អំពើហិង្សាអ៊ីស្រាអែលលើប៉ាឡេស្ទីន បានរាលដាលដល់តំបន់ស៊ីហ្សកដានី

អំពើហិង្សាអ៊ីស្រាអែលលើប៉ាឡេស្ទីន បានរាលដាលដល់តំបន់ស៊ីហ្សកដានី

ចេញផ្សាយថ្ងៃទី២៩ ខែមិថុនា ឆ្នាំ២០២៥៖

ខណៈពេលដែលពិភពលោកកំពុងផ្តោតលើសង្រ្គាមរវាងអ៊ីស្រាអែល និងអ៊ីរ៉ង់ ការបាត់បង់ជីវិតរបស់ប្រជាជនប៉ាឡេស្ទីនក្នុងអំពើហិង្សា បង្កដោយអាណានិគមជនអ៊ីស្រាអែល បានកើនឡើងជាលំដាប់ នៅស៊ីហ្សកដានី។ តំបន់ស៊ីហ្សកដានី ជាទឹកដីប៉ាឡេស្ទីនស្ថិតនៅក្រោមត្រួតត្រាដោយអ៊ីស្រាអែល តាំងពីឆ្នាំ ១៩៦៧។ អំពើហិង្សាដែលជាស្នាដៃទាហាន និងអាណានិគមជនអ៊ីស្រាអែល បានបណ្តាលឲ្យប្រជាជនប៉ាឡេស្ទីន ៣នាក់ ស្លាប់បាត់បង់ជីវិត។

ប្រតិបត្តិបង្រ្កាបអំពើហិង្សាក្នុងភូមិមួយ នៅភាគកណ្តាលនៃតំបន់ស៊ីហ្សកដានី ទាហានអ៊ីស្រាអែលបានបាញ់ប្រហារទៅលើអ្នកភូមិ បណ្តាលឲ្យស្លាប់ប្រជាពលរដ្ឋប៉ាឡេស្ទីនស្លូតត្រង់ ៣នាក់។ អំពើហិង្សានេះបង្កឡើងដោយអាណានិគមជនអ៊ីស្រាអែលជ្រុលនិយមមួយក្រុម កាលពីយប់ថ្ងៃពុធ ទី២៥ មិថុនា។ អាជ្ញាធរប៉ាឡេស្ទីនបានចោទប្រកាន់ទាហានអ៊ីស្រាអែល ថាបានរារាំងឡានពេទ្យប៉ាឡេស្ទីន ចូលជួយសង្គ្រោះអ្នករបួស នៅភូមិកើតហេតុ និងព្រងើយកន្តើយ ព្រមទាំងទុកឱកាសឲ្យអាណានិគមជនអ៊ីស្រាអែល បំផ្លិចបំផ្លាញដុតផ្ទះសម្បែងរបស់ប្រជាជនប៉ាឡេស្ទីន ជាច្រើនខ្នង។

ឆ្លើយតបនឹងការចោទប្រកាន់នេះ អ្នកនាំពាក្យរបស់កងទ័ពអ៊ីស្រាអែលបានប្រាប់ ថា ទាហានអ៊ីស្រាអែលបានចុះធ្វើអន្តរាគមន៍នៅកន្លែងដែលមានអំពើហិង្សា និងបានបំបែកក្រុមជនបង្កហេតុ ចោលដុំថ្មដាក់គ្នារវាងប្រជាជានប៉ាឡេស្ទីន និង ជនជាតិអ៊ីស្រាអែល។ ទើប ទាហានអ៊ីស្រាអែលបានបើកការបាញ់តបតលើក្រុមភេរវជនដែលចោលដុំថ្មនិងបាញ់មកលើទាហានរបស់ខ្លួន។

បើយោងតាមទូរទស្សន៍អ៊ីស្រាអែល នៅពេលដែលកងកម្លាំងមានសមត្ថកិច្ចបានចុះអន្តរាគមន៍ ជនជាតិអ៊ីស្រាអែល ប្រមាណជាង ១០នាក់ បានចោលដុំថ្ម និងបានប្រើអំពីហិង្សា ព្រមទាំងមានបំណងបើករថយន្តបំបុកកងកម្លាំងមានសមត្ថកិច្ច ដើម្បីតម្រង់មកទីស្នាក់ការរបស់អាជ្ញាធរប៉ាលីស្ទីន។ ក្រោយពីកើតហេតុភ្លាមៗ ទាហានអ៊ីស្រាអែលបានឃាត់ខ្លួនជនបង្កជនជាតិអ៊ីស្រាអែល ៦នាក់ និងបានបញ្ជូនមកប៉ុស្តិ៍នរគបាលមូលដ្ឋាន។

ថ្លែងក្នុងសន្និសីទសារព័ត៌មាន រដ្ឋមន្រ្តីក្រសួងការពារជាតិអ៊ីស្រាអែលបានថ្កោលទោសយ៉ាងដាច់អហង្កា ចំពោះអំពើហិង្សាមកលើទាហានអ៊ីស្រាអែល និងបានចេញបញ្ជាឲ្យស្វែងរកចាប់ខ្លួនជនបង្កផ្សេងទៀត។

ដោយឡែក អង្គការការពារសិទ្ធិមនុស្សបានថ្កោលទោសចំពោះកំណើនអំពើហិង្សា បង្កដោយអាណានិគមជនអ៊ីស្រាអែល នៅតំបន់ស៊ីហ្សកដានី។ តំបន់ស៊ីហ្សកដានីជាទឹកដីប៉ាឡេស្ទីនស្ថិតនៅក្រោមការ ត្រួត ត្រា របស់អ៊ីស្រាអែល ចាប់តាំងពីឆ្នាំ១៩៦៧។ អង្គការដដែលនេះក៏បានលើកឡើងថា អាជ្ញាធរអ៊ីស្រាអែលតែងតែដោះលែងជនបង្កហេតុ។

បើតាមអាជ្ញាធរប៉ាឡេស្ទីន រហូតមកដល់ពេលនេះ មានប្រជាជនប៉ាស្ទីនប្រមាណ ៩៤៥នាក់ បានស្លាប់បាត់បង់ជីវិត ដោយស្នាដៃទាហាន និងអាណានិគមជនអ៊ីស្រាអែល នៅតំបន់ស៊ីហ្សកដានី៕

Nº.0812