានការចាំបាច់ដើម្បីបើកអង្កេតឱ្យបានច្បាស់លាស់ រកមូលហេតុពិតនៃគ្រោះថ្នាក់។ អាជ្ញាធរបង់ក្លាដែសបានចេញក្រិត្យកាន់ទុក្ខថ្នាក់ជាតិមួយថ្ងៃ នៅថ្ងៃអង្គារ ទី២២ កក្កដានេះតែម្តង។

សូមរំឭកថា គ្រោះថ្នាក់ធ្លាក់យន្តហោះដ៏ធ្ងន់ធ្ងរបំផុតចុងក្រោយនៅបង់ក្លាដែសបានកើតឡើងនៅឆ្នាំ១៩៨៤ ដោយយន្តហោះរបស់ក្រុមហ៊ុនអាកាសចរណ៍ភូមា។ កាលណោះ យន្តហោះភូមាFokker ប្រភេទ F-24 ហោះចេញពីក្រុងកំពង់ផែ Chittagong ភូមា សំដៅក្រុងដាកាបានធ្លាក់សម្លាប់អ្នកដំណើរ និងអ្នកបំរើក្នុងយន្តហោះ អស់៤៩នាក់៕

Nº.0869

#buttons=(យល់ព្រម, ទទួលយក!) #days=(20)

គេហទំព័ររបស់យើងប្រើCookies ដើម្បីបង្កើនបទពិសោធន៍របស់អ្នក ស្វែងយល់បន្ថែម
Accept !
To Top