ក្រសួងសុខាភិបាល៖ ស្ត្រីវ័យ៤១ឆ្នាំម្នាក់ បានឆ្លងជំងឺផ្តាសាយបក្សី H5N1

ក្រសួងសុខាភិបាល៖ ស្ត្រីវ័យ៤១ឆ្នាំម្នាក់ បានឆ្លងជំងឺផ្តាសាយបក្សី H5N1

ចេញផ្សាយនៅថ្ងៃទី២៤ ខែមិថុនា ឆ្នាំ២០២៥៖

(សៀមរាប) ស្ត្រីអាយុ៤១ឆ្នាំម្នាក់ នៅភូមិល្បើក ឃុំដូនកែវ ស្រុកពួក ខេត្តសៀមរាប ឆ្លងជំងឺផ្តាសាយបក្សី H5N1។ ការណ៍នេះធ្វើឱ្យអ្នកឆ្លងជំងឺនេះកើនដល់ ៨នាក់ ក្នុងនោះ មាន៦នាក់ បានស្លាប់ និងភាគ ច្រើន ជាកុមារ គិតត្រឹមថ្ងៃទី២៤ ខែមិថុនា នេះ ។ នាយកដ្ឋានប្រយុទ្ធនឹងជំងឺឆ្លង CDC នៃក្រសួងសុខាភិបាល បានបញ្ជាក់ថា គ្រប់អ្នកជំងឺ ទាំងអស់ សុទ្ធ តែមានពាក់ព័ន្ធប៉ះពាល់ផ្ទាល់ ឬយកមាន់ទាឈឺ-ងាប់ ធ្វើជាអាហារ ។

បើតាមក្រសួងសុខាភិបាល ស្ត្រីវ័យ៤១ឆ្នាំរូបនេះ ត្រូវបានធ្វើតេស្តរកឃើញវិជ្ជមានវីរុសផ្តាសាយបក្សី ប្រភេទហាស់៥ អ៊ុន១ (H5N1)  នៅវិទ្យាស្ថានជាតិសុខភាពសាធារណៈ នាថ្ងៃទី២៣ ខែមិថុនា ឆ្នាំ២០២៥។  អ្នកជំងឺរូបនេះ មានរោគសញ្ញា គ្រុនក្តៅ ក្អក ហត់ និង ពិបាកដកដង្ហើម។ 

បច្ចុប្បន្នអ្នកជំងឺកំពុងស្ថិតក្នុងស្ថានភាពធ្ងន់ធ្ងរនិងកំពុងទទួលបានការថែទាំយ៉ាងយកចិត្ត ទុកដាក់ពីសំណាក់ក្រុមគ្រូពេទ្យ។ តាមការសាកសួររបស់មន្ត្រីជំនាញរបស់ក្រសួងសុខាភិបាល នៅផ្ទះអ្នកជំងឺនិងនៅផ្ទះអ្នកជិតខាងមានមាន់ទា ឈឺនិងងាប់ ហើយអ្នកជំងឺបានកាន់ និងប៉ះពាល់មាន់ឈឺនិងងាប់រួចយកមកធ្វើម្ហូបទទួលទាន៥ថ្ងៃ។ ពោលគឺមុនថ្ងៃដែល អ្នកជំងឺចាប់ផ្តើមឈឺ។

ក្រុមឆ្លើយតបបន្ទាន់របស់ក្រសួងសុខាភិបាលថ្នាក់ជាតិ និងថ្នាក់ក្រោមជាតិ កំពុងសហការ ជាមួយក្រុមការងារនៃមន្ទីរកសិកម្មខេត្ត  និងអាជ្ញាធរមូលដ្ឋានគ្រប់លំដាប់ថ្នាក់ ស្រាវជ្រាវយ៉ាងសកម្ម លើការកើតឡើងនូវជំងឺផ្តាសាយបក្សី។ ជាពិសេសក្រុមការធ្វើការងារទៅតាមវិធីសាស្ត្រ និងពិធីសារបច្ចេកទេស ស្វែងរក ប្រភពចម្លង ទាំងលើសត្វ និងមនុស្ស និងស្វែងរកករណីសង្ស័យនិងអ្នកប៉ះពាល់ ដើម្បីទប់ស្កាត់ការឆ្លងបន្តក្នុង សហគមន៍។ 

ក្រសួងសុខាភិបាល បានក្រើនរំលឹកសារជាថ្មីដល់ប្រជាពលរដ្ឋទាំងអស់ ត្រូវយកទុកដាក់ប្រុងប្រយ័ត្នលើជំងឺផ្តាសាយបក្សីជានិច្ច។ ក្រសួងសុខាភិបាលបានបញ្ជាក់ក្នុងសេចក្តីប្រកាសព័ត៌មានរបស់ខ្លួនយ៉ាងដូច្នេះ ៖ «  ជំងឺផ្តាសាយបក្សី H5N1 គឺនៅតែបន្តគំរាមកំហែងដល់ សុខភាពប្រជាពលរដ្ឋយើង»។

ជាមួយគ្នានេះ ក្នុងករណីពលរដ្ឋមានអាការៈក្តៅខ្លួន ក្អក ហូរសំបោរ ឬ ពិបាកដកដង្ហើម និងមានប្រវត្តិធ្លាប់បានប៉ះពាល់ជាមួយមាន់ទាឈឺ ឬងាប់ក្នុងអំឡុង១៤ថ្ងៃមុន ថ្ងៃចាប់ផ្តើម មានរោគសញ្ញា សូមកុំទៅជួបជុំ ឬទីប្រជុំជនដែលមានមនុស្សច្រើន និងត្រូវស្វែងរកការពិគ្រោះយោបល់ និងការ ពិនិត្យព្យាបាលនៅមណ្ឌលសុខភាព ឬមន្ទីរពេទ្យ ដែលនៅជិតជាបន្ទាន់ ចៀសវាងការពន្យារពេល ធ្វើឱ្យប្រឈមនឹង ហានិភ័យខ្ពស់នៃការស្លាប់ជាយថាហេតុ។

របៀបចម្លង៖ H5N1 គឺជាជំងឺផ្តាសាយមួយ ដែលជាធម្មតាចម្លងរវាងសត្វបក្សីឈឺ ទៅបក្សីផ្សេងទៀត ប៉ុន្តែជួនកាលវាអាចចម្លងពីបក្សីទៅមនុស្ស តាមការប៉ះពាល់ជិតស្និទ្ធជាមួយបក្សីដែលឈឺឬងាប់។ ជំងឺផ្តាសាយបក្សីលើមនុស្សជាជំងឺធ្ងន់ធ្ងរ ដែលតម្រូវឱ្យមានការធ្វើការព្យាបាលនៅមន្ទីរពេទ្យទាន់ពេលវេលា។ ទោះបីជាវាមិនងាយឆ្លងពីមនុស្សទៅមនុស្ស ប៉ុន្តែបើវាអាចបំប្លែងខ្លួនអាចឆ្លង ដូចនឹងជំងឺផ្តាសាយតាមរដូវកាល ផងដែរ។

របៀបបង្ការ៖ កុំប៉ះពាល់ ឬទទួលទាន មាន់ទា ឈឺ ឬងាប់ និងពាក់ស្រោមដៃ និងម៉ាស ឬយកក្រមាចងបិតច្រមុះ មុនពេល ចាប់កាន់មាន់ទាធ្វើម្ហូបអាហារ រួចហើយស្រុះវាក្នុងទឹកពុះមុននឹងបោចសម្អាតរោម។ ពលរដ្ឋគ្រប់រូប ត្រូវប្រកាន់ខ្ជាប់នូវការអនុវត្តអនាម័យ លាងសម្អាតដៃឱ្យបានញឹកញាប់ មុនចាប់កាន់ចំណីអាហារ ជាពិសេសបន្ទាប់ពីការប៉ះពាល់សត្វ បោចសំអាតរោមសត្វបសុបក្សី ឬវត្ថុផ្សេងៗ ដែលអាចជាប្រភពចម្លងរោគ ត្រូវចម្អិនម្ហូបអាហារឱ្យបានឆ្អិនល្អមុនបរិភោគ ជាពិសេសសាច់ សត្វបក្សី និងស៊ុត។ កុំទទួលទានពងមាន់ឬពងទាជ័រព្នៅ និងទុកដាក់អាហារឆៅ និងឆ្អិនឱ្យនៅដាច់ដោយឡែកពីគ្នា សម្អាតសម្ភារប្រើប្រាស់សម្រាប់ចម្អិនម្ហូបអាហារឱ្យបានត្រឹមត្រូវ។

បើតាមក្រសួងសុខាភិបាល ត្រឹមខែ មិថុនា ឆ្នាំ ២០២៥ នាយកដ្ឋានប្រយុទ្ធនឹងជំងឺឆ្លង CDC  រកឃើញជំងឺ ផ្ដាសាយ បក្សី កើនលើមនុស្សចំនួន ៨នាក់ ។ ក្នុងនោះ មាន ៦នាក់ បានស្លាប់ ភាគ ច្រើន ជាកុមារ ។ អ្នកជំងឺ ទាំងអស់ សុទ្ធ តែមានពាក់ព័ន្ធប៉ះពាល់ ឬយកមាន់ទាឈឺឬងាប់ ធ្វើជាអាហារ ៕ 

Nº.0800