ចិនបញ្ជូននាវាផ្ទុកយន្តហោះចម្បាំង២គ្រឿងទៅធ្វើសមយុទ្ធរួមគ្នានៅមិនឆ្ងាយពី កោះGuamរបស់អាមេរិក
ចេញផ្សាយនៅថ្ងៃទី១ ខែកក្កដា ឆ្នាំ២០២៥៖
កងទ័ពរំដោះប្រជាជនចិន (The People’s Libération Army) PLAបានប្រកាស កាលពីថ្ងៃចន្ទទី ៣០មិថុនា ថា នាវាផ្ទុកយន្តហោះចម្បាំងធំៗពីរគ្រឿង គឺShandong និងLiaoning បានវិលត្រលប់ចូលមូលដ្ឋានទ័ពជើងទឹកវិញដោយសុវត្ថិភាព បន្ទាប់ពីចូលរួមយ៉ាងសកម្មនៅក្នុងសមយុទ្ធ នៅមហាសមុទ្រប៉ាស៊ីហ្វិក។ សេចក្តីប្រកាសព័ត៌មានរបស់កងទ័ពចិនមិនបានបញ្ជាក់ច្បាស់ពីពេលវេលា និងទីកន្លែងធ្វើសមយុទ្ធនោះទេ ប៉ុន្តែ ក្រសួងការពារជាតិជប៉ុនកាលពីថ្ងៃទី១០មិថុនាធ្លាប់បានសំដែងក្តីបារម្ភ ព្រោះថា នេះជាលើកទី១ដែលចិនបញ្ជូននាវាដឹកយន្តហោះចម្បាំងដ៏ធំរបស់ខ្លួនទាំងពីរគ្រឿងឲ្យទៅធ្វើសមយុទ្ធនៅតំបន់ទឹកអន្តរជាតិក្បែរកោះGuam របស់អាមេរិក។
កងទ័ពចិនត្រូវរង់ចាំរហូតដល់នាវាចម្បាំងធ្វើដំណើរត្រលប់ចូលមូលដ្ឋានវិញសិន ទើបចេញមកបញ្ជាក់ជាផ្លូវការថា នាវាដឹកយន្តហោះ ស្ហានតុង និងលីវនីងពិតជាបានចូលរួមនៅក្នុងសមយុទ្ធទ្រង់ទ្រាយធំមួយនៅមហាសមុទ្រប៉ាស៊ីហ្វិក។ បើតាមសេចក្តីប្រកាសព័ត៌មានរបស់កងទ័ពចិនកាលពីថ្ងៃចន្ទទី ៣០មិថុនា សមយុទ្ធរបស់នាវាផ្ទុកយន្តហោះរបស់ចិនទាំងពីរគ្រឿងផ្តោតទៅលើការប្រយុទ្ធ ការហាត់សមឲ្យស្គាល់ប្រព័ន្ធចាប់សញ្ញា ប្រតិបត្តិការរបស់កងទ័ពជើងអាកាសដើម្បីចេញទៅព្រមាន កម្ទេចប្រព័ន្ធប្រឆាំងនាវា ឬប្រព័ន្ធខែលមីស៊ីល។
ទូរទស្សន៍រដ្ឋចិន CCTVបានបង្ហាញវីដេអូយន្តហោះចម្បាំងចិនហោះចេញពីនាវាផ្ទុកយន្តហោះ ឬការចុះចតរបស់យន្តហោះនៅលើនាវាចម្បាំងនៅយប់ងងឹតជាដើម។
កងទ័ពចិនទើបបញ្ចេញវីដេអូសមយុទ្ធនៅដើមសប្តាហ៍នេះមែន ប៉ុន្តែ សមយុទ្ធរបស់នាវាផ្ទុកយន្តហោះចិនបានស្ថិតក្រោមក្រសែភ្នែកតាមដាន ប្រកបដោយក្តីបារម្ភរបស់ជប៉ុនតាំងពីដំបូងទីម្ល៉េះ។ ចំពោះជប៉ុន នេះជាលើកទី១ ដែលចិនបញ្ជូននាវាដឹកយន្តហោះធំៗទាំងពីរគ្រឿងឲ្យទៅធ្វើសមយុទ្ធរួមគ្នា នៅតំបន់ទឹកសែនឆ្ងាយពីដែនសមុទ្រចិន។ គួរដឹងថា កន្លងមកចិនធ្វើសមយុទ្ធជើងទឹកភាគច្រើននៅតំបន់ទឹកចន្លោះកោះតៃវ៉ាន់ និងប្រទេសជប៉ុន។
ប៉ុន្តែ លើកនេះ ចិនបានបញ្ជូននាវាដឹកយន្តហោះរបស់ខ្លួន ស្ហានតុង និងលីវនីងឲ្យទៅធ្វើសមយុទ្ធនៅឆ្ងាយពីប្រទេសជប៉ុន កៀកទៅរកកោះហ្គាំ ជាទីដែលមានមូលដ្ឋានទ័ពជើងទឹករបស់អាមេរិក សម្ព័ន្ធមិត្តរបស់ជប៉ុន។ អំឡុងពេលនាវាផ្ទុកយន្តហោះចិនកំពុងធ្វើសមយុទ្ធ កាលពីប៉ុន្មានសប្តាហ៍មុន ក្រសួងការពារជាតិជប៉ុនធ្លាប់បានបរិហារភាពគឃ្លើនរបស់យន្តហោះចម្បាំងចិនដែលហោះកាត់មុខ ដោយមិនខ្វល់ពីគ្រោះថ្នាក់បុកយន្តហោះល្បាតរបស់ជប៉ុន។
នៅក្នុងសេចក្តីប្រកាសព័ត៌មាននៅថ្ងៃចន្ទ កងទ័ពចិនទទួលស្គាល់ថា ពិតជាមាននាវាចម្បាំង និងយន្តហោះចម្បាំងបរទេស តាមដានសកម្មភាពធ្វើសមយុទ្ធរបស់នាវាដឹកយន្តហោះចិន។ មួយវិញទៀត បើតាមកងទ័ពចិន គឺយន្តហោះចម្បាំងរបស់ជប៉ុនដែលធ្វើសកម្មភាពញុះញង់។
ចិនបានបញ្ចេញនាវាដឹកយន្តហោះ ស្ហានតុង និងលីវនីង ទៅធ្វើសមយុទ្ធក្នុងតំបន់ទឹកឆ្ងាយៗ ក្នុងមហាសមុទ្ធប៉ាស៊ីហ្វិក ខណៈពេលដែលនាវាដឹកយន្តហោះធំទី៣ដែលចិនទើបបានបញ្ចប់ការសាងសង់ក្នុងស្រុក ដោយដៃឯង ឈ្មោះ ហ្វូជៀន កំពុងស្ថិតក្នុងដំណាក់កាលធ្វើតេស្តសាកល្បងសមត្ថភាពនៅមូលដ្ឋានទ័ពជើងទឹក។
ផ្ទុយពីនាវាដឹកយន្តហោះ លីវនីង ដែលច្នៃចេញពីនាវាចម្បាំងទិញពីសហភាពសូវៀត និងនាវាស្ហានតុងដែលចិនសាងសង់ដោយយកគំរូតាមសូវៀត នាវាដឹកយន្តហោះហ្វូជៀនចេញពីគំនិតកែច្នៃ និងបច្ចេកទេសចិន១០០ភាគរយ។ វាស្តែងឲ្យឃើញពីបច្ចេកវិទ្យាកាន់តែទំនើបរបស់ចិន ព្រោះថា ខុសពីនាវាដឹកយន្តហោះពីរមុន នាវាដឹកយន្តហោះហ្វូជៀនមានបំពាក់ដោយប្រព័ន្ធដ៏ទំនើបថ្មីដែលអនុញ្ញាតឲ្យនាវាហ្វូជៀនមានសមត្ថភាពទទួលដឹកយន្តហោះច្រើនប្រភេទ ហើយយន្តហោះចម្បាំងផ្ទាល់ក៏មានឱកាសចូលមកដឹកយកគ្រឿងសព្វាវុធបានច្រើន។
ដោយបង្កើននាវាដឹកយន្តហោះដល់៣គ្រឿងក្នុងទំហំធំ មហាយក្ស ចិនស្ថិតនៅចំណាត់ថ្នាក់លេខ២ បន្ទាប់ពីអាមេរិក ដែលមាននាវាផ្ទុកយន្តហោះ សរុប ១១គ្រឿង៕
Nº.0819
