ឥណ្ឌូណេស៊ី បើកការដ្ឋានសង់រោងចក្រផលិតអាគុយរថយន្តអគ្គីសនី ក្នុងទឹកប្រាក់ ៥,៩ពាន់លានដុល្លារ

ឥណ្ឌូណេស៊ី បើកការដ្ឋានសង់រោងចក្រផលិតអាគុយរថយន្តអគ្គីសនី ក្នុងទឹកប្រាក់ ៥,៩ពាន់លានដុល្លារ

ចេញផ្សាយនៅថ្ងៃទី៣០ ខែមិថុនា ឆ្នាំ២០២៥៖

នៅថ្ងៃអាទិត្យ ទី២៩ មិថុនា ប្រធានាធិបតីឥណ្ឌូណេស៊ីបានបើកសម្ភោធការដ្ឋានសាងសង់រោងចក្រផលិតអាគុយរថយន្តអគ្គីសនី ក្នុងទំហំទឹកប្រាក់ប្រមាណ ៥,៩ពាន់លានដុល្លារ។ នេះជាគម្រោងវិនិយោគរួមគ្នារវាងក្រុមហ៊ុនបច្ចេកវិទ្យានិងរ៉ែខ្នាតយក្សរបស់ចិន និងក្រុមហ៊ុនរ៉ែឥណ្ឌូណេស៊ី។ យ៉ាងណាមិញ អង្គការការពារបរិស្ថានបានសម្តែងការព្រួយបារម្ភយ៉ាងខ្លាំង អំពីផលប៉ះពាល់បរិស្ថាននិងសហគមន៍ម្ចាស់ស្រុក ក្នុងតំបន់អភិវឌ្ឍន៍។

ឥណ្ឌូណេស៊ី គម្រោងផលិតអាគុយសម្រាប់រថយន្តអគី្គសនី មានទំហំទឹកប្រាក់វិនិយោគប្រមាណ ៥ពាន់៩រយលានដុល្លារ។ គម្រោងដ៏ធំមហិមានេះនឹងធ្វើនៅលើទីតាំង២កន្លែងផ្សេងគ្នា។ ទី១ នៅលើកោះ Halmahera ក្នុងប្រជុំកោះ Maluku ខាងជើង សិ្ថតនៅភាគឦសានប្រទេសឥណ្ឌូណេស៊ី គឺជាកន្លែងជីកយករ៉ែនីកែល និងចម្រាញ់រ៉ែនីកែល ដែលត្រូវចំណាយទឹកប្រាក់ប្រមាណ ៤,៧ពាន់លានដុល្លារ។ ទី២ នៅខេត្ត Karawang ភាគខាងកើតទីក្រុង Jakarta គឺជាកន្លែងផលិតអាគុយរថយន្តអគ្គីសនីដែលត្រូវចំណាយទឹកប្រាក់ប្រមាណ ១,២ពាន់លានដុល្លា។ នេះបើតាមការបញ្ជាក់របស់រដ្ឋមន្រ្តីថាមពលឥណ្ឌូណេស៊ី នៅក្នុងពិធីសម្ភោធបើកការដ្ឋានគម្រោងសាងសង់រោងចក្រផលិតអាគុយរថយន្តអគ្គិសនី នៅខេត្ត Karamwang នាថ្ងៃអាទិត្យ ទី២៩ មិថុនា។

លោករដ្ឋមន្រ្តីរូបនេះមិនបានបញ្ជាក់ថាតើ គម្រោងនេះនឹងដំណើរការនៅពេលណាឲ្យប្រាកដ។ ក៏ប៉ុន្តែអ្នកទទួលខុសត្រូវឥណ្ឌូណេស៊ីមួយរូបបានឲ្យដឹងថា រោងចក្ររបស់ក្រុមហ៊ុនបច្ចេកវិទ្យាចិន CALT នៅលើកោះ Halmahera នឹងចាប់ផ្តើមបើកទ្វារ នៅខែមីនា ឆ្នាំ២០២៦។ ក្រៅតែពីក្រុមហ៊ុនចិន Calt ក៏មានក្រុមហ៊ុនរ៉ែចិន Zhenjiang Huayou Cobalt និងក្រុមហ៊ុនរ៉ែឥណ្ឌូណេស៊ី Antam បោះទុនសាងសង់រោងចក្រ នៅលើកោះនេះដែរ។

ដោយឡែក អង្គការកាពារបរិស្ថានបានទាញសញ្ញាអាសន្នអំពីផលប៉ះពាល់យ៉ាងធ្ងន់ធ្ងរដល់បរិស្ថាន នៅលើកោះ Halmahera ដោយសារឧស្សាហកម្ម រ៉ែនីកែល តួយ៉ាង ការកាប់បំផ្លាញព្រៃឈើ ការបំផ្លាញទីជម្រករស់នៅ ការបំពុលបរិយាកាស និងទឹក ព្រមទាំងសមហគមន៍ម្ចាស់ស្រុក។

លោក Leonard Simanjuntak នាយកអង្គការ Greenpeace បានអំពាវនាវឲ្យរដ្ឋាភិបាលឥណ្ឌូណេស៊ីគិតគូរឲ្យបានច្បាស់លាស់មុនគម្រោងនេះចាប់ផ្តើម។ លោកនាយកអង្គការដដែលនេះក៏បានសំណូមពរឲ្យរដ្ឋាភិបាលកែតម្រូវគោលនយោបាយ និងការចម្រាញ់យករ៉ែនីកែលរបស់ខ្លួន ស្របទៅតាមបទដ្ឋានអន្តរជាតិ។

ចំណែកឯ លោក Brad Adams នាយកអង្គការ Climate Rights International បានស្នើសុំឲ្យក្រុមហ៊ុនវិនិយោគទាំងបី នៅលើកោះ Halmahera រួមមាន គោរពសិទ្ធិរបស់សហគមន៍ម្ចាស់ស្រុកនិងគោរពបរិស្ថាន មុននឹងចាប់ផ្តើមការដ្ឋានសាងសង់ និង ប្រតិបត្តិការជីករកនិងចម្រាញ់រែនីកែល ក្នុងតំបន់នោះ។

គួរកត់សំគាល់ថា បើទោះបី ជា ដឹងថាបង្កផលប៉ះពាល់ធ្ងន់ធ្ងរដល់បរិស្ថាន និង ទៅលើប្រជាជន តែ រដ្ឋាភិបាល ឥណ្ឌូណេស៊ី បានប្តេជ្ញាចិត្តអភិវឌ្ឍន៍ វិស័យ ឧស្សាហកម្ម រ៉ែនីកែល ខណៈទីផ្សារពិភពលោក កំពុងត្រូវការរ៉ែប្រភេទនេះជាខ្លាំង សម្រាប់ផលិតដែកថែបមិនចេះច្រែស និង អាគុយអគ្គីសនី ។ យោងតាមការប៉ាន់ស្មាន នៅឥណ្ឌូណេស៊ី មាន រ៉ែនីកែល ប្រមាណ ២១លានតោន ពោលគឺ ប្រមាណ ២០%នៃស្តុកពិភពលោក ។ នៅប៉ុន្មានឆ្នាំចុងក្រោយនេះ ទាំងក្រុមហ៊ុនក្នុងស្រុកនិងក្រុមហ៊ុនអន្តរជាតិធំៗ នាំគ្នាសំរុកទៅវិនិយោគនៅឥណ្ឌូណេស៊ី ជាបន្តបន្ទាប់ ដោយ ឃើញសក្តានុពលធនធានធម្មជាតិ ដ៏មហាសាលនេះ ដើម្បីបំពេញតម្រូវការរថយន្តអគ្គិសនីដែលកំពុងកើនឡើង៕

Nº.0816